দুই কানাডাৰ নাগৰিক মাইকেল ক’ভৰিংগ আৰু মাইকেল স্পাবৰ মুক্তিৰ পাছতো চীনৰ কাৰাগাৰত বৰ্তমানে বিভিন্ন অভিযোগত বন্দী হৈ আছে এশৰো অধিক কানাডাৰ নাগৰিক । তিনি বছৰ পূৰ্বে চীনত গ্ৰেপ্তাৰ হোৱা কানাডাৰ নাগৰিক ক’ভৰিংগ আৰু স্পাবৰক অৱশেষত চীনৰ আদালতে যোৱা শুকুৰবাৰে কাৰাগাৰৰ পৰা মুক্তি দিছিল ।
‘নেচনেল প’ষ্ট’ৰ বাতৰি অনুসৰি বৰ্তমানে চীনৰ বিভিন্ন কাৰাগাৰত ১১৯জন কানাডাৰ নাগৰিক নানা অভিযোগত বন্দী হৈ আছে । ইয়াৰে একাংশক কথিত ৰাজনৈতিক আৰু আন একাংশক ধৰ্মীয় অপৰাধৰ অভিযোগত চীনে কাৰাগাৰলৈ নিক্ষেপ কৰিছিল । তদুপৰি, আন একাংশক নিচাযুক্ত দ্ৰব্য সৰবৰাহৰ অভিযোগত কাৰাবন্দী কৰা হৈছিল ।
কানাডাৰ প্ৰধানমন্ত্ৰী জাষ্টিন ট্ৰুডুৱে প্ৰকাশ কৰা অনুসৰি, চীনৰ কাৰাগাৰত বন্দী হৈ থকা দেশখনৰ এইসকল নাগৰিকক মুক্ত কৰি স্বদেশলৈ প্ৰত্যাৱৰ্তনৰ প্ৰচেষ্টা অব্যাহত ৰখা হৈছে ।