কৰ’না যুদ্ধত সক্ৰিয় বৰ্ষিয়ান অভিনেতা অমিতাভ বচ্চন । এই মাৰাত্মক ভাইৰাছৰ বিৰুদ্ধে যুঁজ দিবৰ বাবে বিভিন্ন ধৰণে সহায় কৰিছে অভিনেতাজনে ।
পোলেণ্ডৰ পৰা ৫০ টা অক্সিজেন কনছেনট্ৰেটৰ অনাৰ ব্যৱস্থা কৰিছে বিগ বিয়ে । নিজৰ ব্লগত এই তথ্য জনায় অভিনেতাজনে । তেওঁ জনায়, পোলেণ্ডৰ কনছালে তেওঁক ব্যক্তিগত ব্যৱহাৰৰ বাবে এটা অক্সিজেন কনছেনট্ৰেটৰ দিব বিচাৰিছিল । কিন্তু সেই প্ৰস্তাৱ তৎক্ষণাৎ নাকচ কৰে অভিনেতাজনে ।
তেওঁ ভাৰতত অক্সিজেনৰ নাটনিৰ ফলত চিকিৎসাত ব্যাঘাত ঘটা প্ৰতিষ্ঠানসমূহত অক্সিজেন কনছেনট্ৰেটৰ অনাৰ ইচ্ছা প্ৰকাশ কৰে । অভিনেতাৰ কথা শুনি তেওঁ পোলেণ্ডৰ এটা কোম্পানীৰ বিষয়ে জনায় । সেই কোম্পানীটোত অক্সিজেন কনছেনট্ৰেটৰ প্ৰস্তুত কৰা হয় । কোম্পানীটোৰ সন্ধান পোৱাৰ লগে লগে ৫০ টা কনছেনট্ৰেটৰ ক্ৰয় কৰাৰ ব্যৱস্থা কৰে অভিনেতাজনে ।
তদুপৰি ২০ টা ভেণ্টিলেটৰো ক্ৰয় কৰাৰ ব্যৱস্থা কৰিছে অমিতাভে । ইয়াৰে ১০ টকা ইতিমধ্যে বৃহন্মুম্বাই মিউনিচিপাল কৰ্প’ৰেছন আৰু কিছুসংখ্যক হাস্পতালত প্ৰেৰণ কৰা হৈছে । বাকী ১০ টা যন্ত্ৰ চলিত মাহৰ শেষৰফালে আহিব বুলি আশাপ্ৰদ অমিতাভ ।