বাগ্সা জিলাৰ শালবাৰী মহকুমাৰ ছলিকান্দাত আজি বাগ্সা জিলা আমছুৰ উদ্যোগত অনুষ্টুপীয়াকৈ ৪১ সংখ্যক ছহীদ দিৱস পালন কৰা হয় ৷ ক’ভিডৰ নীতি-নিৰ্দেশনা মানি সীমিত সংখ্যক আমছু কৰ্মীৰে ছলিকান্দা বজাৰত পুৱা ন বজাত পতাকা উত্তোলনেৰে ছহীদ দিৱস পালন কৰে ৷
ছহীদ দিৱসত উপস্থিত থাকি আমছুৰ বাগ্সা জিলা সমিতিৰ সভাপতি ছাইফুল ইছলাম খানে কয় যে, সংখ্যালঘুসকলক সংবিধান প্ৰদত্ত অধিকাৰ নিদিলে পুনৰ বাঘৰ দৰে ৰাজপথত গণতান্ত্ৰিক আন্দোলন গঢ়ি তুলিব আমছুৱে ৷ তেওঁ কয় যে, ১৯৮০ৰ ২৬ মে’ৰ দিনটোত সংখ্যালঘুসকলৰ বিভিন্ন দাবীলৈ গণতান্ত্ৰিক পদ্ধতিৰে প্ৰতিবাদ সাব্যস্ত কৰিবলৈ ৰাজপথলৈ ওলাই আহিছিল হেজাৰ হেজাৰ সংখ্যালঘু জনতা । সেই আন্দোলনৰ অংশ হিচাপে অসমৰ বিভিন্ন প্ৰান্তত বহুতো সংখ্যালঘু মানুহে পুলিচৰ গুলীত মৃত্যুবৰণ কৰিবলগীয়া হৈছিল । সেই ছহীদসকলৰ স্মৃতিত আমছুৱে প্ৰতি বছৰে ২৬ মে’ৰ দিনটো ছহীদ দিৱস হিচাপে পালন কৰি আহিছে ৷
আজিৰ কাৰ্যসূচীত আমছুৰ কেন্দ্ৰীয় সমিতিৰ উপ সভাপতি শাকিল আহমেদ, বাগ্সা জিলা সম্পাদক ছাহাদত হুছেইন তালুকদাৰ, আব্দুল ৰহিমকে ধৰি কে’বাজনো আমছুৰ নেতাকৰ্মী উপস্থিত থাকে ৷
