অসম জীয়ৰী লাভলীনা বৰগোহাঞি টকিঅ’ অলিম্পিকত ভাৰতৰ হৈ সোণৰ পদক লাভ কৰাৰ বাবে ঈশ্বৰৰ ওচৰত প্ৰাৰ্থনা জনাই আজি বাগসাৰ শালবাৰীৰ শিমলা গ্ৰাম্য ষ্টেডিয়ামত এক শুভেচ্ছামূলক কাৰ্যসূচী ৰূপায়ন কৰা হয় ৷ শালবাৰী জিলা ক্ৰীড়া সন্থাৰ উদ্যোগত আৰু চাংজাৰাং স্পোর্টচ ক্লাৱৰ সহযোগত অনুষ্ঠিত লাভলীনা বৰগোহাঞিৰ শুভেচ্ছামূলক অনুষ্ঠানত শালবাৰী জিলা ক্ৰীড়া সন্থাৰ সভাপতি গগন গগৈ নাৰ্জাৰীয়ে পতাকা উত্তোলন কৰে৷
অনুষ্ঠানত শালবাৰী জিলা ক্ৰীড়া সন্থাৰ সম্পাদক বানেশ্বৰ ব্ৰহ্ম, ড° দুলেন কুমাৰ বসুমতাৰী,বিশিষ্ট সমাজকৰ্মী কৰুণাকান্ত বসুমতাৰী,শালবাৰী জিলা বড়ো সাহিত্য সভাৰ সম্পাদক বিক্ৰম বসুমতাৰীকে ধৰি কেবাগৰাকী বিশিষ্ট ব্যক্তিয়ে অংশগ্ৰহণ কৰে৷
পৰৱৰ্তী সময়ত চাকি-ধূপ প্ৰজ্বলন কৰাৰ পিছত লাভলীনা বৰগোহাঞিয়ে সোণৰ পদক লাভ কৰক, লাভলীনা দীৰ্ঘজীৱী হওক,লাভলীনা জয়ী হওক আদি শ্লোগান দি এক চাইকেল সমদল উলিওৱা হয় ।