আইচিএছই দশম আৰু আইএছচি দ্বাদশ শ্ৰেণীৰ ফলাফল প্ৰকাশ কৰিলে চিআইএছচিই-য়ে (কাউন্সিল ফৰ দ্য ইণ্ডিয়ান স্কুল চাৰ্টিফিকেট এগজামিনেছন) । অতিমাৰী পৰিস্থিতিত অন্তৱৰ্তী মূল্যায়ন পদ্ধতি অনুসৰিয়ে চলিত বৰ্ষৰ ফল ঘোষণা কৰা হয় ।
আইচিএছই দশম শ্ৰেণীৰ পৰীক্ষাত উত্তীৰ্তাৰ হাৰ ৯৯.৯৮ শতাংশ আৰু আইএছচি দ্বাদশৰ পৰীক্ষাত উত্তীৰ্ণৰ হাৰ ৯৯.৭৬ শতাংশ । দিল্লীৰ এনচিআৰ (নেচনেল কেপিটেল ৰিজিয়ন) অঞ্চলত উত্তীৰ্ণৰ হাৰ এশ শতাংশ ।
পৰীক্ষাৰ্থীসকলে কাউন্সিলৰ ৱেবছাইট cisce.org বা results.cisce.org ৱেবছাইটত গৈ ফলাফল চাব পাৰিব । ইয়াৰ উপৰি শিক্ষাৰ্থীসকলে ০৯২৪৮-০৮২৮৮৩ এই নম্বৰত আইচিএছই অথবা আইএছচি লিখি তাৰ পাছত ইউনিক আইডি দি নিজৰ ফলাফল জানিব পাৰিব ।
ফলাফল ঘোষণা হ’লেও অতিমাৰী বৰ্ষত কোনো মেধা তালিকা প্ৰকাশ নকৰাৰ সিদ্ধান্ত গ্ৰহণ কৰিছে চিআইএছচিই-য়ে । ব’ৰ্ডৰ সম্পাদকে জনায়, যিহেতু এইবাৰ অন্তৱৰ্তী মূল্যায়ন পদ্ধতি অনুসৰি শিক্ষাৰ্থীসকলক নম্বৰ দিয়া হৈছে, সেয়ে উত্তৰ পত্ৰও প্ৰকাশ কৰা নহয় । লগতে জনায় যে, যদি কোনো শিক্ষাৰ্থীৰ প্ৰাপ্ত নম্বৰক লৈ আপত্তি থাকে, তেন্তে তেওঁ সেই বিষয়ে উল্লেখ কৰি বিদ্যালয় কৰ্তৃপক্ষক আবেদন কৰিব পাৰিব ।
