কে’বা কোটি টকা ব্যয় সাপেক্ষে নৱনিৰ্মিত ওদালগুৰি লোকনিৰ্মাণ বিভাগৰ (গৃহ আৰু পথ) সংমণ্ডলৰ ভৱনটো আজি আনুষ্ঠানিকভাৱে উদ্বোধন কৰা হয় । বিটিআৰৰ মুখ্য কাৰ্যবাহী সদস্য প্ৰমোদ বড়োৱে উপ মুখ্য কাৰ্যবাহী সদস্য গোবিন্দ চন্দ্ৰ বসুমতাৰীৰ উপস্থিতিত কাৰ্যালয়টোৰ দ্বাৰ মুকলি কৰে । ইয়াৰ পূৰ্বে বড়োৱে কাৰ্যালয়টোৰ কৰ্মচাৰীসকলৰ বাবে নিৰ্মাণ হ’বলগীয়া দুমহলীয়া আৱাস ভৱনৰ আধাৰশিলাও স্থাপন কৰে । ইয়াৰ পাছত কাৰ্যালয় চৌহদত এক আঢ়ম্বৰপূৰ্ণ সভা অনুষ্ঠিত কৰা হয় ।
বিটিচিৰ লোকনিৰ্মাণ বিভাগৰ সচিব অমৰজ্যোতি বৰ্মণে প্ৰদান কৰা আদৰণী ভাষণৰ পাছতে বিটিআৰ প্ৰধান প্ৰমোদ বড়োৱে নিজৰ ভাষণ দাঙি ধৰে । ভাষণ প্ৰসংগত বড়োৱে কয়, “বছৰ বছৰ কৰা অপেক্ষাৰ অন্তত অজি বিভাগটোৱে এটা সুন্দৰ কাৰ্যালয় পাবলৈ সক্ষম হৈছে । এই কাৰ্যালয়টো সুন্দৰভাৱে ৰখাৰ দ্বায়িত্বও কাৰ্যালয়টোৰ বিষয়া কৰ্মচাৰীসকলৰ ওপৰত এৰিছো । কাৰ্যালয়টোত কামসমূহ বিজ্ঞানসন্মতভাৱে সম্পন্ন কৰা হ’ব । বিটিআৰৰ লোকনিৰ্মাণ বিভাগটোত নতুনত্ব অনাৰ প্ৰয়োজন আছে । আন ঠাইৰ তুলনাত আমাৰ বিটিআৰস্থিত কাৰ্যালয়সমূহৰ পৰিস্কাৰ পৰিচন্নতা কম । গতিকে এতিয়াৰে পৰা বিটিআৰৰ সকলো বিভাগীয় কৰ্মচাৰীয়ে নিজৰ নিজৰ কাৰ্যালয়টো পৰিস্কাৰ কৰি ৰাখক । এই কাৰ্যালয় যাতে সদায় চফা হৈ থাকে তাৰ বাবে সপ্তাহত এদিন আধা কাম কৰক আৰু দিনটোৰ আধা সময় কাৰ্যালয়টো পৰিস্কাৰ কৰক । লোকনিৰ্মাণ বিভাগৰ কৰ্মচাৰীসকলে সপ্তাহটোৰ তিনিদিন অফিচত কাম কৰক আৰু তিনিদিন ফিল্ডত ঘূৰক ।”
তেওঁ লগতে কয়, “বিটিআৰত বছৰি হেজাৰ হেজাৰ কোটি টকা ৰাস্তা আৰু দলং নিৰ্মাণত যায় । ইয়াৰ পাছতো বহু ঠিকাদাৰে কামসমূহ আধা কৰিয়েই টকা সৰকায় । গতিকে এতিয়াৰে পৰা যিসকল ঠিকাদাৰে তিনি-চাৰি বছৰ একোটা কাম সম্পূৰ্ণ কৰা নাই তেওঁলোকৰ কাম বাতিল