অসম চৰকাৰে বিটিআৰক সাতশ কিলোমিটাৰ পথ বনাবলৈ পাঁচশ কোটি উপহাৰ দিছে : বিটিআৰ চীফ প্ৰমোদ বড়ো
ভাৰতীয় জনতা পাৰ্টি, অসম গণ পৰিষদ, ইউপিপিএল আৰু বাকী মিত্ৰদলৰ লগত ভাৰতীয় জনতা পাৰ্টিৰ নেতৃত্বত নিশ্চিতভাবে আমি এশখন আসন দখল কৰিব পাৰিম আৰু অসমৰ ৰাইজে আমাক আশীৰ্বাদ দিব৷কংগ্ৰেছ এআইইউডিএফৰ মিত্ৰতাই আমাক কোনো ধৰণৰ ক্ষতি কৰিব নোৱাৰে৷তেওঁলোকে ২২-২৩ খন আসনহে পাব বিধানসভা নিৰ্বাচনত৷এখন কৰাপচনমুক্ত বিটিআৰ গঠন কৰিবলৈ আমি প্ৰমোদ বড়োক দ্বায়িত্ব দিছো ৷ এই মন্তব্য ৰাজ্যিক বিজেপিৰ সভাপতি ৰণজিৎ কুমাৰ দাসৰ ৷
দেওবাৰে নিশা বাক্সাৰ শালবাৰীৰ নিমুৱাত গোৱৰ্ধনা এবছুৰ ২৩ সংখ্যক বাৰ্ষিক অধিৱেশনৰ মুকলি সভাত অংশগ্ৰহণ কৰি ৰণজিৎ দাসে কয় আগন্তুক দিনত আমাৰ যি সপোন আছে,আমাৰ যি কৰিবলগীয়া কাম বাকী আছে সেইখিনি কাম কৰাৰ পিছত অসমক আমি ভাৰতবৰ্ষৰ ভিতৰতে যাতে এখন সৰ্বশ্ৰেষ্ঠ ৰাজ্য হিচাপে গঢ়ি তুলিব পাৰোঁ তাৰবাবে অসমবাসী ৰাইজৰ পৰা আমি আশীৰ্বাদ বিচাৰিছো ৷
আগন্তুক দিনত অসমৰ কোনো এটা বিধানসভা সমষ্টিতে কংগ্ৰেছ এআইইউডিএফে মিত্ৰতা কৰিলেও বিজেপিৰ কোনো ক্ষতি নহয়৷ মঙলদৈ লোকসভা সমষ্টিত কংগ্ৰেছ এআইইউডিএফে মিত্ৰতা হৈ নিৰ্বাচন খেলিছিল,তাত এআইইউডিএফৰ প্ৰাৰ্থী নাছিল৷তৎস্বত্বেও আমি দেৰ লাখ ভোটত জয়লাভ কৰিছিলোঁ৷শিলচৰতো এআইইউডিএফৰ প্ৰাৰ্থী নাছিল৷তাতো আমি ৮৫ হাজাৰ ভোটত জিকিছোঁ৷ আমাৰ যি সংখ্যালঘু সমাজ আছে সেই সমাজে ভাৰতীয় জনতা পাৰ্টিৰ প্ৰতি ধাৱমান হৈছে৷ভাৰত চৰকাৰ বা অসম চৰকাৰৰ যিমানবোৰ আঁচনি আছে সেই আঁচনি সমুহৰ সৰ্বাধিক সুফল লাভ কৰিছে সংখ্যালঘু সকলে ৷
