প্ৰত্যেক সপ্তাহৰ অন্তত মাতৃৰ স’তে উত্তৰাখণ্ডৰ ৰুৰকিৰ পৰা দিল্লীলৈ গৈছিল পণ্টে প্ৰশিক্ষক তাৰক সিনহাৰ পৰা ক্ৰিকেটৰ প্ৰশিক্ষণ ল’বলৈ থকাৰ ঠাইও নাছিল দিল্লীত । হোটেলত থাকিবৰ বাবে আৰ্থিক অৱস্থাও সুচল নাছিল । সেয়েহে গুৰুদ্বাৰাতে তেওঁলোকে নিশা কটাইছিল ।পণ্টে ১৯৯৭ত চাৰি অক্টোবৰত হৰিদ্বাৰত জন্ম গ্ৰহণ কৰে । পিতৃৰ নাম ৰাজেন্দ্ৰ পণ্ট আৰু মাতৃৰ নাম সৰোজ পণ্ট ।
ভগ্নী সাক্ষীৰ স’তে ৰুৰকিত ডাঙৰ হয় পণ্টে । দেহৰাদূনৰ ইণ্ডিয়ান পাব্লিক স্কুলৰ প্ৰাক্তন ছাত্ৰজনৰ প্ৰথম ক্ৰিকেট প্ৰশিক্ষক তাৰক সিনহা । তেওঁ পণ্টৰ বেটিং অনুশীলনত অধিক গুৰুত্ব দিছিল । এজন ভাল বেটছমেন হ’বৰ বাবে চকু আৰু হাতৰ সমন্বয়ৰ সাধনৰ কথা কৈছিল ।উইকেট কিপিঙৰ লগতে বেটিং ভাল কৰাৰ বাবে প্ৰশিক্ষক তাৰকৰ ওচৰত কৃতজ্ঞ পণ্ট । অনুৰ্ধ্ব ১৩ আৰু অনুৰ্ধ্ব ১৫ৰ স্তৰত খেলাৰ বাবে পণ্টক ৰাজস্থানত প্ৰেৰণ কৰিছিল তাৰকে ।
কিন্তু অভিযোগ কৰা হয় যে, সংকীৰ্ণ ৰাজনীতিৰ বাবে পণ্টৰ কেৰিয়াৰ ধ্বংস হ’বলৈ লৈছিল । ২০১৫-১৬ত তেওঁ ৰঞ্জি ট্ৰফিৰে আত্মপ্ৰকাশ কৰে । ২০১৬ত ৰঞ্জি ট্ৰফিৰ ইতিহাসত তেওঁ দ্ৰুততম শতৰাণ কৰিবলৈ সক্ষম হয় । ঝাড়খণ্ডৰ বিৰুদ্ধে দিল্লীৰ হৈ মাত্ৰ ৪৮ বলত শতৰাণ কৰিবলৈ সক্ষম হয় তেওঁ ।২০১৭ৰ ফেব্ৰুৱাৰীত গৌতম গম্ভীৰৰ তত্ত্বাৱধানত দিল্লীৰ ৰঞ্জি দলৰ নেতৃত্ব দিয়াৰ সুযোগ লাভ কৰে পণ্টে ।
অৱশ্যে ইয়াৰ পূৰ্বেই তেওঁ আইপিএল খেলাৰ সুযোগ পাইছিল । এক কোটি ৯০ লাখৰ বিনিময়ত তেওঁক দিল্লী ডেয়াৰডেভিলচে নিৰ্বাচিত কৰে । আইপিএল নিৰ্বাচনীৰ দিনা অনুৰ্ধ্ব ১৯ বিশ্বকাপত শতৰাণ কৰি ভাৰতক ছেমিফাইনেললৈ লৈ যোৱাত ব্যস্ত আছিল পণ্ট ।টি-২০ খেলাৰ পাছত পণ্টৰ ভাৰতীয় দলত অন্তৰ্ভুক্তিৰ পথ মুকলি হয় । তেওঁ ২০১৭ৰ জানুৱাৰীত ভাৰতীয় দলৰ হৈ টি-২০ খেলে । প্ৰতিপক্ষ আছিল ইংলেণ্ড ।
তেওঁ ভাৰতৰ হৈ আন্তৰ্জাতিক টি-২০ত আত্মপ্ৰকাশ কৰা আটাইতকৈ কম বয়সীয়া খেলুৱৈ আছিল । তেওঁৰ বয়স আছিল ১৯ বছৰ । এই ৰেকৰ্ড ভংগ কৰে ৱাশ্বিংটনত সুন্দৰে । তেওঁ ১৮ বছৰ বয়সতে টি-২০ খেলে ।সম্প্ৰতি ১৬টা টেষ্টত তেওঁ মুঠ ১০৮০ ৰাণ কৰিছে । গড় ৪৩.৫২ । সৰ্বোচ্চ ১৫৯ । ৬৭ জনক কট বিহাইণ্ড কৰে । দুজনক ষ্টাম্পিং ।বাওঁহতীয়া বেটছমেন পণ্টৰ প্ৰিয় শ্বট পুল । ক্ৰিকেট খেলুৱৈৰ লগতে পণ্ট এজন দক্ষ জিমনাষ্ট ।ব্যক্তিগত জীৱনতো লুক-ঢাক নাই পণ্টৰ ।
প্ৰেমিকা ঈশা নেগিৰ স’তে কটোৱা সময়ৰ ছবি মাজে- সময়ে ছ’চিয়েল মিডিয়াত ছেয়াৰ কৰে তেওঁ । বিগত বৰ্ষত জানুৱাৰীত ঈশাৰ স’তে পাহাৰত বৰফৰ মাজত ছুটি কটোৱাৰ ছবি প’ষ্ট কৰিছিল তেওঁ । প’ষ্টত লিখে ‘তুমি কাষত থাকিলে, নিজকে অধিক ভাল লাগে ।’ইয়াৰ পূৰ্বে জনপ্ৰিয় অভিনেত্ৰী উৰ্বশীৰ স’তেও পণ্টৰ সম্পৰ্কৰ কথা শুনা গৈছিল । দুয়োকে একেলগে নৈশ ভোজনটো দেখা গৈছিল ।কেৰিয়াৰত সাফল্যৰ লগতে ব্যৰ্থতাৰো সন্মুখীন হয় পণ্ট ।
তেওঁৰ কিপিঙক লৈ প্ৰশ্ন উত্থাপন হৈছে । ঋদ্ধিমান সাহা আৰু লোকেশ ৰাহুলৰ স’তে তুলনা কৰিয়ে তেওঁক দলত স্থান দিয়া হয় ।ক্ৰিকেট মহলৰ মতে, কিপিঙত ঋদ্ধিমান আগুৱাই থাকিলেও বেটিঙত পিছ পেলাইছে পণ্টে । অষ্ট্ৰেলিয়াত গাব্বা টেষ্টৰ অন্তিম দিনা তেওঁ অপৰাজিত ৮৯ জয়ৰ অন্যতম অনুঘটক । ফলত ঋদ্ধিমানৰ বাবে প্ৰতিযোগিতা অধিক কঠিন হৈ পৰিল ।বহুবাৰ ব্যৰ্থতাৰ সন্মুখীন হোৱা পণ্টে কয় যে, জাতীয় দলৰ স্থান সদায়েই কণ্টকাপূৰ্ণ । ৰোহিত শৰ্মাৰ স’তে পণ্টৰ অন্তৰংগ ভাল দেখা যায় ।