বদৌচা স্প’ৰ্টছ ক্লাৱৰ উদ্যোগত, অসম ক্ৰীড়া সন্থাৰ তত্বাৱধানত অসমৰ ১৬টা স্থানত আজিৰ পৰা আৰম্ভ হৈছে আন্ত:ৰাষ্ট্ৰীয় আমন্ত্ৰণমূলক ১৩ সংখ্যক “বদৌচা কাপ ২০২১” ফুটবল প্ৰতিযোগিতা । আজি প্ৰথম দিনাৰ উদ্ধোধনী খেল ৰাজ্যৰ আন দুটা স্থানৰ লগতে বালিজান ৰাজহুৱা খেলপথাৰতো অনুষ্ঠিত হয় ।
অসম-অৰুণাচল সীমান্তৰ বালিজান ৰাজহুৱা খেলপথাৰত অনুষ্ঠিত হোৱা উদ্ধোধনী খেলৰ পতাকা উত্তোলন কৰে বদৌচা স্প’ৰ্টছ ক্লাৱৰ উপ-সভাপতি নিলকান্ত ফুকনে আৰু স্মৃতি তৰ্পণ কৰে জয়ন্ত দহোটীয়াই । ১৩ সংখ্যক বদৌচা কাপৰ বালিজান ৰাজহুৱা খেলপথাৰত গ্ৰুপ এইছ-ৰ আজিৰ খেল অনুষ্ঠিত হয় আপাৰ আছাম এফ চি বনাম নৱজ্যোতি এফ চি কৰদ্দৈগুৰিৰ মাজত ।
আপাৰ আছাম এফ চি দলে নৱজ্যোতি এফ চি কৰ্দ্দৈগুৰি দলক ২-০ গ’লত পৰাস্ত কৰি সম্পূৰ্ণ পইণ্ট লাভ কৰে । আপাৰ আচাম এফ চি দলৰ হৈ ২৫ আৰু ৩৮ মিনিটত দুটাকৈ গ’ল দিয়ে মহেশ পুৰাণে । মুখ্য পৰিচালক হিচাপে খেল পৰিচালনা কৰে বিদ্যুত বৰুৱাই, সহযোগী পৰিচালক হিচাপে ৰিয়াজ চুতীয়া, ৰকি চাউৰকে সহায় কৰে, চতুৰ্থ ৰেফাৰী হিচাপে সহযোগ কৰে ইনুত চাউৰকে ।
আজিৰ খেলৰ শ্ৰেষ্ঠ খেলুৱৈ সন্মান লাভ কৰে আপাৰ আছাম এফ চি দলৰ মহেশ পুৰাণে । খেল উদ্ধোধন কৰে ফিল’বাৰী চাহ বাগিচাৰ পৰিচালক ভজন পাল সিঙে । কালিলৈ আন এখন খেল অনুষ্ঠিত হ’ব কাকপথাৰ এফ চি আৰু ডুমডুমা মৰনিং ক্লাৱৰ মাজত ৷