আফগানিস্তানৰ ৰাষ্ট্রীয় বিদ্যুৎ কোম্পানি ‘দ্য আফগানিস্তান ব্রেছনা শ্বেৰকত’ (ডিএবিএছ)এ বুধবাৰে জনাইছে, উজবেকিস্তানৰ পৰা আফগানিস্তানৰ বহুকেইখন প্রদেশ আৰু ৰজধানী কাবুলত যান্ত্ৰিক সমস্যাৰ বাবে বিদ্যুৎ সৰবৰাহ বন্ধ কৰা হৈছে । সূত্র অনুসৰি, তালিবান চৰকাৰৰ বকেয়া বিলৰ পৰিমাণ ৬২ বিলিয়ন মার্কিন ডলাৰ । সেই টকা পৰিশোধ কৰিব নোৱাৰাৰ বাবেই বিদ্যুৎ সৰবৰাহ বন্ধ কৰিছে ।
ডিএবিএছক স্পুটনিকে জনাইছে, উত্তৰ আফগান প্রদেশ বাঘালানত প্রযুক্তিগত সমস্যা দেখা দিছে । বিবৃতিত কোৱা হৈছে, প্রযুক্তিগত কর্মীসকলে যথা সম্ভৱ শীঘ্ৰে এই সমস্যা সমাধানৰ বাবে কাম কৰিছে । নিউজ ৰিপ’র্টত কোৱা হৈছে, নতুন তালিবান চৰকাৰে মধ্য এছিয় বিদ্যুৎ সৰবৰাহকাৰীসকলৰ ঋণ পৰিশোধ নকৰাৰ বাবে আফগানিস্তানৰ ৰাজধানী কাবুল অন্ধকাৰত ডুবিব পাৰে ।
আফগানিস্তানত জেহাদিসকল ক্ষমতাত অহাৰ পাছত ইস্তফা দিছে দেশৰ চৰকাৰী বিদ্যুৎ সংস্থাৰ প্রধান দাউদ নুৰাজিয়ে । ইয়াৰ পাছৰ পৰাই স্তব্ধ হৈ আছে সমস্ত প্রশাসনিক কাম । যদিও, উজবেকিস্তান, তাজিকিস্তান আৰু তুর্কমেনিস্তানৰ পৰা দেশৰ প্রয়োজনৰ ৫০ শতাংশ বিদ্যুৎ আমদানি কৰে আফগানিস্তানে । চলিত বৰ্ষৰ অনাবৃষ্টিৰ ফলত দেশৰ বিদ্যুৎ উৎপাদন হ্রাস পাইছে ।
ইয়াৰ উপৰি, বিদ্যুৎ সংস্থাবোৰৰ বকেয়াও দিয়া নাই তালিবানে । ফলত শীত কালৰ আগতে জোগান বন্ধ কৰি দিব পাৰে তেওঁলোকে । তেওঁ জনায়, বিদ্যুতৰ জোগান বন্ধ হ’লে সমগ্ৰ দেশ প্রভাৱিত হ’ব । সৰ্বাধিক প্রভাৱ পৰিব কাবুলত । ফলত টেলি কমিউনিকেচন ব্যৱস্থাৰ বৃহৎ ক্ষতি হ’ব । অন্ধকাৰ যুগত উভতি যাব আফগানিস্তান ।
কিছুদিন পূৰ্বেই ৰাষ্ট্রসংঘৰ মানৱতা বিষয়ক সমন্বয় দপ্তৰে দাবী কৰিছিল, দ্রুত বিপর্যয়ৰ সন্মুখীন হ’ব আফগানিস্তানে । ৰাষ্ট্রসংঘৰ মুখপাত্র জেন্স লার্কে জেনেভাত এক সাংবাদিক সন্মীলনত জনাইছিল, লাখ লাখ আফগান নাগৰিক বৃহৎ সমস্যাৰ সন্মুখীন হ’ব ।