গণৰাজ্য দিৱসত কৃষকসকলৰ ট্ৰেক্টৰ ৰেলীক লৈ দিল্লীত যি হিংসাত্মক ঘটনা সংঘটিত হৈছে সেই সন্দৰ্ভত ১৫ টা গোচৰ ৰুজু কৰা হৈছে । এই ঘটনাত ৮৬ জন আৰক্ষী আহত হৈছে । লগতে আঠখন বাছ আৰু ১৭খন ব্যক্তিগত বাহন ক্ষতিগ্ৰস্ত হৈছে বুলিও জনায় আৰক্ষীয়ে ।
কৃষি আইন বাতিলৰ দাবীত বিগত বৰ্ষৰ নৱেম্বৰৰ শেষৰফালৰ পৰাই হেজাৰ হেজাৰ কৃষকে দিল্লী সীমান্তত প্ৰতিবাদ সাব্যস্ত কৰি আছে । ইমান দিনে তেওঁলোকে শান্তিপূৰ্ণ প্ৰতিবাদ কৰি আহিছিল । ৰাজধানীৰ কোন পথেদি ৰেলী যাব সেই বিষয়েও আৰক্ষীৰ স’তে কৃষক সংগঠনৰ নেতাসকলৰ আলোচনা হৈ গৈছিল । ট্ৰেক্টৰ লৈ লালকিল্লা যোৱাৰ অভিপ্ৰায় নাই বুলি পূৰ্বেই জনাইছিল ৰাজনৈতিক নেতাসকলে । কিন্তু গণৰাজ্য দিৱসত ট্ৰেক্টৰ পথত নমাৰ লগে লগেই পৰিস্থিতি পৰিৱৰ্তন হৈ পৰে ।
বিভিন্ন ঠাইত বেৰিকেড ভঙাক লৈ আৰক্ষীৰ স’তে কৃষকসকলৰ সংঘৰ্ষ হয় । প্ৰতিবাদী কৃষকসকলক নিয়ন্ত্ৰণ কৰিবলৈ ক্ৰন্দন গেছ নিক্ষেপ আৰু লাঠি চালনা কৰা হয় । ইয়াৰ পাছতেই প্ৰতিবাদকাৰীসল আক্ৰামণাত্মক হৈ পৰে আৰু প্ৰতিবাদকাৰীৰ এটা দল লালকিল্লাটো উপস্থিত হয় । পৰিস্থিতি নিয়ন্ত্ৰণৰ বাহিৰ হৈ যোৱাৰ বাবে প্ৰতিবাদকাৰীসকলক সীমান্তত উভতি যাবৰ বাবে ৰাজনৈতিক নেতাসকলে বহুবাৰ অনুৰোধ কৰে । পাঞ্জাৱৰ মুখ্যমন্ত্ৰী অমৰিন্দৰ সিঙেও প্ৰতিবাদকাৰীসকলক সংযত হৈ সীমান্তত উভতি যাবৰ বাবে কয় । ভুল আচৰণ কৰি ইমান দিনৰ যুঁজক ব্যৰ্থ নকৰিবলৈ আহ্বান জনায় যোগেন্দ্ৰ যাদৱেও ।
আৰক্ষীয়ে জনায় যে, ট্ৰেক্টৰ ৰেলীত অংশগ্ৰহণ কৰা বহু কৃষকৰ হাতত তলোৱাৰ, কৃপাণৰ দৰে চোকা অস্ত্ৰ আছিল । বেৰিকেড ভঙাৰ সময়ত সেয়া আৰক্ষীলৈ বুলি তোৱাও পৰিলক্ষিত হয় । এই সকলোবোৰ ঘটনাক লৈয়ে ১৫ টা গোচৰ ৰুজু কৰা হৈছে । কালিৰ এই ঘটনাৰ পাছতেই দিল্লীৰ বিভিন্ন অঞ্চলত কটকটীয়া আৰক্ষী বাহিনী মোতায়েন কৰা হৈছে । পৰিস্থিতি নিয়ন্ত্ৰণ কৰিব নোৱাৰাৰ বাবে বহুতে দিল্লী আৰক্ষীৰ ওপৰত প্ৰশ্ন উত্থাপন কৰিছে ।