দুবাৰকৈ ধাৰাবাহিকভাৱে এআইইউডিএফ দলৰ পৰা প্ৰতিদ্বন্দিতা কৰি অসম বিধানসভালৈ নিৰ্বাচিত হোৱা ভৱানীপুৰ বিধানসভা সমষ্টিৰ বিধায়ক আবুল কালাম আজাদে আজি তিনি সহস্ৰাধিক দলীয় নেতা কৰ্মী সমৰ্থকক লৈ আনুষ্ঠানিকভাৱে এআইইউডিএফ দল ত্যাগ কৰে।
উল্লেখ্য যে ভৱানীপুৰ বিধানসভা সমষ্টিত এইবাৰ মহাজোটৰ তথা এআইইউডিএফ দলৰ প্ৰাৰ্থিত্বৰ পৰা বিধায়ক আবুল কালাম আজাদক বঞ্চিত কৰিছে।যাৰ প্ৰত্যুত্তৰত বিধায়ক গৰাকী তথা তেওঁৰ সমৰ্থকৰ উদ্যোগত শুকমানাহত অনুষ্ঠিত কৰা গণ সমাবেশত এআইইউডিএফ দল ত্যাগ কৰি ৰাজহুৱা সিদ্ধান্তমৰ্মে ভৱানীপুৰ বিধানসভা সমষ্টিত নিৰ্দলীয় প্ৰাৰ্থী হিচাপে প্ৰতিদ্বন্দিতা কৰিব বিধায়ক আবুল কালাম আজাদে।
শুকমানাহৰ পল্লাৰপাৰ উচ্চতৰ মাধ্যমিক বিদ্যালয় খেল পথাৰত এআইইউডিএফ দলৰ নেতা চানুৱাৰ হুছেইন মণ্ডলৰ সভাপতিত্বত অনুষ্ঠিত গণ সমাবেশত বিধায়ক আবুল কালাম আজাদে তেওঁৰ আবেগিক আৰু উদাত্ত ভাষণত কয় যে -” এআইইউডিএফ দলত এতিয়া কোনো নীতি,আদৰ্শ, ন্যায় নাই।য’ত ন্যায় নাই তত ফাচিৰ হুকুম আহিব পাৰে।
কিছুমান ছদ্মবেশী দালালে ধ্বংস কৰিছে এআইইউডিএফ দল। দলীয় প্ৰাৰ্থিত্বৰ বাবদ দলটোৰ ব্লক, জিলা, কেন্দ্ৰীয় সমিতিৰ বিষয়ববীয়াক দিব লাগে বৃহৎ ধনৰ টোপোলা। ভৱানীপুৰ বিধানসভা সমষ্টিতো ফণী তালুকদাৰক ডাঙৰ টোপোলাৰ বিনিময়তহে এআইইউডিএফ দলে প্ৰাৰ্থিত্ব দিছে।কাৰণ প্ৰাৰ্থিত্ব লাভ কৰাৰ এঘণ্টা আগলৈকে ফণী তালুকদাৰে এআইইউডিএফ দলৰ প্ৰাথমিক সদস্যও নাছিল।
সেয়েহে ফণী তালুকদাৰৰ এআইইউডিএফ দলৰ টিকটতো পৃথিৱীৰ অষ্টমটো আচৰিত বস্তু “। বিধায়ক আবুল কালাম আজাদে তেওঁৰ ভাষণত নিৰ্বাচনত নিৰ্দলীয় প্ৰাৰ্থীৰূপে বিজয়ী নিশ্চিত বুলিও দাবী কৰি তেওঁ পুনৰ কয় ফকীৰ মৌলানা বদৰুদ্দিন আজমলক এগৰাকী সৎ ব্যক্তি বুলি ভাবিছিলো কিন্তু এগৰাকী সৎ ব্যক্তিয়ে এনেধৰণৰ কাম কি দৰে কৰিব পাৰে বুলি বিধায়ক কালামে প্ৰশ্ন উত্থাপন কৰাৰ লগতে বদৰুদ্দিন আজমল কোনো ৰাজনৈতিক ব্যক্তি নহয় তেওঁ এগৰাকী প্ৰকৃতাৰ্থত বেপাৰীহে, দলৰ প্ৰাৰ্থীত্ব প্ৰদানৰ নামতো তেওঁ এখন বেপাৰহে কৰিলে বুলি বিধায়ক আবুল কালাম আজাদে মন্তব্য কৰে ।
গণ সমাবেশত এআইইউডিএফ দলৰ নেতা বাক্কেছ আলী,মনতাজ আলী আহমেদেও বক্তৃতা প্ৰদান কৰে। উল্লেখ্য যে আজিৰ গণ সমাবেশত উপস্থিত হেজাৰ হেজাৰজনে বদৰুদ্দিন আজমল, এআইইউডিএফ দলৰ বিৰুদ্ধে তীব্ৰ ক্ষোভ উজাৰি বিভিন্ন আক্ৰমণাত্মক শ্লোগানেৰে উত্তাল কৰি তোলে।