উত্তৰপ্ৰদেশটো প্ৰণয়ন কৰা হ’ব দুই সন্তান নীতি । আইন অনুসৰি, কোনো ব্যক্তিৰ দুটাতকৈ বেছি সন্তান থাকিলে ৰাজ্যৰ চৰকাৰী সুযোগ লাভ নকৰিব ।
উত্তৰপ্ৰদেশৰ আইন কমিছনে এক জনসংখ্যা নিয়ন্ত্ৰণ বিলৰ খচৰা প্ৰকাশ কৰিছে । ইয়াত কোৱা হয়, দুই সন্তান নীতিৰ অৱমাননা কৰিলে চৰকাৰী প্ৰকল্পৰ সুবিধা লাভ নকৰিব । ৰেচন কাৰ্ডৰ ইউনিট চাৰিজন সদস্যৰ ভিতৰতে সীমাবদ্ধ কৰা হ’ব । দুটাতকৈ বেছি সন্তান থকা লোকে স্থানীয় ভোটটো প্ৰতিদ্বন্দিতা কৰিব নোৱাৰিব । ইয়াৰ উপৰি ৰাজ্য চৰকাৰৰ চাকৰিৰ বাবে আবেদন কৰিব নোৱাৰিব । চৰকাৰী কৰ্মচাৰীসকলে দুই সন্তান নীতি অৱলম্বন নকৰিলে পদোন্নতি লাভ নকৰিব । ইয়াৰ বিপৰীতে দুই বা তাতোকৈ কম সন্তান থকাসকলে বিভিন্ন ধৰণৰ ‘পুৰষ্কাৰ’ লাভ কৰিব ।
তাৎপৰ্যপূৰ্ণ যে, এই খচৰা বিলত পুৰুষ আৰু নাৰীৰ বন্ধ্যাকৰণ অস্ত্ৰোপচাৰত উৎসাহ দিয়া হৈছে বুলি ৰাজ্য আইন কমিছনৰ মুৰব্বী এ এন মিত্তলে জনায় । বন্ধ্যাকৰণ কৰালে পুৰস্কাৰ দিয়া হ’ব বুলিও কোৱা হৈছে বিলত ।
‘উত্তৰপ্ৰদেশ জনসংখ্যা (নিয়ন্ত্ৰণ, স্থিতিকৰণ আৰু উন্নয়ন) বিল, ২০২১’ৰ খচৰা নিজৰ ৱেবছাইটত প্ৰকাশ কৰি ১৯ জুলাইৰ ভিতৰত মতামত বিচৰিছে ৰাজ্য আইন কমিছনে । কোৱা হয়, উত্তৰপ্ৰদেশত প্ৰাকৃতিক আৰু আৰ্থিক সম্পদ সীমিত । সকলোৰে বাবে খাদ্য, পানী, বাসস্থান, বিদ্যুৎ, শিক্ষা আৰু জীৱনধাৰণৰ সুযোগৰ ন্যূনতম ব্যৱস্থা কৰা প্ৰয়োজনীয় । যথাযথ বণ্টনৰ মাধ্যমত স্থায়ী উন্নয়নৰ স্বাৰ্থত জনসংখ্যা নিয়ন্ত্ৰণ আৰু স্থিতিকৰণ প্ৰয়োজনীয় ।
খচৰা বিল অনুযায়ী, দুটা সন্তানৰ পাছত নিজৰ বা জীৱন সংগীৰ বন্ধ্যাকৰণ অস্ত্ৰোপচাৰ কৰা কৰ্মচাৰীসকলে কৰ্মজীৱনত দুবাৰ বেতন বৃদ্ধিৰ সুযোগ লাভ কৰিব । ভূমি-গৃহ ক্ৰয় কৰিবলৈ ৰাজ সাহায্য আৰু স্বল্প সুদত ঋণ লাভ কৰিব । পানী, বিদ্যুৎ বা গৃহৰ কৰ দিয়াৰ সময়ত ৰিবেট লাভ কৰিব । অতিৰিক্ত তিনি শতাংশ ইপিএফ-ৰ সুবিধা লাভ কৰিব । জীৱনসংগীৰ বাবে বিনামূলীয়া স্বাস্থ্য সেৱা বীমা থাকিব । অতিৰিক্ত চাৰিবাৰ বেতন বৃদ্ধি হ’ব ।
একমাত্ৰ সন্তানৰ বয়স ২০ বছৰ নোহোৱা পৰ্যন্ত তেওঁ বিনামূল্যে স্বাস্থ্য সেৱা আৰু বীমাৰ সুবিধা পাব । শিক্ষানুষ্ঠানত নাম ভৰ্তিৰ ক্ষেত্ৰত অগ্ৰাধিকাৰ লাভ কৰিব, স্নাতকলৈঅএ বিনামূলীয়াভাৱে পঢ়াৰ সুবিধা লাভ কৰিব । একমাত্ৰ কন্যা সন্তানে উচ্চ শিক্ষাৰ বাবে বৃত্তি লাভ কৰিব । বেচৰকাৰী কাৰ্যালয়ত সংস্থাপিত হৈ থকা সকলেও এই নীতি মানি চলিলে একেই সুবিধা লাভ কৰিব । বিৰোধীৰ একাংশই অভিযোগ কৰিছে যে, বিশেষ এক সম্প্ৰদায়ক লক্ষ্য কৰিবৰ বাবেই বিভিন্ন ৰাজ্যত জনসংখ্যা নিয়ন্ত্ৰণৰ নীতি জাপি দিছে বিজেপিয়ে ।