গতিকে আগন্তুক দিনতো সংখ্যালঘু সকলে বিজেপি মিত্ৰজোঁটৰ চৰকাৰকেই ভোট প্ৰদান কৰিব৷ডেকা ল’ৰাবিলাকৰ হাতত মোবাইল আছে,কম্পিউটাৰ আছে৷তেওঁলোকে বিবেক ভোট দিব৷বিশ্বত কি ঘটি আছে সেইয়া তেওঁলোকে জানি আছে,বুজি আছে৷ মুকলি সভাৰ ভাষণ প্ৰসংগত ৰণজিৎ দাসে কয়-“প্ৰমোদ বড়োৰ নেতৃত্বত আমি প্ৰবল বিশ্বাসী৷তেওঁ আগন্তুক দিনত আমাৰ বিটিচি অঞ্চলত উন্নয়ন কৰিব পাৰিব৷এতিয়াও তিনি হাজাৰ কোটি টকা ঋণত আছে বিটিচি চৰকাৰ৷বিটিচিৰ উন্নয়নৰ বাবে সেয়ে কিছু সময় লাগিব ৷
আমি প্ৰমোদ বড়োক দ্বায়িত্ব দিছোঁ যাতে বিটিআৰ খনক নতুন ৰূপত সজাব পাৰে৷অসম চৰকাৰ প্ৰমোদ বড়োৰ লগত আছে,প্ৰধানমন্ত্ৰী নৰেন্দ্ৰ মোডীৰ আশীৰ্বাদ তেওঁৰ লগত আছে,মুখ্যমন্ত্ৰী সৰ্বানন্দ সোণোৱালৰ আশীৰ্বাদ তেওঁৰ লগত আছে,মোৰ আশীৰ্বাদ তেওঁৰ লগত আছে,নেডাৰ আহ্বায়ক হিমন্ত বিশ্ব শৰ্মাৰ আশীৰ্বাদ আছে৷গতিকে নিশ্চিতভাবে আমি আগন্তুক দিনত বিটিআৰ অঞ্চলৰ উন্নয়ন সাধন কৰিবলৈ সক্ষম হ’ম৷” ৰণজিৎ দাসে কয়-মই মোৰ নিজৰ সমষ্টি সৰভোগতো ৰাস্তাঘাটৰ ক্ষেত্ৰত যথেষ্ট উন্নয়ন কৰিছোঁ,আগতে নৈৰ বুকু সাঁকোৰে পাৰ হ’ব লগা আছিল ৷
বৰ্তমান পকী দলংৰ ব্যৱস্থা কৰা হৈছে৷নিমুৱাৰ পৰা ঘোঁৰামাৰা বজাৰলৈ ১৩ কোটি টকাৰ পথ আৰু দলংৰ কাম চলি আছে৷নিমুৱাৰ পৰা কালপানীলৈও পিএমজেওৱাই আঁচনিৰ অধীনত অনুৰূপ কাম চলি আছে৷একেদৰে আনটাইড পূঁজিৰ অধীনত শ্মশান নিৰ্মাণৰ ক্ষেত্ৰতো বিভিন্ন ঠাইত দহ লাখকৈ টকা আগবঢ়োৱা হৈছে৷বহু ঠাইত কমিউনিটি হলৰ নামতো আমি টকা দিছোঁ৷নিমুৱা প্ৰাইমাৰী হস্পিতালৰ ঠাইত অসম চৰকাৰৰ পৰা আৱণ্টিত পাঁচ কোটি টকা ব্যয় সাপেক্ষে হস্পিতালখন নতুন ৰূপত সজোৱা হ’ব৷ইতিমধ্যে প্ৰমোদ বড়োৱে মথনগুৰি সমষ্টিৰ ৰাস্তাঘাটৰ উন্নয়নৰ বাবে এমচিএলএ গৌতম দাসক দহ কোটি টকা প্ৰদান কৰিছে ৷
পূৰ্বতে ভিচিডিচি এলেকা সমুহত যি দুৰ্নীতি হৈছিল তাৰ পুণৰাবৃত্তি যাতে হ’ব নোৱাৰে তাৰ ক্ষেত্ৰত ৰাইজেই চকু দিব লাগিব৷ তেতিয়াহে কৰাপচন মুক্ত এখন বিটিআৰ গঠন হ’ব৷” বৰপেটাৰ মেধিৰটাৰীত মাঘ বিহু উপলক্ষে যি অশ্লীল নৃত্য প্ৰদৰ্শন কৰা হৈছিল তাৰ প্ৰতিক্ৰিয়া জানিব খোজাত সাংবাদিকৰ আগত বিজেপি সভাপতি দাসে কয়-সেইয়া মই দেখাও নাই,শুনাও নাই৷গতিকে মই একো ক’ব নোৱাৰিম৷ প্ৰতিক্ৰিয়া প্ৰকাশ কৰাৰ কথাই নাহে৷ মুকলি সভাত অংশগ্ৰহণ কৰি বিটিআৰ চীফ প্ৰমোদ বড়োৱে কয়-শিক্ষা বিভাগৰ জিলা,ব্লক কাৰ্যালয়সমুহত স্কুলৰ বাবে আৱণ্টিত আচবাব বছৰ বছৰ ধৰি জমা হৈ আছে ৷
কিন্তু স্কুলত বহিবলৈ আচবাব নাই৷কিছুমান বিদ্যালয় ১৫/২০ বছৰ আগতেই প্ৰাদেশীকৰণ হৈছে কিন্তু সেই বিদ্যালয় সমুহ আজিও পকীকৰণ নহ’ল,ছাত্ৰছাত্ৰী বহিব লাগে মাটিত৷এইবাৰ স্কুলৰ ফাৰ্নিচাৰ চাপ্লাই নহ’ব৷বিটিআৰত যি টকা আছে সেই টকাৰে এল পি,এমই স্কুলবোৰ নতুনকৈ বনোৱা কামত খৰচ কৰিম৷ছাত্ৰছাত্ৰীয়ে গুণগত শিক্ষা পাব লাগিব৷ছাত্ৰছাত্ৰীয়ে কোনে কি কেৰিয়াৰ ল’ব খোজে সেই দিশত ছাত্ৰছাত্ৰীক আগবঢ়াই নিব বিটিআৰ চৰকাৰে৷ সাতশ কিল’মিটাৰ পথ বনোৱাৰ বাবে অসম চৰকাৰে বিটিআৰ চৰকাৰ গঠন হোৱাৰ পিছতে পাঁচশ কোটি টকা উপহাৰ হিচাপে দিছে৷অহা দুমাহৰ ভিতৰতেই বিটিআৰৰ চল্লিশটা সমষ্টিৰ প্ৰতিটোতে দহৰ পৰা বিশ কিলোমিটাৰ পথ পকীকৰণৰ ব্যৱস্থা কৰা হ’ব ৷
আনটাইড পূঁজিৰ আশী শতাংশ এইবাৰ বিটিআৰৰ স্কুলৰ নামত খৰচ কৰা হ’ব৷ পূৰ্বৰ চৰকাৰে ১৫ ফাইনেঞ্চৰ যিখিনি টকা আছিল সোঁ বাওঁহাতৰ চহীৰে এমূৰৰ পৰা খাইছিল৷যোৱা ১৭ বছৰে বিপিএফে বড়ো জনগোষ্ঠীকে ভূমিৰ পাট্টা নিদিলে আৰু অন্য জনগোষ্ঠীৰ কথা কি কম৷কিন্তু ভূমিহীন সকলোকে এইবাৰ ইউপিপিএল চৰকাৰে ভূমিৰ পাট্টা দিব৷৷ যোৱা ১৬ আৰু ১৭ জানুৱাৰীত দুদিনীয়া কাৰ্যসূচীৰে অনুষ্ঠিত হোৱা গোৱৰ্ধনা আঞ্চলিক এবছুৰ ২৩ সংখ্যক বাৰ্ষিক অধিবেশনত বিভিন্ন কাৰ্যসূচী ৰূপায়ণৰ অন্তত শেষৰদিনা গোৱৰ্ধনা আঞ্চলিক এবছুৰ সভাপতি আন্দোলন খেৰকটাৰীৰ সভাপতিত্বত অনুষ্ঠিত হৈছিল মুকলি সভা৷সভাখনত উদ্বোধনী ভাষণ ৰাখিছিল বাক্সা জিলা এবছুৰ সভাপতি নৃপেন চন্দ্ৰ বড়োৱে ৷