শেহতীয়াকৈ উত্তৰপ্ৰদেশ আৰু বিহাৰৰ গংগাত ক’ভিড ৰোগীৰ মৃতদেহ বৈ যোৱা ফটো আৰু ভিডিঅ’ ভাইৰেল হৈছিল সামাজিক মাধ্যমত । ঘটনাটোক লৈ সমগ্ৰ দেশতে বিতৰ্কৰ সৃষ্টি হৈছিল । এইবাৰ ইয়াতকৈও ভয়াবহ ফটো ধৰা পৰিল যোগী ৰাজ্যত । নদীত পেলায় দিয়া হৈছে এজন ক’ভিড ৰোগীৰ মৃতদেহ ।
তথ্য অনুসৰি, যোৱা শুকুৰবাৰে উত্তৰপ্ৰদেশৰ বলৰামপুৰ জিলাত ঘটনাটো সংঘটিত হয় । প্ৰকাশ্যত অহা ভিডিঅ’ত দেখা গৈছে, দলঙৰ পৰা ৰাপ্তি নদীত দুজন লোকে মৃতদেহ পেলাইছে । তেওঁলোকৰ এজনে পিপিই কিট পৰিধান কৰিছে । সেই দলঙেৰে গৈ থাকোঁতে দুজন লোকে দৃশ্যটো কেমেৰাত বন্দী কৰে । ইয়াৰ পাছতেই ভিডিঅ’টো ভাইৰেল হৈ পৰে ।
দেহটো ক’ভিড আক্ৰান্তৰেই বুলি নিশ্চিত কৰে বলৰামপুৰৰ মুখ্য স্বাস্থ্য বিষয়াই । এই ঘটনাৰ স’তে জড়িতসকলৰ ভিতৰত এজন মৃতকৰ পৰিয়ালৰ সদস্য । প্ৰাথমিক তদন্ত অনুসৰি, ২৫ মে’ত কৰ’না ৰোগীজনক চিকিৎসালয়ত ভৰ্তি কৰোৱা হৈছিল । যোৱা ২৮ মে’ত তেওঁৰ মৃত্যু হয় । মুখ্য স্বাস্থ্য বিষয়া ভিবি সিঙে জনায়, অভিযুক্ত পৰিয়ালৰ সদস্যৰ বিৰুদ্ধে কঠোৰ ব্যৱস্থা গ্ৰহণ কৰা হ’ব ।