কৰি প্ৰয়োজন সাপেক্ষে তেওঁলোকৰ বিৰুদ্ধে বিভাগে গোচৰ দিব লাগে । এতিয়াৰে পৰা চৰকাৰী কাৰ্যালয়সমূহ ঠিকাদাৰৰ আড্ডাস্থলী হ’ব দিয়া নহ’ব । আমি বিটিআৰ অঞ্চলত নতুন পদক্ষেপ হাতত লৈছো । আগন্তুক দিনবোৰত নিৰ্মাণ হ’বলগীয়া প্ৰতিটো পথৰ নম্বৰ আৰু নাম দিয়া হ’ব । প্ৰতিটো জাতি-জনগোষ্ঠীৰ সন্মানীয় লোকসকলৰ নামত পথৰ নামসমূহ ৰখা হ’ব । যোগাযোগৰ ক্ষেত্ৰখনতো বিটিআৰক আগুৱাই নিব বিচাৰিছো । এবছৰৰ ভিতৰত বিটিআৰৰ চুকে-কোণে ইণ্টাৰনেট সেৱাৰ কাম কৰিম । ইয়াৰ জৰিয়তে আমি কৰিবলৈ আগবঢ়া অনলাইন পাঠ্যক্ৰমৰ ক্ষেত্ৰত সহায়ক হ’ব ।
বিটিআৰৰ সকলো পথ পকীকৰণ কৰাৰ বাবে প্ৰায় চাৰি-পাঁচশ কোটিৰ প্ৰয়োজন হ’ব । আগন্তুক মাৰ্চৰ আশে-পাশে ৰাজ্য চৰকাৰে পথ নিৰ্মাণৰ বাবে ধন মুকলি কৰি দিয়াৰ ইংগিত দিছে । বিটিআৰ চুক্তি সম্পাদনৰ পাছত বিটিআৰ অঞ্চলত শান্তি ঘূৰি অহা বাবে বহু সংস্থাই এই অঞ্চলত বিনিয়োগ কৰিবলৈ মন মেলিছে । কিন্তু ইয়াৰ পাছতো আকৌ দুজনমান ল’ৰাই হাতত বন্দুক লৈ জংঘললৈ গৈ বোমা বিস্ফোৰণৰ হুংকাৰ দিছে । এইবোৰৰ দ্বাৰা অঞ্চলটোত শান্তিৰ পৰিৱৰ্তে অশান্তিহে সৃষ্টি হ’ব । শিক্ষাৰ মানদণ্ড উন্নয়নৰ বাবে বিটিআৰ চৰকাৰে কাম কৰাৰ কৌশল তৈয়াৰ কৰিছে । আমাৰ বিটিআৰ অঞ্চলত বাঁহৰ উদ্যোগ, হস্ততাঁত শিল্পৰ উন্নয়নৰ বাবে কাম কৰাৰ লক্ষ্য হাতত লৈছো । কেন্দ্ৰই হস্ততাঁত শিল্পৰ বাবে এক-ডেৰশ কোটি টকা প্ৰদান কৰাৰ আশ্বাস দিছে ।”
লগতে বিটিআৰ প্ৰধান গৰাকীয়ে বিটিআৰৰ কাৰ্যালয়ৰ অসামাজিক কাৰ্য দুৰ্নীতি বন্ধ কৰাৰো হুংকাৰ প্ৰদান কৰে । আজিৰ এই কাৰ্যসূচীত কাৰ্যবাহী সদস্য নিলুট স্বৰ্গীয়াৰী, এমচিএলএ সঞ্জয় স্বৰ্গীয়াৰী, ওদালগুৰি লোকনিৰ্মাণ বিভাগৰ কাৰ্যবাহী অভিযন্তা প্ৰণৱ কুমাৰ ৰাভাকে প্ৰমুখ্য কৰি বিভাগীয় বিষয়া তথা ইউপিপিএলৰ নেতাকৰ্মীসকল উপস্থিত থাকে ।