বগা হৰিণ ওলাইছে কাজিৰঙা ৰাষ্ট্ৰীয় উদ্যানত৷ আশ্চৰ্য্যৰ সমাহাৰ কাজিৰঙা ৰাষ্ট্ৰীয় উদ্যানত এইবাৰ পোহৰলৈ আহিছে আন এক আশ্চৰ্য্য৷ ৰাষ্ট্ৰীয় উদ্যানখনৰ অন্তঃভাগত পৰিলক্ষিত হৈছে সম্পূৰ্ণ বগা ৰঙৰ বিৰল হৰিণা ৷ ইয়াৰ লগে লগে ৰাষ্ট্ৰীয় উদ্যানৰ এই নতুন প্ৰাণীকূলক লৈ আৰু অধিক উৎসুকতা বাঢ়িছে প্ৰকৃতিপ্ৰেমীৰ মনত ৷
ৰাষ্ট্ৰীয় উদ্যানখনৰ বুঢ়াপাহাৰ বনাঞ্চলৰ সমীপৰ আমগুৰি চাহ বাগিচাৰ বাৰ নম্বৰ লাইনৰ কাষৰীয়া বনভুমিত আন আন হৰিণাৰ জাকৰ মাজতে আপোনমনে চৰি থকা পৰিলক্ষিত হৈছে এটি শুদ্ধ বগা হৰিণ ৷ কিছুদিন পূ্ৰ্বে কাজিৰঙাত বগা বাঘৰ উপস্থিতিয়ে সমগ্ৰ বিশ্বৰ প্ৰকৃতিপ্ৰেমীৰ মাজত খলকনি তোলাৰ পাছতে এইবাৰ আকৌ বগা হৰিণাৰ উপস্থিতিয়ে প্ৰাণীজগতৰ এক নতুন দিশ উন্মোচিত কৰিছে ৰাষ্ট্ৰীয় উদ্যানখনত ৷
ৰাষ্ট্ৰীয় উদ্যানখনৰ সমীপৱৰ্তী একাংশ লোকে এই বগা হৰিণ প্ৰত্যক্ষ কৰাৰ পাছতে সেই স্থানত উপস্থিত হোৱাত দেখাপোৱা গৈছিল শুদ্ধ বগা বৰণৰ এটি হৰিণ ৷ আন হৰিণৰ জাকৰ মাজতে সন্তপৰ্ণে আৰু আপোন মনে ঘাঁহ খাই চৰি আছিল শুদ্ধ বগা বৰণৰ হৰিণটো ৷ কিন্তু মানুহৰ উপস্থিতিৰ উমান পায়েই ই ঢাপলি মেলিছিল ঘন অৰণ্যৰ মাজলৈ ৷
আমগুৰি চাহ বাগিচাৰ সমীপৰ ঘাঁহনিৰ মাজত কালি আবেলিৰ সময়ত এই বগা হৰিণ দেখাৰ পাছতে মনলৈ প্ৰশ্ন আহিছে যে, এয়া হৰিণৰ কোনো নতুন অথবা লুপ্তপ্ৰায় প্ৰজাতি নেকি ! নে বংশগতিৰ চৰম পৰিবৰ্তন ? নাইবা কোনো জেনেটিক বৈষম্যৰ ফলতেই বগা বৰণৰ হৈ পৰিছে নেকি এই হৰিণ ? আৰু এই সকলো প্ৰশ্ন যদি অসত্য প্ৰমাণিত কৰি কাজিৰঙাত বিৰল প্ৰজাতিৰ বগা হৰিণৰ উপস্থিতি ধৰা পৰে বা প্ৰমাণিত হয় তেন্তে ই হ’ব এক বিৰল ঘটনা তথা ৰাষ্ট্ৰীয় উদ্যান তথা বিশ্বৰ প্ৰকৃতিপ্ৰেমী তথা বন্যপ্ৰাণীপ্ৰেমীৰ বাবেই ইতিবাচক সু-খবৰ ৷ ইয়াৰ লগেলগে ৰাষ্ট্ৰীয় উদ্যানখনৰ বন্যপ্ৰাণীৰ তালিকাত সংযোজিত হ’ব ‘বগা হৰিণ’ নামৰ এক নতুন প্ৰজাতিৰ হৰিণৰ নাম ৷
