কৃষক আইন প্ৰত্যাহাৰৰ দাবীত দিল্লী সীমান্তত আন্দোলনৰত কৃষকসকলৰ ধৰ্মঘট আজি ১২ দিন হ’ল । সিংঘুসহ দিল্লী-হাৰিয়ানাৰ সীমান্তত প্ৰতিবাদী কাৰ্যসূচী অব্যাহত ৰাখিছে কৃষকসকলে । আজি সিংঘু সীমান্তত প্ৰতিবাদী কৃষকসকলৰ স’তে মিলিত হ’ব দিল্লীৰ মুখ্যমন্ত্ৰী অৰবিন্দ কেজৰিৱালসহ অন্যান্য মন্ত্ৰীসকলো ।
আন্দোলনৰত কৃষকসকলৰ বাবে দিল্লী চৰকাৰে কেনে ধৰণৰ ব্যৱস্থা গ্ৰহণ কৰিছে তাৰেই বুজ ল’বলৈ আৰু কৃষকসকলৰ স’তে আলোচনাত মিলিত হ’বলৈ মুখ্যমন্ত্ৰী কেজৰিৱালে সীমান্তত যাব বুলি সংবাদ মাধ্যমক জনাইছে । কৃষক প্ৰতিবাদৰ বাবে সিংঘু, আওচাদী, পিয়াও মানিয়াৰি আৰু মংগেচ সীমান্তত যাতায়ত চলাচল বন্ধ কৰি দিছে দিল্লী আৰক্ষীয়ে ।
আগন্তুক ন ডিচেম্বৰত কৃষকসকলৰ স’তে বৈঠকত মিলিত হ’ব কেন্দ্ৰীয় কৃষি মন্ত্ৰী নৰেন্দ্ৰ সিং ট’মৰ । কিন্তু নতুন কৃষি আইন বাতিলৰ দাবীত কৃষকসকল এতিয়াও আকোৰগোঁজ হৈ আছে । বিগত এসপ্তাহ ধৰি কৃষকসকলৰ স’তে কেন্দ্ৰয় একাধিকবাৰ বৈঠকত মিলিত হয় কিন্তু কোনো সমাধানৰ সূত্ৰ পোৱা নগ’ল । মংগলবাৰে ভাৰত বন্ধৰ দাবীও জনাইছে কৃষকসকলে এই বন্ধৰ সমৰ্থন জনাইছে বিভিন্ন বিৰোধী দলে ।