কৰ’না ভাইৰাছৰ নতুন ৰূপ ‘অ’মিক্র’ন’ৰ সংক্রমণ ৰোধ কৰিবলৈ দক্ষিণ আফ্রিকা আৰু বৎছোয়ানাৰ পৰা চলাচল নিষিদ্ধ কৰিছে বহু দেশে । অন্যান্য দেশেও হয়তো সেই পথ অৱলম্বন কৰিব পাৰে, যিহেতু প্রাথমিকভাৱে এই দুয়োখন দেশতেই ক’ভিড ৰোগীসকলৰ শৰীৰত ভাইৰাছৰ নতুন ৰূপৰ অধিক সংক্রমণ ঘটা দেখা গৈছে ।
কিন্তু বিশেষজ্ঞসকলৰ একাংশৰ বক্তব্য, কেৱল এই দুখন দেশৰ বাবে সীমান্ত বন্ধ কৰিলেই অ’মিক্র’ন সমস্যা সমাধান নহয় আৰু বহু কাম কৰিব লাগিব । তাৰ বাবে কেন্দ্রীয় চৰকাৰে কিছুমান নীতি ঘোষণা কৰিব পাৰে ।
বিশেষজ্ঞসকলে জনাইছে, কেন্দ্রীয় চৰকাৰে কি কি কৰিব লাগিব সেইটো অবিলম্বে চূড়ান্ত কৰিব লাগিব । ইয়াৰ উপৰি আগতেই ভাবি ল’ব লাগিব কি কি কৰা উচিত নহ’ব ।
তেওঁলোকৰ মতে, অ’মিক্র’নৰ সংক্রমণ ৰোধ কৰিবলৈ কেন্দ্রীয় চৰকাৰে সম্প্ৰতি ১০টা কাম কৰিব লাগিব । পাঁচটা কাম সম্পৰ্কে অতি সতর্ক হ’ব লাগিব ।
বিশেষজ্ঞসকলৰ মতে, সম্প্ৰতি কেৱল ঘৰুৱা সমাৱেশৰ ওপৰতেই নিষেধাজ্ঞা জাৰি কৰা উচিত কেন্দ্রীয় চৰকাৰে । দেশৰ সর্বত্র প্রকাশ্য সমাৱেশত নিষেধাজ্ঞা জাৰি কৰাই সুফল নিদিব । ফলত দেশৰ অর্থনীতিৰ ক্ষতি হ’ব । সেয়া পূৰ্বৰ তিনিটা তৰংগত দক্ষিণ আফ্রিকাত হৈছে ।
অভ্যন্তৰীণ আৰু আন্তর্জাতিক উৰানো বন্ধ কৰি দিয়া উচিত নহ’ব বুলি জনাইছে বিশেষজ্ঞসকলে । পূৰ্বৰ অভিজ্ঞতাত দেখা গৈছে দেশত উৰানৰ ওপৰত নিষেধাজ্ঞা জাৰি কৰি বিশ্বব্যাপী কৰ’না সংক্রমণৰ গতি ৰোধ কৰিব নোৱাৰি । সেয়া কেৱল কোনো দ্বীপৰাষ্ট্রতে সম্ভৱ হ’ব বুলি মত তেওঁলোকৰ । সম্পূৰ্ণ নিষেধাজ্ঞা জাৰি নকৰি সেই ক্ষেত্রত কোনো ৰাজ্য বা দেশৰ পৰা ওলোৱা আৰু কোনো ৰাজ্য বা দেশত প্ৰৱেশ কৰাৰ সময়ত বিমানযাত্রীসকলৰ পৰীক্ষা কৰা ব্যৱস্থাক আৰু শক্তিশালী কৰি তোলা উচিত চৰকাৰৰ ।
এনে কোনো নীতি ঘোষণা কৰা উচিত নহয় যিটো চৰকাৰে শিথিল কৰিব নোৱাৰে । যথা সম্ভৱ শীঘ্ৰে জনসাধাৰণক প্ৰতিষেধকৰ দুটা পালি দিয়াত গুৰুত্ব দিব লাগিব । সংক্রমণৰ মাধ্যমত দেশৰ জনসাধাৰণৰ সার্বিক স্বাভাৱিক প্রতিৰোধ ক্ষমতা (হার্ড ইমিউনিটি) গঢ়ি উঠিব এই ধাৰণাৰ পৰাও চৰকাৰে যিমান সোনকালে সম্ভৱ ওলাই অহা উচিত ।
সম্প্ৰতি চৰকাৰৰ কি কি কৰনীয় তাৰো ১০টা পৰামর্শ দিছে বিশেষজ্ঞসকলে ।
তাৰ ভিতৰত অন্যতম — নতুন সংক্রমণৰ বিৰুদ্ধে যুঁজ দিবলৈ দেশৰ হাস্পাতালসমূহৰ শয্যা সংখ্যা পর্যাপ্ত হয় নে নহয় আগতেই নীৰিক্ষণ কৰিব লাগিব । সকলোকে প্ৰতিষেধকৰ দুটা পালি দিয়া । দেশৰ সকলো ৰাজ্যত চলাচলৰ বাবে টিকা পাছপ’র্ট আৰম্ভ কৰা । যিসকলে টিকা ল’ব নিবিচাৰে বা কোনো কাৰণত টিকা নলয় তেওঁলোকক যিকোনো প্ৰকাৰে বুজাই টিকা দিয়া । বুষ্টাৰ টিকা দিয়া । টিকাকৰণৰ বিষয়ত স্বাস্থ্যকর্মীসকলৰ সচেতনতা বৃদ্ধি কৰা । প্রতিখন ৰাজ্যৰ চৰকাৰী আৰু বেচৰকাৰী হাস্পাতালসমূহত সম্ভাব্য ক’ভিড ৰোগীসকলৰ বাবে শয্যা আছে নে নাই পৰ্যবেক্ষণ কৰা । পূৰ্বৰ তৰংগসমূহত কৰা ভুলৰ পৰা শিক্ষা লোৱা আৰু ৰাজনীতিৰ ঊর্ধ্বত উঠি বিজ্ঞানকেই প্রাধান্য দিয়া । এই ভাইৰাছৰ স’তেই যে আমি বহু বছৰলৈকে জীয়াই থাকিব লাগিব তাৰ বাবে প্রস্তুতি কৰা ।