বিশ্বৰ প্ৰাণীজগত তথা প্ৰাণীবিজ্ঞানৰ তালিকাতো হয়তো ই হ’ব নৱতম সংযোজন৷ কিন্তু ইয়াৰ বাবে প্ৰয়োজন হ’ব সঠিক দিশৰ অনুসন্ধান আৰু অধ্যয়নৰ ৷ এইখিনিতে উল্লেখ কৰিব পাৰি যে ২০১০ চনৰ সময়তে ৰাষ্ট্ৰীয় উদ্যানখনত কম সময়ৰ বাবে প্ৰত্যক্ষ কৰিছিল বুলি কৈছিল এই বিৰল বগা হৰিণ ৷ কিছু বছৰ পূৰ্বে আমগুৰি অঞ্চলৰে কিছু নিলগত একাংশ লোকে আন এটা বগা হৰিণ দেখাৰ কথাও প্ৰকাশ কৰিছে এই প্ৰতিবেদকৰ সন্মুখত ৷ অৱশ্যে কোনো ফটো তুলিব পৰা নাছিল সেই সময়ত ৷
লোকসমাজৰ এক জনশ্ৰুতি মতে, যিসকল লোকে এই বগা হৰিণ দেখা পায় সেইসকলৰ ভাগ্য সুপ্ৰসন্ন হোৱাৰ লগতে জীৱনে এক ইতিবাচক গতি লাভ কৰে৷ বগা হৰিণ হেনো ভাগ্য উদয়ৰ প্ৰতীক ৷ এয়া অৱশ্যে এক মুখবাগৰা সাধুকথাহে ৷ বগা হৰিণক লৈ কাজিৰঙাৰ দাঁতিকাষৰীয়া জনসাধাৰণৰ মাজত আছে বহু লোককথাও ৷ কিন্তু এতিয়া সঁচাকৈয়ে এই বগা হৰিণৰ উপস্থিতিয়ে কাজিৰঙালৈ ভাগ্য উদয়ৰ ইংগিত দিয়াৰ বিশ্বাসো গঢ় লৈ উঠিছে বগা হৰিণৰ উপস্থিতিৰ কথা প্ৰকাশ পোৱাৰ লগে লগেই ৷
প্ৰাণীবিজ্ঞানীসকলৰ মতে, বহু সময়ত বিভিন্ন কাৰণত জীন বা বংশগতিৰ পৰিৱৰ্তন বা আগতি জীনৰ বাবেও এই বৰণ হ’ব পাৰে হৰিণকে ধৰি আন আন বন্যপ্ৰাণীৰ ৷ অৱশ্যে জীৱ জগতৰ নৱতম সংযোজনৰ কথাটোও একে আষাৰে নুই কৰিব নোৱাৰি ৷ প্ৰাণীবিজ্ঞানীসকলৰ ভাষাত ALBINO বা শ্বেত চৰ্মৰ প্ৰাণী বুলিও অভিহিত কৰিব পাৰি কাজিৰঙা ৰাষ্ট্ৰীয় উদ্যানত পৰিলক্ষিত এই বগা হৰিণক ৷
ৰাষ্ট্ৰীয় উদ্যানখনৰ দাঁতিকাষৰীয়া ৰতন ভুমিজে প্ৰকাশ কৰা অনুসৰি, সেই অঞ্চলত প্ৰথমবাৰৰ বাবে দেখা পাইছে এই হৰিণাবিধ ৷ যাক লৈ এতিয়া উৎসুকতা বাহিছে সকলোৰে মনত ৷ বংশগতি, জীনৰ পৰিৱৰ্তন বা আগতি জীনৰ উপস্থিতি যি কাৰণেই নহওক কিন্তু এতিয়া এই বগা হৰিণা বা শ্বেত হৰিণাক লৈ উৎসাহ আৰু উৎসুকতা বাঢ়িছে প্ৰকৃতিপ্ৰেমীৰ মনত ৷ জীৱবিজ্ঞানৰ তালিকাত যদি এই ‘বগা হৰিণ’ নৱতম সংযোজন হিচাপে প্ৰমাণিত হয় তেন্তে কাজিৰঙা ৰাষ্ট্ৰীয় উদ্যানৰ বাবেও ই হ’ব এক সৌভাগ্যৰ বিষয় ৷