জিলা অভিভাৱক মন্ত্ৰী ৰূপে উপায়ুক্ত কাৰ্যালয়ত জিলা প্ৰশাসনেৰে বৈঠক, খতিয়ান ল’লে উন্নয়নমূলক কামকাজ-ক’ভিড পৰিস্থিতিৰ, মৰিগাঁও অসামৰিক চিকিৎসালয়-ঝাৰগাঁও প্ৰাথমিক স্বাস্থ্য কেন্দ্ৰ পৰিদৰ্শন
ৰাজ্যৰ কেবিনেটে অৰ্পণ কৰা মৰিগাঁও জিলাৰ অভিভাৱক মন্ত্ৰীৰ দায়িত্ব লোৱাৰ পাছত আজি প্ৰথমবাৰলৈ মৰিগাঁৱত উপস্থিত হৈ জিলাখনৰ উন্নয়নমূলক কাম-কাজসমূহৰ খতিয়ান লয় স্বাস্থ্যমন্ত্ৰী কেশৱ মহন্তই।
স্বাস্থ্যমন্ত্ৰী তথা জিলাৰ অভিভাৱক মন্ত্ৰীগৰাকীয়ে জলসম্পদ তথা তথ্য আৰু জনসংযোগ বিভাগৰ মন্ত্ৰী পীযুষ হাজৰিকা আৰু মৰিগাঁৱৰ বিধায়ক ৰমাকান্ত দেউৰীক লগত লৈ দুপৰীয়া মৰিগাঁৱৰ উপায়ুক্ত কাৰ্যালয়ৰ সভাকক্ষত উপায়ুক্ত, আৰক্ষী অধীক্ষকসহ মৰিগাঁও জিলা প্ৰশাসনৰ বিষয়াবৰ্গ আৰু জিলাখনৰ বিভিন্ন বিভাগৰ মূৰব্বী বিষয়াসকলৰ স’তে এখন বৈঠকত মিলিত হৈ মৰিগাঁও জিলাৰ সামগ্ৰিক উন্নয়নৰে জৰিত বিভিন্ন দিশ সন্দৰ্ভত আলোচনা কৰে।
বৈঠকত জিলাখনৰ বান আৰু খহনীয়া সমস্যাৰ বিষয়ে বিতং আলোচনা কৰাৰ লগতে আসন্ন বাৰিষাৰ সময়ছোৱাৰ মুখামুখি হ’বলৈ জিলা প্ৰশাসনে চলোৱা প্ৰস্তুতিৰো বুজ লয় জিলাৰ অভিভাৱক মন্ত্ৰীগৰাকীয়ে।
জিলাখনত চলি থকা উন্নয়নমূলক আৰু জনকল্যাণমূলক আঁচনিসমূহৰ সঠিক ৰূপায়ণ সুনিশ্চিত কৰিবলৈ বৈঠকত উপায়ুক্তৰ লগতে বিভাগীয় মূৰব্বীসকলক মন্ত্ৰী মহন্তই নিৰ্দেশ দিয়ে। তদুপৰি, এই বৈঠকতে মৰিগাঁও জিলাৰ সামগ্ৰিক কভিড পৰিস্থিতি পৰ্যালোচনা কৰি মন্ত্ৰীগৰাকীয়ে আক্ৰান্তসকলৰ হোম আইছলেছন ব্যৱস্থা হ্ৰাস কৰিবলৈ দিহা দিয়ে।
জিলাখনত দৈনিক ক’ভিড পৰীক্ষাৰ সংখ্যা বৃদ্ধিৰ লগতে প্ৰতিষেধক প্ৰদান প্ৰক্ৰিয়া খৰতকীয়া কৰিবলৈও তেওঁ জিলাৰ উপায়ুক্ত আৰু যুটীয়া স্বাস্থ্য সেৱা সঞ্চালকক নিৰ্দেশ দিয়ে। ইফালে, আগবেলা মৰিগাঁৱত উপস্থিত হোৱাৰ পাছতে স্বাস্থ্যমন্ত্ৰী মহন্তই প্ৰথমে সতীৰ্থ মন্ত্ৰী পিয়ুষ হাজৰিকা আৰু বিধায়ক ৰমাকান্ত দেউৰীৰ স’তে মৰিগাঁও অসামৰিক চিকিৎসালয়ৰ ক’ভিড ৱাৰ্ড পৰিদৰ্শন কৰি চিকিৎসালয়খনৰ আন্তঃগাঠনি পৰ্যবেক্ষণ কৰাৰ লগতে ক’ভিড আক্রান্তসকলৰ স্বাস্থ্যৰ বুজ লয়।
চিকিৎসালয়খনত নিৰ্মাণ হৈ থকা আই চি ইউ ৱাৰ্ডো মন্ত্ৰী মহন্তই পৰিদৰ্শন কৰি নিৰ্মাণ কাৰ্যৰ অগ্ৰগতি পৰ্যবেক্ষণ কৰে। অসামৰিক চিকিৎসালয়খনত চিকিৎসাধীন ক’ভিড আক্ৰান্তসকলৰ লগত মত বিনিময় কৰি খাদ্য আৰু চিকিৎসা সেৱা লাভ কৰাৰ বিষয়েও তেওঁ খবৰ কৰে। পৰিদৰ্শনকালত ক’ভিড আক্ৰান্ত আৰু আন ৰোগী সকলে যাতে জৰুৰীকালীন চিকিৎসা সঠিক ৰূপত পায়, তাৰ প্ৰতি লক্ষ্য ৰাখিবলৈ চিকিৎসকসকলক স্বাস্থ্যমন্ত্ৰীয়ে নিৰ্দেশ দিয়ে।
আজিৰ পৰিদৰ্শন কালত ৰাজ্যৰ স্বাস্থ্য সেৱা সঞ্চালক, জিলাৰ উপায়ুক্ত তথা স্বাস্থ্য বিভাগৰ বিষয়াসকলো উপস্থিত আছিল। বিয়লি স্বাস্থ্যমন্ত্ৰী মহন্তই জিলাখনৰ ঝাৰগাওঁ খণ্ড প্ৰাথমিক স্বাস্থ্য কেন্দ্ৰটোও পৰিদৰ্শন কৰে। মন্ত্ৰীগৰাকীয়ে একেদিনাই মায়ং ৰাজহ চক্ৰৰ অন্তৰ্গত খলনী বিল গাঁৱৰ পথালী পাহাৰ চুবুৰীৰ কণ্টেইনমেণ্ট জ’নো পৰিদৰ্শন কৰি আবদ্ধ লোক সকলৰ সৈতে মত বিনিময় কৰে। মন্ত্ৰী মহন্তই ক’ণ্টেইনমেণ্ট জ’নৰ বাসিন্দাসকলে খাদ্য সামগ্ৰীকে ধৰি অন্যান্য সুবিধাসমূহ সঠিক ভাৱে লাভ কৰিছে নে নাই, সেই বিষয়ে খবৰ লয়।