প্ৰথম পৰ্যায়ত আফগান শৰণার্থীসকলৰ বাবে ভাৰত চৰকাৰে দুৱাৰ মুকলি ৰাখিছিল যদিও, সম্প্ৰতি বন্ধ ৰাখিছে । কিন্তু আফগানিস্তানৰ প্রাক্তন এমপি ফৌজিয়া কুফি আশাবাদী যে, ভাৰত চৰকাৰে আফগান শৰণার্থীসকলৰ সমস্যা বুজিব আৰু তেওঁলোকক আশ্রয় দিব । শনিবাৰে দোহাৰ ‘ছাউথ এছিয়ান উইমেন ইন মিডিয়া’ নামে এটা সংগঠনৰ ৱেবইনাৰত যোগ দিছিল ফৌজিয়াই । আফগানিস্তানৰ পৰিস্থিতিৰ বিৱৰণ দিয়াৰ লগতে তেওঁ কয়, ‘‘তালিবানে এদিনতে শক্তিশালী হোৱা নাই ।’’ ইয়াৰ বাবে আশ্ৰফ ঘানি চৰকাৰ, আৰক্ষী আৰু সেনাৰ ব্যর্থতাকো তেওঁ দোষাৰোপ কৰে ।
আশ্রফ ঘানি চৰকাৰৰ আমলৰ এই এমপি গৰাকীয়ে কয়, ‘‘ভাৰত আৰু অন্যান্য প্রতিবেশী দেশবোৰৰ স’তে আফগানিস্তানৰ কেৱল ৰাজনৈতিক সম্পর্কই নাই, এই সম্পর্কৰ ইতিহাস বহু গভীৰ । আশা কৰো, ভাৰতে আফগান শৰণার্থীসকলক চাব ।’’
উত্তৰ-পূৱ আফগানিস্তানৰ বাদাখশান প্রদেশৰ বাসিন্দা ফৌজিয়া । এই প্রদেশৰ পৰাই তেওঁ এমপি নির্বাচিত হয় । তেওঁ ডেপুটি স্পিকাৰো হৈছিল । বিগত কিছু মাহ ধৰি আফগান চৰকাৰৰ যিসকল প্রতিনিধি দলে তালিবানৰ স’তে শান্তি ৰক্ষাৰ আলোচনা কৰিছিল, ফৌজিয়া তাৰো সদস্য আছিল । ১৫ আগষ্টত তালিবানে কাবুল দখল কৰাৰ সময়তেই তেওঁ দেশ ত্যাগ কৰিছিল । সম্প্ৰতি তেওঁ কাতাৰৰ দোহা চহৰত আছে । আজি ফৌজিয়াই জনায়, কোনো পৰিস্থিতিতেই তেওঁ দেশ ত্যাগ কৰব নিবিচাৰে । কিন্তু, পৰিস্থিতিৰ বাবে তেওঁ বাধ্য । উল্লেখ্য, পূৰ্বেও তেওঁক বহুবাৰ হত্যা কৰাৰ চেষ্টা কৰা হৈছিল । তেওঁৰ পৰিয়ালবৰ্গ এতিয়াও আফগানিস্তানতেই আছে ।
ফৌজিয়াই বক্তব্যত আজি বাৰে বাৰে নাৰীৰ প্রতি তালিবানৰ বিৰূপ মনোভাবৰ কথা উল্লেখ কৰে। তেওঁ কয় যে, তালিবানে মহিলাক ভয় কৰে । সেয়ে মহিলাসকলক সকলো সুবিধাৰ পৰা বঞ্চিত কৰিবলৈ উদ্যোগী হৈছে । বিদ্যালয়ৰ পৰা ৰাষ্ট্ৰীয় সংসদ, ক’তো মহিলাৰ চিন-চাপ ৰাখিব বিচৰা নাই । কিন্তু, মহিলা আৰু ধর্মীয় সংখ্যালঘুসকলৰ অধিকাৰ কাঢ়িলে নহ’ব । প্রাক্তন এমপি-ৰ আশা, আন্তর্জাতিক ক্ষেত্রত এই বিষয়ত প্রতিবাদ আৰু তীব্র হ’ব । মহিলাসকলে যিদৰে অধিকাৰৰ দাবীত আফগানিস্তানৰ পথত নামিছে সেয়া যথেষ্ট সাহসী পদক্ষেপ বুলিও তেওঁ কয় ।
এই ৱেবইনাৰত ‘চেন্টাৰ ফৰ দ্য প্র’টেকছন অৱ আফগান উইমেন জার্নেলিষ্টছ’-ৰ ডিৰেক্টৰ ফৰিদা নেকজাদো উপস্থিত আছিল । তালিবানে কাবুল দখল কৰাৰ পাছত তেঁৱো নিজৰ কন্যাৰ স’তে কানাডাত আশ্রয় লয় । অৱশ্যে তেওঁৰ স্বামী কাবুলতেই আছে । নেকজাদে আজি কয়, ‘‘সাংবাদিক হোৱাৰ বাবে বহু দেশ ঘূৰিছো । কিন্তু শৰণার্থী হৈ কোনো দেশত যাব লাগিব, এই কথা ভবা নাছিলো । যিয়ে নিজৰ দেশ ত্যাগ কৰি অন্য দেশলৈ যাবলগীয়া হয়, তেঁৱেই এই ব্যথা বুজিব ।’’