উৎসৱমুখৰ পৰিস্থিতিত যাতে কৰ’না সংক্রমণ বৃদ্ধি নাপায় তাৰ বাবে ৰাজ্যবোৰক সতর্ক কৰিলে গৃহমন্ত্রণালয়ে । দেশত কৰ’নাৰ বিধি-নিষেধ বৃদ্ধি কৰা হ’ল ৩১ অক্টোবৰ পর্যন্ত ।
ৰাজ্যৰ মুখ্য সচিবসকলক দিয়া পত্ৰত কেন্দ্রীয় গৃহ সচিব অজয় ভাল্লাই লিখিছে, উৎসৱৰ বতৰত যাতে কৰ’না সংক্রমণ বৃদ্ধি নাপায়, তাৰ বাবে স্থানীয় প্রশাসনক প্রয়োজনীয় ব্যৱস্থা গ্ৰহণ কৰিবৰ বাবে নির্দেশ দিয়ক ৰাজ্যই ।
কাৰণ, দেশত কৰ’নাৰ গ্রাফ নিম্নমুখী হ’লেও স্থানীয় স্তৰত সংক্রমণ হৈছে । সেয়ে স্বাস্থ্যবিধি অৱলম্বন কৰি উৎসৱৰ আয়োজন কৰিব লাগিব । কোনো ঠাইতেই যাতে অধিক জনসমাগম নহয়, তাৰ প্ৰতি লক্ষ্য ৰাখিব লাগিব । লগতে টিকাকৰণৰ গতিও বৃদ্ধি কৰিব লাগিব ।
বিগত ২৪ ঘণ্টাত কেৰালাত ১১ হেজাৰৰো অধিক লোক আক্রান্ত হৈছে । উত্তৰ-পূৱৰ মিজোৰামতো দৈনিক সংক্রমণ প্রায় দুই হেজাৰ ।
এনে পৰিস্থিতিত, দেশজুৰি কন্টেইনমেন্ট বিধি ৩১ অক্টোবৰ পর্যন্ত বঢ়ালে কেন্দ্রীয় চৰকাৰে । মেলা, উৎসৱ আৰু অন্যান্য ধর্মীয় অনুষ্ঠানত জনসমাগম হ’লে সংক্রমণ আৰু বৃদ্ধি পাব পাৰে বুলি শংকা প্ৰকাশ কৰিছে কেন্দ্ৰই । যিসমূহ ৰাজ্য আৰু কেন্দ্রশাসিত অঞ্চলত সংক্রমণৰ সম্ভাৱনা আছে, তাত বিধি কঠোৰ কৰাৰ নির্দেশ দিয়া হৈছে ।
ইপিনে, দেশত ২০১ দিনৰ পাছত ২০ হেজাৰৰ নিম্নগামী হ’ল দৈনিক সংক্রমণ । যোৱা ২৪ ঘণ্টাত দৈনিক সংক্রমণ আৰু দৈনিক মৃত্যুৰ হাৰো হ্ৰাস পাইছে । কেন্দ্রীয় স্বাস্থ্য মন্ত্রণালয়ৰ মঙলবাৰৰ পৰিসংখ্যা অনুযায়ী, বিগত ২৪ ঘণ্টাত দেশত ১৭৯ জনৰ কৰ’নাত মৃত্যু হৈছে । এদিনত আক্রান্তৰ সংখ্যা ১৮ হেজাৰ ৭৯৫ জন ।
দেশত এই পর্যন্ত চাৰি লাখ ৪৭ হেজাৰ ৩৭৩ জনৰ কৰ’নাত মৃত্যু হৈছে । মুঠ আক্রান্তৰ সংখ্যা তিনি কোটি ৩৬ লাখ ৯৭ হেজাৰ ৫৮১ জন । সক্ৰিয় ক’ভিড ৰোগীৰ সংখ্যা দুই লাখ ৯২ হেজাৰ ২০৬জন । দেশত এই পর্যন্ত তিনি কোটি ২৯ লাখ ৫৮ হেজাৰ দুজন লোক সুস্থ হৈছে । এদিনত ২৬ হেজাৰ ৩০ জন লোক সুস্থ হৈছে ।