দুটা ভেকছিন গ্ৰহণ কৰাৰ পাছতো বুষ্টাৰ টিকাকৰণ কৰাটো জৰুৰী নেকি? এই বিষয়ে যথেষ্ট সন্দেহ আছে ৰাইজৰ মাজত । ইয়াৰ কাৰণ হৈছে দুটা ভেকছিন লোৱাৰ পাছতো বহুতো লোক ক’ভিডত আক্ৰান্ত হৈছে আৰু ইয়াতেই প্ৰশ্ন উত্থাপিত হয় যে অধিক ৰোগ প্ৰতিৰোধ ক্ষমতা বৃদ্ধি কৰিবলৈ বুষ্টাৰ টিকাকৰণ প্ৰয়োজনীয় নেকি।
সেই শংকা দূৰ কৰিবলৈ আগবাঢ়ি আহিছে ভাৰতীয় চিকিৎসা গৱেষণা পৰিষদৰ (আইচিএমআৰ) মুখ্য চিকিৎসক বলৰাম ভাৰ্গৱ।
তেওঁৰ দাবী, ৰোগ প্ৰতিৰোধ ক্ষমতা বৃদ্ধি কৰিবলৈ আৰু পুনৰ-ক’ভিড সংক্ৰমণ প্ৰতিৰোধ কৰিবলৈ বুষ্টাৰ ভেকছিনৰ কোনো প্ৰয়োজন নাই।
ভাৰ্গৱে কয় যে এই ভেকছিনটো গ্ৰহণ কৰিব লাগিব বুলি কোনো বৈজ্ঞানিক প্ৰমাণ নাই। তেওঁ কয়, “এতিয়া মুখ্য লক্ষ্য হৈছে ভাৰতকে ধৰি সমগ্ৰ বিশ্বৰ সকলো প্ৰাপ্তবয়স্কৰ দ্বিতীয় ভেকছিন সম্পূৰ্ণ কৰা। কিন্তু বুষ্টাৰ ভেকছিন ল’ব লাগিব বুলি কোনো বৈজ্ঞানিক প্ৰমাণ নাই। “
কেন্দ্ৰৰ ভেকছিন সম্পৰ্কীয় বিশেষজ্ঞ সমিতি টিকাকৰণৰ ওপৰত ৰাষ্ট্ৰীয় কাৰিকৰী পৰামৰ্শদাতা গোটে (এনটিএজিআই) বুষ্টাৰ টিকাকৰণৰ প্ৰয়োজন আছে নে নাই সেই বিষয়ে আলোচনা কৰাৰ কথা আছে।
তাৰ ঠিক আগতে, আইচিএমআৰ প্রধানৰ এই দাবীৰ চাৰিওফালে বিভিন্ন মহলত আলোচনা আৰম্ভ হৈছে। বুষ্টাৰ ভেকছিনৰ একেবাৰে প্ৰয়োজন আছে নে নাই সেই বিষয়ে কৌতূহল উত্থাপন কৰা হৈছে।
সম্প্ৰতি ৰাজস্থান চৰকাৰে শেহতীয়াকৈ কেন্দ্ৰক বুষ্টাৰ ভেকছিন ব্যৱহাৰ কৰিবলৈ অনুমতি দিবলৈ আহ্বান জনাইছিল। কিন্তু কেন্দ্ৰই সন্মত হোৱা নাই।
কেন্দ্ৰীয় স্বাস্থ্য মন্ত্ৰী মনসুখ মাণ্ডৱিয়াই কয়, “কেন্দ্ৰই এই সন্দৰ্ভত কোনো প্ৰত্যক্ষ সিদ্ধান্ত ল’ব নোৱাৰে। যেতিয়া আইচিএমআৰে কয় যে বুষ্টাৰ টিকাকৰণ প্ৰয়োজন, তেতিয়া চৰকাৰে বিষয়টো বিবেচনা কৰিব। এতিয়া চৰকাৰৰ মূল লক্ষ্য হৈছে সকলো দেশবাসীৰ দুটা টিকাকৰণ সম্পূৰ্ণ কৰা। “
