পৰ্যটকৰ বাবে সুখবৰ কঢ়িয়াই বিশ্ব ঐতিহ্যক্ষেত্ৰ মানাহ ৰাষ্ট্ৰীয় উদ্যান কতৃপক্ষই মুকলি কৰিছে পৰ্যটনৰ ক্ষেত্ৰত এক নতুন সংযোজন যাৰ নাম ‘এলিফেণ্ট শ্ব’ অৰ্থাৎ হস্তী প্ৰদৰ্শনী৷ এই হস্তী প্ৰদৰ্শনীৰ জৰিয়তে এতিয়া পৰ্যটকে মানাহত উপভোগ কৰিব পাৰিব পোহনীয়া হাতীক গা ধুওৱা, খাদ্য খুওৱা, নখ কাটি দিয়া ইত্যাদি বিভিন্ন কাৰ্য ৷
তদুপৰি হাতীৰ লগত জড়িত হাওদা, দুংচি, অংকুশ আদি বিভিন্ন সামগ্ৰীৰ স’তে চিনাকি হ’ব পাৰিব পৰ্যটকে৷ মানাহৰ বন বিভাগৰ ৪৫ টা পোহনীয়া হাতীক মাউতে কৰা নৈমিত্তিক পৰিচৰ্যাৰ দৃশ্য প্ৰদৰ্শনেৰে প্ৰতিদিনে এক নিৰ্ধাৰিত সময়ত পৰ্যটকক আমোদ দিয়া হ’ব এই হস্তী প্ৰদৰ্শনীৰ জৰিয়তে ৷
মানাহৰ বাঁহবাৰী ৰেঞ্জৰ মাউত কেম্পত ৰবিবাৰে এই হস্তী প্ৰদৰ্শনী আনুষ্ঠানিকভাৱে মুকলি কৰে বন আৰু পৰিৱেশ বিভাগৰ সচিব মাধুৰিমা বৰুৱা সেনে৷ উল্লেখযোগ্য যে থাইলেণ্ডৰ উপৰি ভাৰতত একমাত্ৰ তামিলনাডুৰ মুডুমালাই ৰাষ্ট্ৰীয় উদ্যানত এই হস্তী প্ৰদৰ্শনীৰ ব্যৱস্থা আছে ৷
অসমত পোনপ্ৰথমে মানাহতে এই প্ৰদৰ্শনী মুকলি কৰা বুলি জানিবলৈ দিয়ে মানাহ ব্যাঘ্ৰ প্ৰকল্পৰ ক্ষেত্ৰ সঞ্চালক অমল চন্দ্ৰ শৰ্মাই ৷ আনহাতে এই প্ৰদৰ্শনীৰ জৰিয়তে পৰ্যটকে এক সুকীয়া আমোদ ল’ব পাৰিব বুলিও ক্ষেত্ৰ সঞ্চালক শৰ্মাৰ উপৰি বন আৰু পৰিৱেশ বিভাগৰ সচিব মাধুৰিমা বৰুৱা সেনে উল্লেখ কৰে ৷
উল্লেখ্য যে বাঁহবাৰী ৰেঞ্জৰ প্ৰৱেশদ্বাৰৰ পৰা প্ৰায় ডেৰ কিলোমিটাৰ নিলগতে থকা মাউত কেম্পৰ মনোমোহা প্ৰাকৃতিক পৰিৱেশত পৰ্যটকে অতি কম খৰচতে উপভোগ কৰিব পাৰিব এই হস্তী বিনোদন৷ ৰবিবাৰে এই হস্তী প্ৰদৰ্শনী মুকলিৰ সময়ত মানাহৰ বন বিভাগৰ বিষয়াসকলৰ উপৰি বাঁহবাৰী ৰেঞ্জৰ ৰেঞ্জাৰ বাবুল ব্ৰহ্ম প্ৰমুখ্যে বিভিন্ন স্বেচ্ছাসেৱী সংগঠনৰ বিষয়ববীয়াসকল উপস্থিত থাকে ৷