ধুবুৰী জিলাৰ হাতীধুৰা উন্নয়ন খণ্ড তথা ২৮ নং গোসাঁইগাঁও বিধানসভা সমষ্টিৰ অন্তৰ্গত কামানডাংগা-গাৰোপাৰা সংযোগী পথত এখন বাঁহৰ সাঁকো । জৰাজীৰ্ণ বাঁহৰ সাঁকোৰে কে’বাখনো গাঁৱৰ ৰাইজৰ বিপদসংকুল যাতায়ত ।
২০১৭ৰ জুলাইত হোৱা বানপানীয়ে পথটোত থকা কালভাৰ্ড উটুৱাই নিয়াৰ ফলত যাতায়ত বন্ধ হয় । ফলত ৰাইজৰ দান বৰঙণিৰে এখন বাঁহৰ সাঁকো নিৰ্মাণ কৰি যাতায়ত অব্যাহত ৰাখিছে গাঁওবাসীয়ে । কিন্তু পথাচাৰিৰ লগতে স্কুলীয়া ছাত্ৰ-ছাত্ৰী, ৰোগী আদি নিয়াৰ ক্ষেত্ৰত বহু অসুবিধাৰ সন্মুখীন হ’ব লগা হৈছে ৰাইজে । কাৰণ অঞ্চলখনলৈ যাব নোৱাৰে তিনি চকীয়া, চাৰি চকীয়া বাহন । ফলত কান্ধত তুলি পৰাপাৰ কৰিবলগীয়া হয় বেমাৰী ।
এই জৰাজীৰ্ণ বাঁহৰ সাঁকোখন নিৰ্মাণৰ বাবে স্থানীয় ৰাইজে বহুতো আবেদন নিবেদন কৰিছে যদিও স্থানীয় জনপ্ৰতিনিধি বা বিভাগীয় কৰ্তৃপক্ষই কোনো গুৰুত্ব আৰোপ কৰা নাই । ফলত বাঁহৰ সাঁকোৰ পৰিৱৰ্তে দলং নিৰ্মাণৰ বাবে পৰিৱৰ্তনগামী বিজেপি নেতৃত্বাধীন মিত্ৰজোঁটৰ চৰকাৰক দাবী জনাইছে ভুক্তভোগী ৰাইজে ।
