আৰিয়ন খানৰ ফোনত মাদক দ্ৰব্যৰ ‘প্রামাণ্য নথি’ পোৱা গৈছে বুলি দাবী কৰিলে এনচিবি-য়ে । শাহৰুখ-পুত্রৰ আন্তর্জাতিক মাদক-চক্ৰৰ স’তে যোগাযোগ থাকিব পাৰে বুলি সন্দেহ কৰিছে এনচিবি বিষয়াসকলে । সেয়ে ১১ অক্টোবৰ পর্যন্ত আৰিয়নক নিজৰ জিম্মাত ৰখাৰ আবেদন কৰিলে নাৰক’টিক্স কন্ট্র’ল ব্যুৰ’ই (এনচিবি) ।
শনিবাৰে নিশা আটক কৰা হৈছিল শাহৰুখ-পুত্রক । দেওবাৰে সন্ধিয়া গ্রেপ্তাৰ কৰা হয় আৰিয়নক । সোমবাৰে আদালতত জিম্মাৰ সময়সীমা বঢ়োৱাৰ আবেদন জনালে এনচিবি-য়ে ।
এনচিবি-ৰ জিম্মাত ১৬ ঘণ্টা ধৰি জেৰা কৰাৰ পাছত আৰিয়ন, বান্ধৱী মুনমুন ধমেচা আৰু আৰ্বাজ শেঠ মার্চেন্টক গ্রেপ্তাৰ কৰে এনচিবি বিষয়াসকলে । আৰিয়নক সোমবাৰে বিচাৰ বিভাগীয় জিম্মাত লৈ যোৱাৰ পাছতেই তেওঁৰ হৈ জামিনৰ আবেদন কৰে তেওঁৰ অধিবক্তা সতীশ মানশিণ্ডেই । শাহৰুখে তেওঁৰ পুত্ৰৰ বাবে সতীশক নিয়োগ কৰিছে ।
নাৰক’টিক ড্রাগছ এণ্ড ছাইক’ট্রপিক ছাবষ্টেন্সেছ’ (এনডিপিএছ)-আইনৰ অধীনত গ্রেপ্তাৰ কৰা হয় আৰিয়নসহ মুনমুন আৰু আৰ্বাক । আৰিয়নৰ গ্রেপ্তাৰিৰ পৰোৱানাত লিখা আছে, তেওঁৰ পৰা ১৩ গ্রাম কোকেন, ২১ গ্রাম চৰছ, ২২টা এমডিএমএ পিল আৰু নগদ ১,৩৩,০০০ টকা উদ্ধাৰ হৈছে ।
গ্রেপ্তাৰৰ পাছত কোৱা হৈছিল, এদিনৰ বাবে আৰিয়নক এনচিবি-ৰ জিম্মাত ৰখা হ’ব । কিন্তু সোমবাৰে পুৱা জনোৱা হয়, শাহৰুখ-পুত্রক আৰু কিছুদিন জিম্মাত ৰাখিবৰ বাবে আদালতৰ পৰা অনুমতি বিচাৰিব পাৰে এনচিবি-য়ে । কাৰণ, মুম্বাইৰ মাদক দ্ৰব্যৰ তদন্তত অধিক তথ্যৰ বাবে আৰিয়নক আৰু কিছুদিন নিজৰ জিম্মাত ৰাখিব লাগিব ।
