আমেৰিকাৰ সদ্য বিদায় ল’বলগীয়া ৰাষ্ট্রপতি ডনাল্ড ট্রাম্পৰ স’তে যােগাযােগ আছে ভিনগ্রহৰ প্ৰাণী বা এলিয়েনৰ। এই চাঞ্চল্যকৰ তথা অদ্ভুত দাবী কৰিলে ইজৰাইলৰ মহাকাশ নিৰাপত্তা বাহিনীৰ প্রাক্তন মুৰব্বী হাইম এছেদে। স্বাভাৱিকতে এই দাবীয়ে সামাজিক মাধ্যমত তােলপাৰ লগাইছে। এই মহাবিশ্বত পৃথিৱী একমাত্র নে আন কোনাে গ্রহতাে প্রাণ আছে? এই দীর্ঘদিনীয়া প্ৰশ্নৰ উত্তৰ বিজ্ঞানীসকলে আজিও দিব পৰা নাই।
অৱশ্যে ভিনগ্রহত প্ৰাণৰ অস্তিত্বৰ ধাৰণা কৰিয়ে সৃষ্টি হৈছে কল্পবিজ্ঞান আৰু এলিয়েনৰ ধাৰণাটো। এতিয়া ইজৰাইলৰ ৮৭ বছৰীয়া গৱেষক এছেদে দাবী কৰিছে যে এলিয়েন সঁচাকৈয়ে আছে আৰু স্বয়ং ট্রাম্প এই বিষয়ে অৱগত। আনকি আমেৰিকান প্রশাসনৰ স’তে ভিনগ্রহৰ প্ৰাণীৰ সংগঠনৰ হেনাে এক চুক্তিও সম্পন্ন হৈছে। কিন্তু কি কাৰণত এই চুক্তি সম্পন্ন অশীতিপৰ গৱেষকজনে কয় যে ভিনগ্রহৰ প্রাণীসকলে মহাবিশ্বৰ গঠনক কেন্দ্র কৰি গৱেষণা কৰিব বিচাৰে।
এই সন্দৰ্ভতে এই চুক্তি সম্পন্ন হৈছে।আনকি মঙলত ইতিমধ্যেই ইয়াৰ বাবে মাটিৰ তলত গােপন ঘাটিও নির্মাণ কৰা হৈছে বুলি এছেদে দাবী কৰিছে। এনে চুক্তিৰ বিষয়টো গােপন ৰখাৰ প্ৰসংগতাে এছেদে যুক্তি দাঙি ধৰিছে। তেওঁ কয়, আচলতে ডনাল্ড ট্রাম্প প্রশাসনে বিষয়টো গােপনে ৰাখিছে। কাৰণ মানৱ সভ্যতা এতিয়াই ইয়াৰ বাবে প্রস্তুত নহয় এলিয়েনসকলৰাে ইচ্ছা, এই সংক্রান্তীয় গৱেষণাত মানুহে আৰু উন্নতি কৰক। তেতিয়াহে মানুহে মহাকাশৰ ৰহস্যক বুজিব পাৰিব।
উল্লেখ্য যে এছেদে অনুৰূপ দাবী তেওঁ নিজৰ গ্ৰন্থ ‘দ্য ইউনিভার্ড বিয়ণ্ড দ্য হ’ৰাইজন’তাে কৰিছে। নিজৰ দাবীৰ সমৰ্থনত যুক্তি দাঙি ধৰি এছেদে লগতে কয়, ‘পাঁচ বছৰৰ পূর্বে এনে দাবী কৰা হ’লে তেওঁক হাস্পতাললৈ প্ৰেৰণ কৰিলেহেঁতেন। কিন্তু তেওঁ এতিয়া এনে দাবী কৰাৰ পাছতাে এই পর্যন্ত আমেৰিকান প্রশাসন বা স্বয়ং ট্রাম্পেও বিষয়টোক কেন্দ্ৰ কৰি কোনাে প্রতিক্রিয়া ব্যক্ত কৰা নাই। অৱশ্যে এনে অদ্ভুত দাবীৰ কথা জানিব পাৰি ইণ্টাৰনেট ব্যৱহাৰকাৰীসকল ৰােমাঞ্চিত হৈ পৰিছে। এজন লােকে টুইটাৰত লিখিছে, ২০২০ত এনেয়েই আজব কাণ্ডবােৰ ঘটি আছে।
এইবাৰ ইজৰাইলৰ অধ্যাপকে দাবী কৰিছে, তেওঁৰ দেশ আৰু আমেৰিকাৰ স’তে ভিনগ্রহীসকলৰ যােগাযােগ আছে।ইয়াক কেন্দ্ৰ কৰি নেট জগতত বিভিন্ন ‘মিম’ও পষ্ট হৈছে। উল্লেখ্য যে আন গ্ৰহত প্ৰাণৰ অস্তিত্ব আছে নে নাই, সেই বিতর্ক আজিৰ নহয়। বিভিন্ন সময়ত কিছু কল্পনাপ্রসূত লােকে আকাশত ইউএফঅ’ প্রত্যক্ষ কৰাৰাে আজব দাবী কৰি আহিছে। আমেৰিকাৰ মহাকাশ গৱেষণা সংস্থা নাছায়াে এলিয়েনৰ অস্তিত্বৰ প্রসংগতাে সম্পূৰ্ণৰূপে নস্যাৎ কৰা নাই। অৱশ্যে এই বিষয়ত কোনেও আজিলৈকে কোনাে সঠিক প্রমাণে পােৱা নাই।