উত্তৰপ্রদেশৰ লখিমপুৰ খেৰিৰ সংঘর্ষত আঠজনৰ মৃত্যুৰ ঘটনাৰ তদন্তৰ বাবে তদন্ত কমিচন গঠন কৰিলে যোগী আদিত্যনাথ চৰকাৰে । এলাহাবাদ উচ্চ ন্যায়ালয়ৰ প্রাক্তন ন্যায়াধীশক কমিচনৰ প্রধানৰ দায়িত্ব দিয়া হৈছে ।
প্রশাসনৰ তৰফৰ পৰা জনোৱা হৈছে, প্রাক্তন ন্যায়াধীশ প্রদীপ কুমাৰ শ্রীবাস্তৱৰ নেতৃত্বত কাম কৰিব এই তদন্ত কমিচনে । তদন্তৰ পাছত এটা প্ৰতিবেদন জমা দিব তেওঁলোকে । সেই প্ৰতিবেদন অনুযায়ী ব্যৱস্থা গ্ৰহণ কৰিব প্রশাসনে । এই ঘটনাত কোনো দোষী প্রমাণিত হ’লে কঠোৰ পদক্ষেপ লোৱা হ’ব বুলি জনাইছে উত্তৰপ্রদেশ চৰকাৰে ।
দেওবাৰে কেন্দ্রীয় গৃহ প্রতিমন্ত্রী অজয় মিশ্রৰ পুত্ৰ আশিস মিশ্রৰ গাড়ীৰ খুন্দাত লখিমপুৰত চাৰি কৃষকৰ মৃত্যুৰ অভিযোগক লৈ উত্তাল উত্তৰপ্রদেশসহ সমগ্ৰ দেশৰ ৰাজনীতি । ঘটনাৰ তদন্তক লৈ ইতিমধ্যে একাধিক প্রশ্ন উত্থাপন হৈছে । আৰক্ষীৰ তৰফৰ পৰা জনোৱা হৈছে, গাড়ীৰ খুন্দাৰ বিষয়টো তদন্ত কৰা হৈছে । এই পর্যন্ত ১৩ জনৰ বিৰুদ্ধে গোচৰ দাখিল কৰা হৈছে । তেনে সময়তে লখিমপুৰ-কাণ্ডত স্বতঃপ্রোত গোচৰ দাখিল কৰা হৈছে উচ্চতম ন্যায়ালয়ত । বৃহস্পতিবাৰে এই গোচৰ শুনিব শীর্ষ আদালতৰ প্রধান ন্যায়াধীশ এনভি ৰামানাই ।