বি বাথাৰ নেতৃত্বত নতুনকৈ জন্মলাভ কৰা এন এল এফবিৰ ২২ গৰাকী কেডাৰে আজি জংঘলৰ পৰা ওলাই আহি আৰক্ষীৰ ওচৰত আত্মসমৰ্পন কৰে । কোকৰাঝাৰ জিলাৰ পৰ্বতঝোৰা মহকুমাৰ টিপকাই বনাঞ্চলৰ দূৰ্গম ঠাইত আত্মগোপন কৰি থকা এন এল এফ বিৰ কেডাৰসকলে আজি সংগঠনটোৰ প্লাটুন কমাণ্ডাৰ বি বিথুংগৌৰাৰ নেতৃত্বত জংঘলৰ পৰা ওলাই আহে ।
জংঘলৰ পৰা ওলাই অহাসকল শিঙিমাৰীত আহি পোৱাৰ লগে লগে এক আৱেগবিহ্বল পৰিৱেশৰ সৃষ্টি হয় । উক্ত স্থানত পূৰ্বৰে পৰা কোকৰাঝাৰ জিলা আৰক্ষীৰ শীৰ্ষ বিষয়াসকলৰ লগতে পূৰ্বতে আত্মসমৰ্পন কৰা এন এল এফ বিৰ নেতৃবৰ্গৰ উপৰি মধ্যস্থতাকাৰী পৃথ্বিৰাজ নাৰায়ন কোচ উপস্থিত থাকে ।
আজিৰ আদৰনি অনুষ্ঠানত এনএলএফবি সেনাধক্ষ্য এম বাথা, ভাইচ চেয়াৰমেন বি বকো উপস্থিত থাকি আদৰনি জনায় ।
পৰৱৰ্তী সময়ত ওদালগুৰি আৰু বাগসা জিলাৰ এন এল এফ বি কেডাৰসকলেও অতি শীঘ্ৰে মূল সুতিলৈ ঘূৰি আহিব বুলি জনায় পৃথ্বী নাৰায়নে । জংঘলৰ পৰা বিভিন্ন মাৰনাস্ত্ৰ লৈ ওলাই অহা কেডাৰসকলক আৰক্ষীৰ বেষ্টনিত কোকৰাঝাৰলৈ নিয়া হয় ।
এন এল এফ বি কেডাৰসকল আজি জংঘলৰ পৰা ওলাই অহাৰ খবৰ লাভ কৰি বহুতো ৰাইজে আহি মূল সুতিলৈ অহা এন এল এফ বি কেডাৰসকলক জয়ধ্বনি দি আদৰণি জনায় ।
এন এল এফ বিৰ ভাইচ চেয়াৰমেন বি বকোৱে সাংবাদিকৰে সাক্ষাৎকাৰত কয় যে কোকৰাঝাৰ জিলাৰ পাছত এতিয়া ওদালগুৰীৰ সদস্যসকলো অলপ দিনৰ ভিতৰতে আহিব ।
