নাগালেণ্ডত গাঁওবাসীৰ মৃত্যুৰ ঘটনাই উত্তেজনাৰ সৃষ্টি নকৰিবৰ বাবে মন জিলাত ইন্টাৰনেট আৰু এছএমএছ সেৱা বন্ধ ৰখাৰ নির্দেশে দিলে প্রশাসনে । ঘটনাটো কেন্দ্র কৰি ইতিমধ্যে ৰাজ্যজুৰি উত্তেজনাৰ সৃষ্টি হৈছে । সেই উত্তেজনা যাতে আৰু বৃদ্ধি নহয় তাৰ বাবেই এই নির্দেশ দিছে গৃহ কমিছনাৰ অভিজিৎ সিঙে ।
নির্দেশনা অনুসৰি, হোৱাটছএপ্, ফেচবুকৰ মাধ্যমত যাতে ভুৱা খবৰ বা ছবি বিয়পি নপৰে তাৰ বাবে এই সিদ্ধান্ত লোৱা হৈছে । পৰৱর্তী নির্দেশ নিদিয়া পর্যন্ত এই সিদ্ধান্ত বাহাল থাকিব বুলি জনাইছে ।
শনিবাৰে সন্ধিয়া সন্ত্রাসবাদীসকলৰ সন্ধানত মন জিলাৰ অ’টিং গাঁৱত অভিযান চলায় অসম ৰাইফলছে । সেই সময়ত সেনা বাহিনীৰ গুলিত নিহত হয় ১৫ জন গাঁওবাসী । আৰক্ষীয়ে জনাইছে, এই ঘটনাত এজন জোৱানো নিহত হৈছে । সমগ্ৰ পৰিস্থিতিটোক লৈ জিলাজুৰি উত্তেজনাৰ সৃষ্টি হৈছে । এই উত্তেজনা যাতে বিয়পি নপৰে তাৰ বাবে প্রশাসনে ইন্টাৰনেট আৰু এছএমএছ সেৱা বন্ধৰ নির্দেশ দিছে । অৱশ্যে কেৱল অ’টিং জিলাতেই এই সিদ্ধান্ত জাৰি কৰা হৈছে । এই নির্দেশ অমান্যকাৰীক গ্রেপ্তাৰ কৰা হ’ব বুলিও জনোৱা হৈছে ।
ঘটনাটোক কেন্দ্র কৰি অ’টিং গাঁৱত যথেষ্ট উত্তেজনাৰ সৃষ্টি হৈছে । মুখ্যমন্ত্রীয়ে ইতিমধ্যেই এই গুলি চালনা ঘটনাৰ তদন্তত এটা বিশেষ দল গঠন কৰাৰ নির্দেশ দিছে ।
