পশ্চিম কাৰ্বি আংলঙৰ তেলেহৰত আজি দিনজোৰা কাৰ্যসূচীৰে কাৰ্বি পৰিষদীয় ৮ নম্বৰ হামৰেণ সমষ্টিৰ ভাৰতীয় জনতা যুৱ মৰ্চাৰ এখনি কাৰ্যনিৰ্বাহক সভা অনুষ্ঠিত হয় । কাৰ্বি পৰিষদৰ হামৰেণ যুৱ মৰ্চাৰ মণ্ডল কমিটিৰ উদ্যোগত অনুষ্ঠিত হোৱা সভাত মুখ্য অতিথিৰূপে কাৰ্বি পৰিষদৰ কাৰ্যবাহী সদস্য মঙ্গলছিং তিমুং উপস্থিত থাকি ভাষণ প্ৰসংগত এই বুলি মন্তব্য কৰে, “যুৱ শক্তিয়েই হৈছে দেশৰ শক্তি, যুৱ প্ৰজন্মৰ ভূমিকাই এখন দেশৰ উন্নয়ন আৰু প্ৰগতিৰ ক্ষেত্ৰত অন্যতমভাৱে যোগাত্মক প্ৰভাৱ পেলায়।”
লগতে যুৱ সমাজক এখন উন্নত, শান্তিপূৰ্ণ আৰু এখন শক্তিশালী দেশ গঢ়াৰ মূল নায়ক আৰু খনিকৰ বুলি মন্তব্য কৰে । সমান্তৰালকৈ দেশ, ৰাজ্য আৰু পাহাৰীয়া জিলা কাৰ্বি আংলঙত বিজেপি চৰকাৰে উন্নয়ন আৰু বিকাশৰ বাবে কৰা কাম-কাজ, আঁচনি ৰূপায়ন আৰু পৰিকল্পনাৰ কথা সদৰী কৰাৰ লগতে বিশেষকৈ পাহাৰীয়া জিলা কাৰ্বি আংলঙত বিজেপি চৰকাৰে ব্যাপক পৰিৱৰ্তন আনিছে বুলি দাবী কৰে তিমুঙে । লগতে যুৱ প্ৰজন্মই তথা যুৱ নেতাসকলে পাহাৰীয়া দূৰ্গম অঞ্চলত বসবাস কৰা ৰাইজক বিজেপি চৰকাৰে ইতিমধ্যে ৰূপায়ন কৰা আঁচনি, গ্ৰহণ আৰু পৰিকল্পনা কৰা আঁচনিসমূহৰ বিষয়ে বিতংভাৱে অৱগত কৰিবলৈও আহ্বান জনায় তিমুঙে।
ভাৰতীয় জনতা যুৱ মৰ্চাৰ হামৰেণ মণ্ডল সমিতিৰ সভাপতি মোহন ৰংফাৰে যুৱ মৰ্চাৰ কৰণীয় সাংগঠনিক কাম-কাজ, দায়িত্ব আদি সম্পৰ্কে আলোচনা কৰাৰ লগতে সমাগত কাৰ্বি পৰিষদৰ নিৰ্বাচনত ভাৰতীয় জনতা যুৱ মৰ্চাই গুৰুত্ত্বপূৰ্ণ ভূমিকা আৰু গুৰু দায়িত্ব হাতত লৈ বিৰোধীৰ বিৰুদ্ধে যুঁজ দিবলৈ এতিয়াৰে পৰা মাৰ বান্ধি সাজু হ’বলৈ মৰ্চাৰ বিষয়ববীয়সকলক আহ্বান জনায় ।
উল্লেখযোগ্য যে আয়োজিত সভাত কাৰ্যবাহী সদস্য মঙ্গলছিং তিমুঙৰ উপৰিও ভাৰতীয় জনতা যুৱ মৰ্চাৰ হামৰেণ মণ্ডল সমিতিৰ সভাপতি মোহন ৰংফাৰৰ লগতে মণ্ডল যুৱ মৰ্চাৰ সম্পাদক, অন্যান্য বিষয়ববীয়াসকল, পশ্চিম কাৰ্বি আংলং জিলা বিজেপিৰ সভাপতি ৰদীপ ৰংহাং, ভাৰতীয় জনতা যুৱ মৰ্চাৰ ৰাজ্যিক সমিতিৰ কাৰ্য্যকৰী সদস্য পূৰ্ণ ৰংহাং, হামৰেণ বিজেপি মণ্ডল মহিলা মৰ্চাৰ সভানেত্ৰী কাৱন ইংতিপি, সম্পাদিকা প্ৰিয়া ইংহিপি, গাঁও উন্নয়ন সমিতিৰ অধ্যক্ষ ছাৰছিং ফাংচ, আৰু ভালে সংখ্যক বিজেপি নেতা-কৰ্মকৰ্তা উপস্থিত থাকে ।