প্ৰধানমন্ত্ৰী কৃষক সন্মান নিধি যোজনা (পি এম কে এছ ৱাই) আঁচনিত পুনৰ ওলাইছে ঠিকনা তথা অস্তিত্বহীন অধিকাৰীৰ তথ্য । ক’ভিডৰ তলাবন্ধৰ সময়ত ক্ষতিগ্ৰস্ত কৃষকক বছৰত ছহেজাৰ টকাকৈ আগবঢ়োৱা আঁচনিখনক লৈ অসমত ইতিমধ্যে বৃহৎ কেলেংকাৰি সংঘটিত হৈছে । বিভিন্ন পক্ষৰ অভিযোগৰ ভিত্তিত কৃষি বিভাগৰ পৰা চলোৱা অনুসন্ধানত অসমত ৯.৩৯ লাখতকৈও অধিক ভুৱা কৃষক হিতাধিকাৰীৰ তালিকাত সন্নিৱিষ্ট হোৱাটো পোহৰলৈ আহিছে ।
সেই তালিকাৰে পুনৰ পৰীক্ষণ মুখ্যমন্ত্ৰীৰ নিৰ্দেশত জিলা প্ৰশাসনসমূহে অব্যাহত ৰাখিছে । এই পুনৰীক্ষণতে ঠিকনাবিহীন হেজাৰ হেজাৰ হিতাধিকাৰীৰ নাম আকৌ এবাৰ পোহৰলৈ আহিছে । ইয়াৰ পৰিপ্ৰেক্ষিতত জিলাবোৰে প্ৰতিজন আবেদনকাৰীকে নিজৰ অস্তিত্ব প্ৰয়োজনীয় তথ্যসহ প্ৰমাণ কৰিবলৈ নিৰ্দেশ জাৰি কৰিছে । ইয়াৰ বাবে অহা ১৫ অক্টোবৰ অন্তিম সময়সীমা ধাৰ্য কৰি দিয়া হৈছে । যিসকল আবেদনকাৰীয়ে প্ৰয়োজনীয় নথি জমা দিব নোৱাৰিব তেওঁলোকক সন্ধানহীন ঘোষণা কৰা হ’ব ।
এই সন্দৰ্ভত কে’বাখনো জিলাৰ পুনৰীক্ষণৰ দায়িত্বপ্ৰাপ্ত বিষয়াৰ সূত্ৰই জনায় যে প্ৰতিখন জিলাতে আঁচনিখনৰ অধীনত বৃহৎ সংখ্যক হিতাধিকাৰীৰ নাম সন্নিবিষ্ট হৈছে । তেওঁলোকে প্ৰত্যেকৰে নথিপত্ৰ আৰু অৱস্থিতি পুনৰীক্ষণৰ প্ৰক্ৰিয়া অব্যাহত আছে । সেই পৰীক্ষণত দেখা গৈছে যে অলেখ হিতাধিকাৰীৰ নাম তেওঁলোকে দাখিল কৰা ঠিকনাত বিচাৰি পোৱা নাই । এই সংখ্যা কিমান সেয়া এই পৰ্যন্ত সঠিকভাৱে নিৰ্ণয় নহ’লেও লাখ লাখ হোৱাৰ সম্ভাৱনা আছে । সেয়েহে ঠিকনাত বিচাৰি নোপোৱা সকলক নিৰ্দিষ্ট প্ৰ-পত্ৰ আবেদন কৰি নিজৰ যোগ্যতা তথা অস্তিত্ব সাব্যস্ত কৰিবলৈ কোৱা হৈছে ।
ইয়াৰ উপৰি সূত্ৰটোৱে কয় যে,যিসকল প্ৰকৃত হিতাধিকাৰীয়ে ইতিমধ্যে এটা বা ততোধিক কিস্তিৰ ধন লাভ কৰিছে সেইসকলেও প্ৰয়োজনীয় নথিপত্ৰ দাখিল কৰিব লাগিব । কাৰণ তেনে ধন লাভ কৰা বহুতৰে অস্তিত্ব বাস্তৱত নাই । আবেদনকাৰীৰ তালিকাত এটাও কিস্তি লাভ নকৰা হিতাধিকাৰীও আছে । তেওঁলোকেও অনুৰূপ ধৰণে নথি-পত্ৰ দাখিল কৰিব পাৰিব । উল্লেখ্য যে নথিৰ লগত সকলোৰে পৰা আধাৰ কাৰ্ড, ভোটাৰ পৰিচয়পত্ৰ, ফটো, মাটিৰ জমাবন্দি, বেংক পাছবুকৰ ফটোকপি আদি বিচাৰা হৈছে ।
উল্লেখ্য যে এই আঁচনিখন ৰূপায়ণৰ সময়ত অসমৰ ৩৩ খন জিলাৰ ভিতৰত বৰপেটা, কামৰূপ আৰু বাগ্সাত সৰ্বাধিক অনিয়ম সংঘটিত হোৱাৰ তথ্য ইতিমধ্যে পোহৰলৈ আহিছে । বৰপেটাত ১.৫১ লাখ, কামৰূপত ৮৫.৭১ হেজাৰ আৰু বাগ্সাত ৫৩.৫৩ হেজাৰ ভুৱা কৃষকৰ তথ্য উদ্ধাৰ হৈছে । এইসকলক বাদ দি কৃষি বিভাগে যিসকলক প্ৰকৃত আৰু সাহায্য লাভৰ বাবে উপযুক্ত কৃষক বুলি পৰীক্ষণ পৰ্যায়ত চিনাক্ত কৰিছে সেইসকলৰ মাজতো ভুৱা কৃষক থকাৰ সম্ভাৱনা বৃদ্ধি হৈছে । তেনে কৃষকৰ অস্তিত্ব সদ্যহতে চলি থকা পুনৰীক্ষণ প্ৰক্ৰিয়াত পোহৰলৈ অহা বুলি সূত্ৰটোৱে উল্লেখ কৰে ।