ভাৰতৰ প্ৰাক্তন ফুটবল খেলুৱৈ ছৈয়দ ছাহিদ হাকিমৰ দেহাৱসান । দেওবাৰে গুলবৰ্গাৰ এখন হাস্পতালত ৮২ বছৰ বয়সত তেওঁৰ মৃত্যু হয় । পাৰিবাৰিক সূত্ৰ অনুসৰি, সম্প্ৰতি ষ্ট্ৰোক হৈছিল হাকিমৰ । তেওঁ গুলবৰ্গাৰ হাস্পতালতে চিকিৎসাধীন হৈ আছিল । ১৯৬০ৰ অলিম্পিকত ভাৰতীয় ফুটবল দলৰ সদস্য আছিল তেওঁ ।
দ্ৰোণাচাৰ্য আৰু ধ্যানচন্দ বঁটাপ্ৰাপ্ত খেলুৱৈজন ভাৰতীয় ফুটবলৰ স’তে পাঁচ দশক ধৰি জড়িত হৈ আছিল । ১৯৮২ এছিয়ান গেমছত তেওঁ প্ৰয়াত পিকে বন্দ্যোপাধ্যায়ৰ সহকাৰী আছিল । তেওঁ মাৰডেকা কাপত এবাৰ ভাৰতীয় দলৰ প্ৰধান প্ৰশিক্ষকৰ দায়িত্বও পালন কৰিছিল ।
ঘৰোৱা স্তৰত ১৯৮৮ত মহিন্দ্ৰা ইউনাইটেডক ডুৰাণ্ড কাপত চেম্পিয়ন কৰিছিল । তেওঁলোকৰ প্ৰতিদ্বন্দী আছিল শক্তিশালী ইষ্টবেংগল । অন্তিমবাৰ ২০০৪-০৫ত বেংগল-মুম্বই ফুটবল ক্লাবক প্ৰশিক্ষণ দিছিল । তেওঁৰ ৰেফাৰী হিচাপে কাম কৰাৰো অভিজ্ঞতা আছে । ফিফা আন্তৰ্জাতিকে তেওঁক ৰেফাৰীৰ বেজ দিছিল । এছিয়ান ক্লাব কাপৰ মেচ পৰিচালনা কৰিছিল ।
অলিম্পিকৰ দলত আছিল যদিও তেওঁ খেলাৰ সুযোগ পোৱা নাছিল । অৱশ্যে সেই দলৰ প্ৰশিক্ষক আছিল তেওঁৰ পিতৃ ছৈয়দ আব্দুল ৰহিম । ১৯৬২ত তেওঁ এছিয়াডত সোণজয়ী দলত নিৰ্বাচিত হোৱা নাছিল । প্ৰাক্তন খেলুৱৈসকলৰ মতে, হাকিমে হাফ-বেক হিচাপে খেলিছিল । সেই সময়ত ৰাম বাহাদুৰ, মাৰিয়াপ্পা কেম্পিয়া, প্ৰশান্ত সিং বা ফ্ৰেংকোৰ দৰে ফুটবলাৰ থকাৰ বাবে প্ৰথম দশকত তেওঁ স্থান পোৱা নাছিল ।
অলিম্পিকত পেৰুৰ বিৰুদ্ধে শেষ লিগ মেচত দলৰ শ্ৰেষ্ঠ ফুটবলাৰ চুনী গোস্বামীয়ে হাকিমক খেলাবৰ বাবে প্ৰশিক্ষকৰ ওচৰত অনুৰোধ কৰিছিল । কাৰণ, ফ্ৰান্সৰ বিৰুদ্ধে খেলিবলৈ ৰাম বাহাদুৰ উপযুক্ত নাছিল; কিন্তু, ৰহিমে চুনীৰ কথাত সন্মত নহয় ।