এটা ক’লা শিলৰ ফলক, তাত খোদিত কৰা আছে বহু নাম — আফগানিস্তানৰ গজনি প্রদেশৰ গভর্নৰৰ বাসভৱনৰ চৌহদৰ সেই ফলকক লৈ ভিৰ কৰিছে তালিবান যোদ্ধাসকলে । আমেৰিকাৰ শাসনকালত প্রদেশখনৰ দায়িত্বত থকা সেনাকর্তাসকলৰ নাম এই শিলত খোদিত কৰা আছে । লগতে সেনা আধিকাৰীসকলৰ পদমর্যাদাও লিখা আছে এই শিলত । সেই ফলকখনকেই জনসাধাৰণৰ প্রদর্শনৰ যো-জা কৰিছে তালিবানে । আমেৰিকান সেনাৰ মহিমা প্রচাৰৰ বাবে নহয়, বৰঞ্চ ২০ বছৰৰ দীর্ঘ যুঁজৰ পাছত আমেৰিকান সেনা উৎখাতৰ প্রতীক দাঙি ধৰিবলৈ এই প্রদর্শনৰ আয়োজন ।
তালিবানৰ গজনিৰ সাংস্কৃতিক শাখাৰ প্রধান মোল্লা হাবিবুল্লা মুজাহিদে জনায় যে, তেওঁলোকে এই শিলৰ ফলকখন প্রদর্শনৰ জৰিয়তে আফগানবাসী, বিশ্ব আৰু ভৱিষ্যৎ প্রজন্মক স্বঘোষিত পৰাক্রমশালী আমেৰিকান বাহিনীক পৰাজিত কৰিছে বুলি জনাব বিচাৰে ।
বিগত বৰ্ষৰ ১২ আগষ্টত দক্ষিণ কাবুলৰ ১৫০ কিলোমিটাৰ দূৰত্বত গজনি চহৰ তালিবানে দখল কৰিছিল । ঠিক তিনিদিন পাছতেই কাবুল দখলৰ লগতে সমগ্ৰ দেশত তালিবানৰ নিৰংকুশ আধিপত্য প্রতিষ্ঠিত হয় ।
৩৫০০ বছৰৰ নানা ঐতিহাসিক ঘটনাত সমৃদ্ধ এই গজনি । অৱশ্যে প্রাচীন ইতিহাস নহয়, মছনদ দখলৰ পাছত নিজৰ বিজয়গাথাৰ ইতিহাসক সযত্নে দাঙি ধৰিবলৈ আগ্রহী তালিবান নেতৃত্ব ।
বর্তমান চৰম আর্থিক সংকটৰ সন্মুখীন হৈছে সমগ্ৰ আফগানিস্তানে । ৰাষ্ট্রসংঘৰ হিচাপ অনুযায়ী, দেশৰ অর্ধেক সংখ্যক লোকেই খাদ্যৰ অভাৱত পৰিছে । এনে পৰিস্থিতিত চৰকাৰ বিৰোধী মনোভাৱ যাতে গা কৰি নুঠে, তাৰ বাবে নিজৰ মহিমা প্রচাৰ কৰিবলৈ তালিবানৰ এই কৌশল বুলি ধাৰণা কৰা হৈছে । চহৰৰ বাহিৰত পথৰ ওপৰতো তালিবানৰ এনে ধৰণৰে বিজয়-ফলক দাঙি ধৰা হৈছে । কোনো কোনো ঠাইত আমেৰিকান সেনাৰ ব্যৱহৃত পৰিত্যক্ত গাড়িও প্রদর্শন কৰা হৈছে । যদিও অস্ত্র-শস্ত্র সকলো সম্বৰণ কৰা হৈছে । কেৱল গাড়ী নহয়, বিগত দুই দশকত আমেৰিকান সেনাৰ ব্যৱহৃত এনে বহু দ্রব্যই সমগ্ৰ দেশত বিস্তাৰিত হৈ পৰিছে । ইয়াৰ পূৰ্বে ছোভিয়েত ইউনিয়নকো বাধা দিছিল তালিবানে । সেই সময়ত ছোভিয়েতে এৰি যোৱা টেংকত এতিয়া খেলে শিশুসকলে । ব্রিটিছৰ শাসনৰ পৰা মুক্তিৰ ইতিহাসো দাঙি ধৰিবলৈ ইচ্ছুক তালিবান ।
১৮ বছৰৰ তালিব যোদ্ধা ওজেইৰে কয়, ‘‘বিজয়ৰ চিহ্ন হিচাপে এইবোৰ দেখিলে গর্ব অনুভৱ কৰো । তিনিটা বিদেশী শক্তিক পৰাভূত কৰি স্বাধীনতা লাভ কৰিছো আমি । আমি চাব বিচাৰো যে, আমেৰিকাকো পৰাজিত কৰাৰ শক্তি আছে আফগানসকলৰ ।’’
আগষ্টত তালিবানে দেশ দখল কৰাৰ পাছত বহু অস্ত্র, গাড়ী, পোছাক এৰি গৈছে আমেৰিকান সেনাই । অৱশ্যে এতিয়াই সকলোখিনি প্রদর্শনৰ ব্যৱস্থা কৰিব পৰা নাই তালিবানে ।