প্ৰথমবাৰৰ বাবে অসমত উৎপাদিত ১০ লাখ মেট্ৰিক টন ধান ভাৰতীয় খাদ্য নিগম (এফচিআই)কে মুখ্য কৰি কে’বাটাও সংস্থাই ক্ৰয় কৰিব । কালি বিধানসভাত এই কথা সদৰী কৰে মুখ্যমন্ত্ৰী হিমন্ত বিশ্ব শৰ্মাই । সংস্থাসমূহে ক্ৰয় কৰা ধানৰ পৰিমাণ বৃদ্ধি কৰিবলৈ মুখ্যমন্ত্ৰীয়ে সকলো বিধায়কক পথৰ উন্নয়নৰ বাবে গ্ৰহণ কৰি অহা সক্ৰিয়তাৰ দৰে নিজ নিজ সমষ্টিত ধান ভঙা কল আৰু গুদামঘৰ স্থাপনতো অগ্ৰাধিকাৰ দিবলৈ আহ্বান জনায় ।
উল্লেখ্য যে এফচিআয়ে অসমৰ পৰা ক্ৰয় কৰা ধানৰ পৰিমাণক লৈ কালি বিধানসভাত কে’বাটাও প্ৰশ্ন উত্থাপন হয় । এইসমূহৰ উত্তৰ হিচাপে মুখ্যমন্ত্ৰীয়ে এই বক্তব্য আগবঢ়োৱাৰ লগতে কয়, ‘এফচিআয়ে চাউল নিকিনে । ধানহে ক্ৰয় কৰে । নিজ নিজ সমষ্টিৰ কৃষকে যাতে ধান বিক্ৰী কৰিবলৈ সক্ষম হয় তাৰ বাবে বিধায়কসকলে উদ্যোগ লওক । ধান ক্ৰয় কেন্দ্ৰ ক’ত স্থাপন কৰিলে সুবিধা হ’ব সেই সিদ্ধান্তও বিধায়কসকলে ল’ব লাগিব । এফচিআয়ে ধান ক্ৰয় কৰি তাতেই চাউললৈ পৰিৱৰ্তন কৰে । মুখ্যমন্ত্ৰী গ্ৰাম যোজনাৰ পৰা ধান ভঙা কল স্থাপন আৰু গুলাম ঘৰ স্থাপনৰ সুযোগ কৃষকে ল’ব লাগে । এফচিআয়ে সৰ্বভাৰতীয় পৰ্যায়ত ধাৰ্য কৰা প্ৰতি কুইণ্টল ধান অসমতো ক্ৰয় কৰিব । প্ৰতি কুইণ্টল ধানৰ ন্যূনতম সমৰ্থিত মূল্য হ’ল ১,৯৪০ টকা । সেই ধন উৎপাদকৰ বেংক একাউণ্টত প্ৰত্যক্ষভাৱে সোমাব । পঞ্জাৱ, হাৰিয়ানাৰ দৰে আমাৰ কৃষকেও ধন পাব । গতিকে ইয়াত মধ্যভোগীৰ কথা নাহে ।’
মুখ্যমন্ত্ৰীয়ে লগতে কয় যে ধান ক্ৰয়ৰ ক্ষেত্ৰত এফচিআয়ে কৃষকৰ মাটিৰ কাগজ-পত্ৰ বিচাৰে । অসমৰ ক্ষেত্ৰত এইবাৰ সেই নিয়ম শিথিল কৰিছে । গতিকে কৃষকসকলৰ যাতে মাটিৰ কাগজ-পত্ৰ থাকে তাৰ উদ্যোগো বিধায়কসকলক ল’বলৈ তেওঁ আহ্বান জনায় । ইয়াৰ বাবে অসম চৰকাৰৰ বসুন্ধৰা আঁচনিৰ সহায় ল’বলৈ তেওঁ বিধায়কসকলক পৰামৰ্শ আগবঢ়ায় । এই সকলোবোৰ হৈ উঠিলে খাদ্য নিগমে অসমৰ পৰা ২০ লাখ কুইণ্টল পৰ্যন্ত ধান ক্ৰয় কৰিব বুলি বিধানসভাক অৱগত কৰে ।
জনিয়াৰ বিধায়ক ৰফিকুল ইছলামে ধান ভঙা কল আৰু গুদাম স্থাপনত চৰকাৰে সহযোগ কৰিব লাগে বুলি কয় । মুখ্যমন্ত্ৰীয়ে তেতিয়া কয়, ‘মইতো সেয়াই কৈ আছো । চৰকাৰে সহযোগ কৰিব । উদ্যোগ ল’ব লাগিব বিধায়কে । আপোনালোকে লওক । আমিতো আৰু জনিয়া-বাঘবৰলৈ নাযাও ।’
