শাহৰুখ পুত্ৰক মাদক কাণ্ডত গ্ৰেপ্তাৰ কৰাৰ পাছত পিয়াঁজৰ বাকলি গোচোৱাৰ দৰে এটাৰ পাছত এটা ৰহস্য ফাদিল কৰিছে মাদক নিয়ন্ত্রক সংস্থা (নাৰক’টিক্স কন্ট্র’ল ব্যুৰ’ বা এনচিবি)য়ে । তদন্ত যিমানেই আগবাঢ়িছে, সিমানেই চাঞ্চল্যকৰ তথ্য লাভ কৰিছে এনচিবি-য়ে । তেওঁলোকে জনায় যে, কার্ডিলিয়া প্রমোদতৰীত শনিবাৰে নিশা যি মাদক দ্ৰব্য অনা হৈছিল, সেয়া ডার্ক ৱেব ব্যৱহাৰ কৰি কিনা হয় বিটকইনৰ মাধ্যমত ।
সোমবাৰে শ্রেয়ছ নায়াৰ নামে এজন মাদক দ্ৰব্য ব্যৱসায়ীক গ্রেপ্তাৰ কৰে এনচিবি-য়ে । তদন্তকাৰীসকলৰ দাবী, ধৃত ব্যক্তিজনে জেৰাত জনাইছে প্রমোদতৰীত সেই নিশা ডার্ক ৱেব-ৰ জৰিয়তে মাদকৰ অৰ্ডাৰ শ
লাভ কৰিছিল । তাৰ বাবে তেওঁক কোনো নগদ ধন দিয়া হোৱা নাছিল । সম্পূৰ্ণ ধনৰাশি ক্রিপ্টোকাৰেন্সি ব্যৱহাৰ কৰি দিয়া হৈছিল । সেয়ে সন্দেহ আৰু দৃঢ় হৈছে এনচিবি-ৰ তদন্তকাৰীসকলৰ ।
প্রশ্ন উত্থাপন হৈছে, এইবাৰ মাদকৰ লেনদেন আৰু প্ৰাপ্যৰ প্রক্রিয়া ডাৰ্ক ৱেবত আৰম্ভ হৈছে নেকি, যাতে সহজে বিভিন্ন তদন্তকাৰী সংস্থাৰ পৰা হাত সাৰিব পাৰি ? শ্রেয়ছক জেৰা কৰি এই বিষয়ে জানিবলৈ চেষ্টা কৰা হৈছে বুলি এনচিবি সূত্রে খবৰ । ইতিমধ্যে এই ঘটনাত শাহৰুখ খানৰ পুত্ৰ আৰিয়নসহ আঠজনক গ্রেপ্তাৰ কৰিছে এনচিবি-য়ে । অহা সাত অক্টোবৰ পর্যন্ত তেওঁলোকক নিজৰ জিম্মাত ৰাখিব এনচিবি-য়ে ।
সেই পার্টিত আৰিয়নক কোনে আমন্ত্রণ জনাইছিল, তাৰ সন্ধান চলাইছে তদন্তকাৰীসকলে । লগতে, আৰিয়ন আৰু তেওঁৰ বন্ধুসকলৰ পৰা উদ্ধাৰ হোৱা মাদকৰ টকা কোনে দিছিল, তাৰো যোগসূত্রৰ সন্ধান চলাইছে তদন্তকাৰীসকলে । শনিবাৰে নিশা এনচিবি-য়ে প্রমোদতৰীত সন্ধান চলোৱাৰ সময়ত, আৰিয়নৰ লেন্স ৰখা বাকচৰ পৰা মাদক দ্ৰব্য উদ্ধাৰ হয় । ইয়াৰ উপৰি তেওঁৰ বান্ধৱীৰ ছেনিটেৰী পেড্ আৰু অন্তর্বাসৰ পৰাও মাদক দ্ৰব্য উদ্ধাৰ হয় ।
এনচিবি সূত্রে খবৰ, ছেনিটেৰী পেড্, ঔষধৰ বাকচ, কাপোৰ, অন্তর্বাসতো মাদক দ্ৰব্য ৰখা আছিল । সহজে যাতে মাদকৰ সন্ধান নাপায়, সেয়ে এইবোৰক এনে ঠাইত লুকাই ৰখা হৈছিল বুলি অনুমান কৰিছে তদন্তকাৰীসকলে ।
