আজি গুৱাহাটীত অসম চৰকাৰৰ সৰ্ববৃহৎ শিক্ষক নিযুক্তি অনুষ্ঠান অনুষ্ঠিত হয় । মুখ্যমন্ত্ৰী সৰ্বানন্দ সোণোৱালে অনুষ্ঠানত উপস্থিত থাকি নিযুক্তি পত্ৰ প্ৰদান কৰে ।
অনুষ্ঠানত উপস্থিত সকলোকে সম্বোধন জনাই ধন্যবাদ দি মুখ্যমন্ত্ৰীগৰাকীয়ে বক্তব্যত কয়, ‘ইতিমধ্যে স্বাস্থ্যমন্ত্ৰী ড° হিমন্ত বিশ্ব শৰ্মাই বিতংভাৱে অসম চৰকাৰে যোৱা চাৰে চাৰি বছৰত শিক্ষা বিভাগত কেনেধৰণে যুগান্তকাৰী পদক্ষেপ গ্ৰহণ কৰি যুৱ প্ৰজন্মক শিক্ষাৰ ক্ষেত্ৰত শক্তিশালী কৰাৰ প্ৰয়াস কৰিছে । সমান্তৰালভাৱে শিক্ষক-শিক্ষয়িত্ৰীৰ মৌলিক সমস্যা আঁতৰ কৰাৰ ক্ষেত্ৰত কেনেধৰণে বিভিন্ন সিদ্ধান্ত গ্ৰহণ কৰিছে এই সকলো কথা আপোনালোকক বিতংভাৱে অৱগত কৰিছে ।’
মুখ্যমন্ত্ৰী সোণোৱালে আনন্দ প্ৰকাশ কৰি কয়, ‘মই আজি এই মুহূৰ্তত এটি কথাত অত্যন্ত আনন্দিত যোৱা বছৰ ১৫ আগষ্টত মই এটি ঘোষণা দিছিলো অসমৰ ৰাইজৰ জ্ঞাতাৰ্থে অসমৰ বৰাক, ব্ৰহ্মপুত্ৰৰ পাহাৰ-ভৈয়ামত বসবাস কৰা বৃহত্তৰ অসমীয়া সমাজখনৰ বাবে মই এটি বাৰ্তা প্ৰেৰণ কৰিছিলো আগন্তুক দিনত আমি ৫০ হেজাৰ নিযুক্তি প্ৰদান কৰিম । সেয়ে মোৰ সতীৰ্থ ড° শৰ্মাই দিনে-নিশাই নিষ্ঠাৰে পৰিশ্ৰম কৰি মন্ত্ৰী ড° ভৱেশ কলিতা আৰু বিষয়া-কৰ্মচাৰীৰ স’তে মিলি আজিৰ দিনটোক বাস্তৱায়িত ৰূপ দিলে ।’
প্ৰধানমন্ত্ৰী নৰেন্দ্ৰ মোদীৰ আত্মনিৰ্ভৰশীল ভাৰতৰ কথা উল্লেখ কৰি মুখ্যমন্ত্ৰী সোণোৱালে কয়, ‘আত্মনিৰ্ভৰ ভাৰত নিৰ্মাণ কৰিবৰ হ’লে প্ৰথমে আমি আত্মনিৰ্ভৰ অসম নিৰ্মাণ কৰিব লাগিব । আত্মনিৰ্ভৰ ভাৰত নিৰ্মাণ কৰিবৰ বাবে দক্ষতা সম্পন্ন ভৱিষ্যত গঢ় দিব লাগিব । এই দক্ষতা সম্পন্ন ভৱিষ্যত গঢ় দিব শিক্ষকসকলে ।’
তেওঁ লগতে কয় যে, পূৰ্বতে আন্তৰ্জাতিক পৰ্যায়ত ভাৰতৰ উত্তৰ-পূৰ্বাঞ্চল বুলি ক’লে হত্যা, হিংসা আদি প্ৰতিচ্ছবি দাঙি ধৰা হৈছিল । এটা ঋণাত্মক প্ৰতিচ্ছবি দাঙি ধৰা হৈছিল । ফলত কোনো বিনিয়োগকাৰীয়ে উদ্যোগ প্ৰতিষ্ঠা কৰিবৰ বাবে আগ্ৰহ প্ৰকাশ কৰা নাছিল । কিন্তু প্ৰধানমন্ত্ৰী মোদীৰ পৰামৰ্শ মৰ্মে গুৱাহাটীত আন্তৰ্জাতিক বিনিয়োগ মেলা অনুষ্ঠিত কৰা হ’ল আৰু ২৪০ খন বুজা-বুজি চুক্তি স্বাক্ষৰ কৰা হ’ল । এই চুক্তিৰ জৰিয়তে আমি ৭৯ হেজাৰ কোটি টকা বিনিয়োগ কৰিবলৈ সক্ষম হ’লো ।
At the ceremonial distribution of appointment letters to teachers at Sarusajai, Guwahati. https://t.co/ZWSBkxFNiR
— Sarbananda Sonowal (Modi Ka Parivar) (@sarbanandsonwal) February 5, 2021
অনুষ্ঠানখনত স্বাস্থ্যমন্ত্ৰী ড° হিমন্ত বিশ্ব শৰ্মা, শিক্ষা বিভাগৰ ৰাজ্যিক মন্ত্ৰী ভৱেশ কলিতা, শিক্ষা বিভাগৰ প্ৰধান সচিব কল্যাণ চক্ৰৱৰ্তী, আয়ুক্তা সচিব প্ৰীতম শইকীয়া আদিকে ধৰি বিভিন্ন বিষয়া-কৰ্মচাৰী আৰু শিক্ষক-শিক্ষয়িত্ৰীসকল উপস্থিত থাকে ।