বিশ্বৰ সবাতোকৈ মেধাৱী শিক্ষাৰ্থীসকলৰ ভিতৰত স্থান লাভ কৰি আলোড়ন সৃষ্টি কৰিলে এটি ভাৰতীয় বংশোদ্ভৱ শিশুৱে । সম্প্ৰতি আমেৰিকাৰ প্ৰবাসী নাটাছা পেৰী নামৰ কন্যা শিশুটিৰ বয়স মাত্ৰ ১১ বছৰ । পঞ্চম শ্ৰেণীত অধ্যয়নৰতা নটাছাৰ মেধা শক্তি ইমানেই প্ৰৱল যে ১৪ বছৰৰ অষ্টম শ্ৰেণীত পঢ়ি থকা শিক্ষাৰ্থীকো শিৰনত কৰিব পাৰে । সেইবাবেই এই কন্যা শিশুটিক পৃথিৱীৰ শ্ৰেষ্ঠ মেধাৱী শিক্ষাৰ্থীসকলৰ তালিকাত স্থানপ্ৰাপ্তসকলৰ মাজত সন্নিবিষ্ট কৰা হৈছে ।
আমেৰিকাৰ মহাবিদ্যালয় আৰু শিক্ষাপ্ৰতিষ্ঠানত ভৰ্তিৰ বাবে দুটা পৰীক্ষাৰ ফলাফল চোৱা হয় । এটা হৈছে ‘স্কলষ্টিক এছেছমেণ্ট টেষ্ট’ (এছএটি) আৰু আনটো হৈছে ‘আমেৰিকান কলেজ টেষ্টিং’ (এছচিটি) । এই দুটা পৰীক্ষাৰ ফল আমেৰিকাৰ প্ৰতিষ্ঠানসমূহে বিশ্ববিদ্যালয়ক জমা দিব লাগে । সেই পৰীক্ষাতে সকলোকে অবাক কৰিব পৰা ফল লাভ কৰিলে নিউ জাৰ্ছীৰ থেলমা এল ছেণ্ডমেয়াৰ এলিমেণ্টৰী স্কুলৰ ছাত্ৰী নাটাছাই ।
পঞ্চম শ্ৰেণীৰ ছাত্ৰী হ’লেও নাটাছাই অষ্টম মানৰ পৰীক্ষাত লাভ কৰিছে ৯০ শতাংশ নম্বৰ । সমান্তৰালকৈ ‘জ’ন্স হ’পকিন্স চেণ্টাৰ ফৰ টেলেণ্টেড য়ুথ’ (চিটিৱাই)ৰ তৰফৰ পৰা সোমবাৰে নাটাছাক স্বীকৃতি প্ৰদান কৰা হয় । চেণ্টাৰৰ আওতাত থকা ‘চিটিৱাই’ এনে এক প্ৰকাৰৰ মূল্যায়ন, য’ত বিশ্বৰ ৮৪ খন দেশৰ প্ৰতিভাশালী শিশুসকলে প্ৰতিযোগিতামূলক প্ৰতিযোগিতাত অংশগ্ৰহণ কৰে । সেই ১৯ হেজাৰ শিক্ষাৰ্থীৰ ভিতৰত সবাতোকৈ মেধাৱীৰূপে উঠি আহিছে নাটাছাৰ নাম ।
নাটাছাই প্ৰাথমিক বাছনি পৰ্বত দৰ্শনীয় ফলাফল আগবঢ়োৱাত তেওঁ পোনপটীয়াকৈ ‘চিটিৱাই’ৰ ‘হাই অনাৰ্ছ এৱাৰ্ড’ বিভাগত পোনপটীয়াকৈ সুযোগ লাভ কৰিছে । সচৰাচৰ বিশ্বৰ বিভিন্ন দেশ আৰু আমেৰিকাৰ পৰা অসংখ্য শিক্ষাৰ্থীয়ে এই প্ৰতিযোগিতাত অংশগ্ৰহণ কৰে । ইয়াৰ ভিতৰত মাত্ৰ ২০ শতাংশই উচ্চ পৰ্যায়ৰ মেধা বাছনিৰ পৰীক্ষাত অৱতীৰ্ণ হ’ব পাৰে ।
যিসকল এই চূড়ান্ত পৰ্যায়ৰ পৰীক্ষাত সাফল্য পায়, তেওঁলোকক এক গ্ৰীষ্মকালীন শিবিৰলৈ নিয়া হয় । তাত সমগ্ৰ আমেৰিকাৰ মেধাৱী ছাত্ৰ-ছাত্ৰীসকলৰ স’তে বিশ্বৰ বিভিন্ন অংশত বিয়পি থকা মেধাৱীসকলে মত বিনিময় কৰাৰ সুবিধা পায় । এতিয়া এই শিবিৰলৈকে আগ্ৰহেৰে অপেক্ষা কৰি আছে নাটাছাই । এই সন্মানে তেওঁৰ জ্ঞান অৰ্জনৰ ক্ষুধা বহুলশে বৃদ্ধি কৰা বুলিও ১১ বছৰীয়া নাটাছাই কয় ।