এইমছ্‌ত অচিনাক্ত ফাংগাছ সংক্ৰমণত দুজনৰ মৃত্যু : চিন্তিত চিকিৎসক

ৰাষ্ট্ৰীয় ৰাজধানী দিল্লীত ‘ব্লেক’ আৰু ‘হোৱাইট’ ফাংগাছ অৰ্থাৎ ভেঁকুৰজনিত সংক্ৰমণৰ ঘটনাৰ পাছত এইবাৰ এবিধ নতুন ধৰণৰ ফাংগাছৰ সংক্ৰমণৰ ফলত দুজন ৰোগীৰ মৃত্যু হোৱা ঘটনাই চিকিৎসকসকলক চিন্তিত কৰি তুলিছে ।

নতুন দিল্লীৰ অখিল ভাৰতীয় আয়ুৰ্বিজ্ঞান প্ৰতিষ্ঠান (এইমছ্‌)ৰ চিকিৎসকে দুজন ৰোগীৰ শৰীৰত অচিনাক্ত ভেঁকুৰজনিত সংক্ৰমণ চিনাক্ত কৰিছিল । চিকিৎসাধীন অৱস্থাত এই দুজন ৰোগীৰ মৃত্যু হ’ল ।

চিকিৎসকে প্ৰকাশ কৰা অনুসৰি, বিভিন্ন দৰৱ প্ৰয়োগ কৰা হৈছিল যদিও সংক্ৰমণ প্ৰতিৰোধৰ ক্ষেত্ৰত কোনো ফলাফল লাভ কৰা নহ’ল । এই ফাংগাছ এস্পৰজিলিয়াছ লেণ্টুলাছ প্ৰজাতিৰ আছিল । এই প্ৰজাতিৰ ফাংগাছে মানৱ দেহৰ হাওঁফাওঁক আক্ৰান্ত কৰে ।

২০০৫ত প্ৰথমবাৰৰ বাবে এই প্ৰজাতিৰ ফাংগাছক চিনাক্ত কৰা হৈছিল আৰু বৰ্তমানলৈকে বিশ্বৰ কে’বাখনো দেশত এনে ভেঁকুৰজনিত সংক্ৰমণ ধৰা পৰিছে ।