প্ৰসংগক্ৰমে উল্লেখ মে, বিধায়ক মনোৰঞ্জন তালুকদাৰৰ প্ৰশ্নৰ উত্তৰত কৃষিমন্ত্ৰী অতুল বৰাই সদৰী কৰে যে অসমত ধানৰ মুঠ উৎপাদন পৰ্যাপ্ত পৰিমাণে বৃদ্ধি হৈছে । ২০১৭-১৮ত উৎপাদিত ধানৰ পৰিমাণ আছিল ৮২,৪০,৯৭৪ মেট্ৰিকটন । ২০১৮-১৯ত উৎপাদন হয় ৮৯,২৯,৯৯৩ মেট্ৰিকটন আৰু ২০১৯-২০ত উৎপাদন হয় ৮১,২১,৫২৮ মেট্ৰিকটন । অসমত এফচিআইৰ উপৰি ধান ক্ৰয় কৰা সংস্থাকেইটা নাফেদ, এনএচিঅ’এফ, এএফচিএছচিএল, এনচিচিএফ আৰু এএছএমবি বুলি মন্ত্ৰী বৰাই সদৰী কৰে ।
ইপিনে, বিধায়ক অখিল গগৈৰ এক প্ৰশ্নৰ উত্তৰত বৰাই সদৰী কৰে যে ২০২০-২১ত অসমৰ ২.১১ লাখ মেট্ৰিকটন ধান এই সংস্থাবোৰে ক্ৰয় কৰিছিল । ২০১৯-২০ত ক্ৰয় কৰা পৰিমাণ আছিল ৩.১৫ লাখ মেট্ৰিকটন । ২০১৮-১৯ত ক্ৰয় কৰিছিল ১.৫৩ লাখ মেট্ৰিকটন । ২০১৭-১৮ আৰু ২০১৬-১৭ত সেই পৰিমাণ আছিল ক্ৰমে ০.৫৩ লাখ মেট্ৰিকটন আৰু ০.৬৯ লাখ মেট্ৰিকটন । ইয়াৰ বিপৰীতে এইবাৰ ১০ লাখ মেট্ৰিকটন ধান ক্ৰয় কৰাৰ লক্ষ্য ধাৰ্য কৰা হৈছে ।
প্ৰথমবাৰৰ বাবে এনে বৃহৎ পৰিমাণৰ ধান ক্ৰয়ৰ লক্ষ্য সংস্থাবোৰে লৈছে যদিও এই পৰ্যন্ত অসমত ক্ৰয় কেন্দ্ৰবোৰ সম্পূৰ্ণকৈ স্থাপন নকৰাৰ অভিযোগ কৰে মনোৰঞ্জন তালুকদাৰে । তেওঁ কয়, ‘বিক্ৰী কেন্দ্ৰ এতিয়ালৈ খোলাই নাই । ডিচেম্বৰৰ প্ৰথমতে ধান ক্ৰয় আৰম্ভ হ’ব লাগিছিল, কিন্তু নাই হোৱা । তদুপৰি য’ত প্ৰয়োজন তাতহে কেন্দ্ৰ স্থাপন কৰিব লাগে; কিন্তু বহুক্ষেত্ৰত তাৰ বিপৰীতহে হোৱা দেখা গৈছে ।’ ইয়াৰ ভিতৰত মন্ত্ৰী বৰাই কয় যে ইতিমধ্যে বিক্ৰী আৰম্ভ হৈছে । কিন্তু অসমৰ ধানত আৰ্দ্ৰতা বেছি থকা বাবে অলপ অসুবিধা হৈছে । অখিল গগৈয়ে তেতিয়া কয় যে অলপ ৰ’দাই দিলেই আৰ্দ্ৰতা কমি যায় । ধান বিক্ৰী কৰা সন্দৰ্ভত কৃষকসকলৰ মাজত সজাগতা সৃষ্টিৰ তেওঁ আহ্বান জনায় ।
এই আলোচনাত বিপিএফৰ বিধায়ক দুৰ্গা দাস বড়োৱে অংশ লৈ অভিযোগ কৰে যে দৰং জিলাত যথেষ্ট পৰিমাণৰ ধান উৎপাদন হয় অথচ কোনো কৃষি বিষয়াই ক’ত ধান বিক্ৰী কেন্দ্ৰ স্থাপন কৰিব সেই বিষয়ে বিধায়ককো অৱগত কৰা নাই । বিগত বৰ্ষত ধান বিক্ৰী কৰি লাভবান হোৱা ৭০ শতাংশই মধ্যভোগী আছিল বুলি বড়োৱে উল্লেখ কৰে । ইয়াৰ ফলত অধিকাংশ প্ৰকৃত কৃষকে উচিত মূল্য লাভৰ পৰা বঞ্চিত হয় । তেতিয়া মন্ত্ৰী বৰাই কয়, ‘কৃষকে যাতে উৎপাদিত ফচল বিক্ৰী কেন্দ্ৰ তথা বজাৰলৈ আনিব পাৰে তাৰ বাবে ৰাজসাহায্য দি এহেজাৰ বাহন কৃষকক দিয়াৰ ব্যৱস্থা আমি গ্ৰহণ কৰিছো ।’