কোকৰাঝাৰৰ উল্টাপানীত দুই সন্দেহজনক ইউএলবি সদস্যক আৰক্ষীয়ে সংঘৰ্ষত গুলীয়াই নিহত কৰাৰ ঘটনাক লৈ বিতৰ্ক অব্যাহত থকাৰ সময়তে কালি সংগঠনটোৰ তিনিজন সদস্যক গ্ৰেপ্তাৰ কৰে আৰক্ষীয়ে ।
কোকৰাঝাৰ জিলাৰ অতিৰিক্ত আৰক্ষী অধীক্ষক সুৰজিৎ সিং পানেছাৰে জনোৱা মতে, কালি এক বিশেষ অভিযান চলাই তিনিজন ইউএলবি সদস্যক আটক কৰা হয় । তেওঁ জনোৱা মতে, প্ৰথমতে টিপকাইৰ বগৰীবাৰীৰ পৰা দৈদুন ব্ৰহ্মক আটক কৰা হয় । তদুপৰি তেওঁৰ ঘৰৰ পৰা এযোৰ কেম’ফ্লেজ পোছাক উদ্ধাৰ হয় । সোধ-পোছৰ অন্তত ব্ৰহ্মই সকলো কথা স্বীকাৰ কৰে আৰু কয় যে ইউএলবিৰ ভাবুকিপূৰ্ণ ভিডিঅ’ ইতিমধ্যে ভাইৰেল হৈ পৰিছে ।
ইউএলবিৰ মুখ্য সেনাধ্যক্ষ প্ৰিণজিৎ বসুমতাৰীৰ ঘৰ গোসাঁইগাঁৱত । বসুমতাৰীৰ বিৰুদ্ধে হত্যা, অপহৰণকে ধৰি কমেও ১০ টা গোচৰ ৰুজু হৈ থকা বুলি সদৰী কৰে পানেছাৰে । ভিডিঅ’ গ্ৰহণ কৰাৰ সময়ত প্ৰিণজিতৰ উপৰি দুব্ৰি ব্ৰহ্ম, ফুংখা ব্ৰহ্ম, দৈদুন ব্ৰহ্ম, সুদেম ব্ৰহ্ম আদি সদস্যসকল আছিল । তেওঁলোকক কৰায়ত্ত কৰিবলৈ অভিযান অব্যাহত থকা বুলি সদৰী কৰে পানেছাৰে । ইতিমধ্যে ধৃত আনন্দ নাৰ্জাৰী ওৰফে অব্ৰা, সাজাৰাম ব্ৰহ্ম ওৰফে ৰমাই আৰু দৈদুন ব্ৰহ্মক সোধ-পোছ কৰি থকা বুলিও তেওঁ কয় ।