অতিমাৰীত জৰ্জৰিত দেশৰ সেৱা কৰিবৰ বাবে নিউয়ৰ্কৰ জীৱন ত্যাগ কৰি নিজ চহৰত উভতিল চিকিৎসক হৰমনদ্বীপ সিং ব’পাৰাই । সম্প্ৰতি তেওঁ অমৃতসৰত ক’ভিড ৰোগীসকলক সুস্থ কৰিবৰ বাবে আপ্ৰাণ চেষ্টা চলাইছে ।
অমৃতসৰৰ এখন হাস্পতালৰ সকলো চিকিৎসক আৰু নাৰ্ছসকলক পৃথককৈ প্ৰশিক্ষণ দি ক’ভিড ৰোগীসকলৰ চিকিৎসা কৰিছে । চলিত বৰ্ষৰ এক এপ্ৰিলত তেওঁ দেশলৈ উভতি আহে । তাৰ পাছৰ পৰাই সেৱামূলক কাম কৰি গৈছে । তেওঁৰ পৰৱৰ্তী লক্ষ্য মুম্বাইত এহেজাৰ বিছনাযুক্ত হাস্পতাল নিৰ্মাণ কৰা । ইয়াৰ বাবে ইতিমধ্যে তেওঁ বিভিন্ন চিকিৎসকৰ স’তে যোগাযোগ কৰিছে । আজি তেওঁ মুম্বাইলৈ ৰাওনা হ’ব ।
তেওঁ অমৃতসৰৰে বাসিন্দা । ২০১১ত হৰমনদ্বীপে অমৃতসৰৰ চৰকাৰী মেডিকেল কলেজ হাস্পতালৰ পৰা এমবিএছ উত্তীৰ্ণ হয় ।
ইয়াৰ পাছৰ পৰাই তেওঁ নিউয়ৰ্কত থাকিবলৈ লয় । সৰুৰ পৰা সেৱামূলক মনোভাৱ লৈয়ে ডাঙৰ হৈছে হৰমনদ্বীপে । তেওঁৰ পিতৃ-মাতৃ দুয়োগৰাকীয়ে চিকিৎসক । মাতৃ স্ত্ৰী ৰোগ বিশেষজ্ঞ আছিল আৰু পিতৃ অস্থি বিশেষজ্ঞ । হৰমনদ্বীপ এনিষ্ঠেচিঅ’লজিষ্ট আৰু ক্ৰিটিকেল কেয়াৰ বিশেষজ্ঞ । ২০১১ত তেওঁৰ মাতৃৰ বিয়োগ ঘটে । মাতৃৰ পৰাই তেওঁৰ সেৱামূলক মনোভাৱ সৃষ্টি হৈছে বুলি জনায় তেওঁ ।