দিল্লীৰ সীমান্তত বিগত ১৫ মাহৰ অধিক কাল ধৰি বিতৰ্কিত কৃষি আইনৰ বিৰুদ্ধে চলি থকা আন্দোলনৰ সমাপ্তি ঘটালে প্ৰতিবাদী কৃষকে । কেন্দ্ৰীয় চৰকাৰৰ পৰা আনুষ্ঠানিক পত্ৰ লাভৰ পাছতে তেওঁলোক আন্দোলন প্ৰত্যাহাৰৰ সিদ্ধান্ত ঘোষণা কৰে । অহা ১১ ডিচেম্বৰত এই মৰ্মে কৃষকসকলে আন্দোলনৰ অন্ত পেলাব আৰু ঘৰলৈ উভতি যাব ।
বৃহস্পতিবাৰে সন্ধিয়া ৫-৩০ বজাত কৃষকসকলৰ ইউনিয়নসমূহে বিজয় প্ৰাৰ্থনা কৰে । অহা ১১ ডিচেম্বৰৰ পুৱা ন বজাত দিল্লীৰ সীমান্তৰ সিংঘু আৰু টিকৰিৰ প্ৰতিবাদস্থলীত তেওঁলোকে বিজয় সমদল কৰিব বুলি প্ৰকাশ কৰে । তদুপৰি ১৩ ডিচেম্বৰত পঞ্জাৱৰ কৃষক নেতাসকলে অমৃতসৰৰ স্বৰ্ণ মন্দিৰত প্ৰাৰ্থনা জনাব । আনহাতে, ১৫ ডিচেম্বৰত সংযুক্ত কিষাণ মৰ্চা (এছ কে এম)ৰ আন এখন বৈঠক সম্পন্ন কৰা হ’ব ।
নৰেন্দ্ৰ মোদীৰ চৰকাৰে বুধবাৰে এছ কে এমৰ পাঁচজনীয়া সমিতিলৈ এখন লিখিত খচৰা প্ৰস্তাৱ প্ৰেৰণ কৰে । যোৱা ২১ নৱেম্বৰত এই সংগঠনটোৱে ছটা দাবী উত্থাপন কৰি পত্ৰ প্ৰেৰণ কৰিছিল । কেন্দ্ৰই দাবী মানি পদক্ষেপ গ্ৰহণৰ প্ৰস্তাৱ প্ৰেৰণৰ পাছতে কৃষকসকলে এই সিদ্ধান্ত লয় । এই সম্পৰ্কে আনুষ্ঠানিক পত্ৰ লাভৰ পাছত বৃহস্পতিবাৰে বৈঠকত মিলিত হৈ সহমতৰ ভিত্তিত ৩৭৮ দিনৰ আন্দোলনৰ সম্প্ৰতি অন্ত পেলোৱাৰ সিদ্ধান্ত লয় ।
কেন্দ্ৰই প্ৰস্তাৱযোগে ফুলৰ ন্যূনতম সমৰ্থিত মূল্য (এম এছ পি)ৰ সিদ্ধান্ত গ্ৰহণৰ বাবে এখন সমিতি গঠন কৰিবলৈ সন্মত হয় । এই সমিতিত থাকিব চৰকাৰী বিষয়া, কৃষি বিশেষজ্ঞ আৰু আকৃষ্ট ইউনিয়নসমূহৰ ছত্ৰ সংগঠন এছ কে এমৰ প্ৰতিনিধি । কৃষকসকলৰ বিৰুদ্ধে থকা সকলো আৰক্ষীৰ গোচৰ প্ৰস্তাৱমৰ্মে বাতিল কৰিব চৰকাৰে । আন্দোলনৰ সময়ত কৃষকৰ বিৰুদ্ধে কৰা গোচৰ প্ৰত্যাহাৰ বিষয়ত উত্তৰ প্রদেশ, উত্তৰাখণ্ড, হাৰিয়ানা, মধ্যপ্ৰদেশ, হিমাচল প্ৰদেশে সন্মতি প্ৰকাশ কৰা বুলি কেন্দ্ৰই পত্ৰযোগে জনাইছে । কেন্দ্ৰীয় চৰকাৰৰ অধীনস্থ সংস্থাসমূহেও সকলো গোচৰ প্ৰত্যাহাৰ কৰিব । তদুপৰি আন ৰাজ্যসমূহকো প্ৰত্যাহাৰ কৰিবলৈ অনুৰোধ জনোৱাৰ কথা পত্ৰত উল্লেখ কৰা হৈছে ।
চিঠিত দিয়া আশ্বাস অনুসৰি, বিদ্যুৎ আইন সংশোধনী বিধেয়ক প্ৰসংগত কৃষকৰ আপত্তিৰ বিষয়সমূহক লৈ সকলোৰে স’তে আলোচনা কৰা হ’ব । তদুপৰি দিল্লীৰ সমীপৱৰ্তী অঞ্চলত খেতিৰ নৰা দাহন সম্পৰ্কীয় গোচৰসমূহ প্ৰত্যাহাৰ কৰা হৈছে । পত্ৰত কেন্দ্ৰীয় চৰকাৰে আন্দোলনত মৃত কৃষকৰ ক্ষতিপূৰণ আদায়ৰ কোনো আশ্বাস দিয়া নাই যদিও জনাইছে যে হাৰিয়ানা, উত্তৰ প্রদেশে এই ক্ষেত্ৰত সন্মতি জনাইছে ।
ইতিমধ্যে পঞ্জাৱ চৰকাৰে এই ঘোষণা কৰিছে । এই পৰ্যন্ত কমেও সাতশ কৃষকে প্ৰতিবাদ কালত প্ৰাণ হেৰুৱাইছে । এইসকলৰ পৰিয়ালে ক্ষতিপূৰণ পাব । দিল্লীত কৃষকৰ বিৰুদ্ধে ৰুজু হোৱা গোচৰ প্ৰত্যাহাৰ কৰা হ’ব । উল্লেখ্য যে ইতিমধ্যে তিনিখন বিতৰ্কিত আইন বাতিল কৰিছে কেন্দ্ৰই ।
বিগত সপ্তাহত কেন্দ্ৰীয় গৃহমন্ত্ৰী অমিত শ্বাহে কৃষকৰ স’তে টেলিফোনিক বাৰ্তালাপ কৰে ।