কৰ’না চিকিৎসাৰ বাবে অতিৰিক্ত ধন লোৱা আৰু চূড়ান্ত অব্যৱস্থাৰ অভিযোগত ১০ খন হাস্পতালৰ লাইচেন্স বাতিল কৰে চৰকাৰে ।
প্ৰশাসনৰ সূত্ৰ অনুসৰি, ৰাজ্যৰ বহু কেইখন হাস্পতালে ক’ভিড চিকিৎসাৰ বাবে অতিৰিক্ত টকা আদায় কৰাৰ অভিযোগ উত্থাপন হৈছিল । একেই বিষয়ৰ ১১৫ টা অভিযোগ দাখিল হয় স্বাস্থ্য বিভাগত । শনিবাৰে স্বাস্থ্য আৰু জনকল্যাণ বিভাগৰ পৰা ৭৯ খন হাস্পতালত জাননী প্ৰেৰণ কৰা হয় । ইয়াৰ পাছতেই ১০ খন হাস্পতালৰ বিৰুদ্ধে কঠোৰ পদক্ষেপ গ্ৰহণ কৰে স্বাস্থ্য বিভাগে ।
স্বাস্থ্য বিভাগৰ সূত্ৰ অনুসৰি, এই ১০ খন হাস্পতালৰ বিৰুদ্ধেই আটাইতকৈ বেছি অভিযোগ ৰুজো হৈছে । এই কেইখনৰ ভিতৰৰ এখন হাস্পতালৰ এই পৰ্যন্ত দুবাৰ লাইচেন্স বাতিল কৰা হৈছে ।
ৰাজ্যত ক’ভিড পৰিস্থিতিৰ প্ৰতি লক্ষ্য ৰাখি তেলেংগানা চৰকাৰে হাস্পতালসমূহক নিৰ্দিষ্ট খৰচ বান্ধি দিছে । অভিযোগ, চৰকাৰৰ নিৰ্দেশ অৱমাননা কৰি বহু হাস্পতালে ৰোগীৰ পৰিয়ালৰ পৰা অধিক ধন আদায় কৰিছে । লগতে, চিকিৎসালয়বোৰৰ সেৱাক লৈও অভিযোগ উত্থাপন কৰিছে ৰোগীৰ পৰিয়ালবৰ্গই ।