কৃষিকৰ্মৰে বছৰি লাখ লাখ টকা উপাৰ্জন কৰি স্বাৱলম্বীতাৰ নিদৰ্শন দাঙি ধৰিবলৈ সক্ষম হৈছে বাগসাৰ লাৱদাংগুৰী গাঁওৰ ৰবীন বসুমতাৰীয়ে৷
বিগত প্ৰায় ছয় বছৰ ধৰি নিজৰ দহবিঘা কৃষিভূমিত নেমু খেতি কৰি অঞ্চলটোৰ এজন আদৰ্শ কৃষকত পৰিণত হৈছে ৰবীন বসুমতাৰী৷প্ৰতিদিনে দহৰ পৰা পোন্ধৰ গৰাকী শ্ৰমিকক নিজৰ কৃষিকৰ্মত জড়িত কৰি কৰ্মসংস্থাপনৰো বাট দেখুৱাইছে কৃষকগৰাকীয়ে৷
ইতিমধ্যে ওচৰ পাজৰৰ উঠি অহা প্ৰজন্মক বিনামূলীয়াকৈ কৃষিকৰ্মৰ প্ৰশিক্ষণ প্ৰদান কৰাৰ লগতে বিনামূল্যে শ শ নেমুপুলি যোগান ধৰি মহানুভৱতাৰ পৰিচয় দিছে কৃষকগৰাকীয়ে৷উল্লেখ্য যে যোৱাবৰ্ষত লকডাউনে জুৰুলা কৰাৰ পিছতো নেমু বিক্ৰী কৰি সাত লক্ষাধিক টকা উপাৰ্জন কৰাৰ কথা সংবাদ মাধ্যমক জানিবলৈ দিয়ে বসুমতাৰীয়ে৷
চৰকাৰী কোনো অনুদান লাভ নকৰাকৈ নিজৰ একান্ত প্ৰচেষ্টাৰে কৃষিকাৰ্যত জড়িত হৈ এই সফলতা অৰ্জন কৰিছে ৰবীন বসুমতাৰীয়ে৷খেতিয়ক ৰবীন বসুমতাৰীয়ে কয়,’যোৱা ছয়টা বছৰ ধৰি খেতি কৰি আহিছোঁ৷আগতে অলপ মাটিত আৰম্ভ কৰিছিলোঁ যদিও এতিয়া দহবিঘা মাটিত মই নেমু খেতি কৰিছোঁ৷এনেকৈ খেতিৰে ভালেখিনি টকা উপাৰ্জন কৰি আহিছোঁ যদিও কৰ’নাৰ বাবে বিগত সময়ত দিয়া তলাবন্ধৰ বাবে কিছুপৰিমাণে লোকচানৰ সমুখীনো নোহোৱা নহয়৷বজাৰৰ অভাৱত নেমুবোৰ বিক্ৰী কৰিব পৰা নাছিলোঁ৷গছতেই পকি সৰি গৈছিল তেতিয়া সকলো৷তথাপি এতিয়া আকৌ আগৰদৰে উপাৰ্জনৰ পথ সূচল হৈ আহিছে৷গাঁওৰ ১৫/১৬জন মানুহ সদায় মোৰ খেতিত লাগি থাকে৷তেওঁলোকৰ পৰিয়াল চলোৱাৰ ক্ষেত্ৰতো মই কিছু সকাহ দিব পাৰিছোঁ বুলি ভাবি মনত আনন্দ পাইছোঁ৷ ওচৰ চুবুৰীয়াৰ বহু ল’ৰাকো মই নেমু খেতিৰে কেনেকৈ স্বাৱলম্বী হ’ব পাৰি তাৰ প্ৰশিক্ষণ দিয়ো আহিছোঁ৷ইতিমধ্যে মই প্ৰায় সাত হাজাৰ নেমু পুলি চুবুৰীয়াৰ ল’ৰাক বিনামূল্যেই যোগান ধৰিছোঁ৷মোৰ উৎসাহৰ বাবে এতিয়া ইয়াৰে প্ৰায়বোৰ মানুহে নেমু খেতি কৰিবলৈ লৈছে৷কাৰোবাৰ যি অলপ খালী মাটি আছে তাতো নেমু খেতি কৰিবলৈ মন মেলিছে৷এইয়া এই অঞ্চলৰ লোকৰ বাবে শুভলক্ষণ৷ বসুমতাৰীয়ে কয়,কিছুমানে চাকৰিৰ পিছে পিছে দৌৰে৷কিছুমানে পায়,কিছুমানে নাপায়৷বহুতেই আকৌ চাকৰিৰ পিছে পিছে দৌৰি থাকোতেই সময়বোৰ পাৰ হৈ যায়৷চাকৰি পোৱাটো ইমান মামুলি নহয়৷গতিকে চাকৰিৰ পিছে পিছে নদৌৰি এনেকৈ খেতিৰ জৰিয়তেও স্বাৱলম্বী হোৱাৰ লগতে পৰিয়াল চলোৱাৰ বাট সুন্দৰকৈ মোকোলাই ল’ব পাৰি৷ ‘
বৰ্তমানলৈকে চৰকাৰীভাবে অলপো অনুদান লাভ নকৰা ৰবীন বসুমতাৰীয়ে কয়,’মই চৰকাৰী অনুদান পাতিও লাভ কৰা নাই,হাতত যি আছিল সেই ধনেৰে খেতিৰ আৰম্ভণি কৰিছোঁ৷অৱশ্যে মই ওচৰৰে গাঁৱৰ দুই চাৰিজন মুছলমান ভাই বন্ধুৰ পৰা নেমু খেতিৰ পাতনি কেনেকৈ মেলিব পাৰি সেইবিষয়ে জানি লৈছিলোঁ,শিকি লৈছিলোঁ৷তেওঁলোকৰ লোকৰ লগত আদানপ্ৰদান সদায় আছে আমাৰ৷মই বৰ্তমানো অভিজ্ঞ খেতিয়কৰ পৰা দিহা পৰামৰ্শ লও৷ অকল মই নেমু খেতি বুলিয়েই নহয় জলকীয়া,বেঙেনা,বিলাহী আদিৰ খেতিৰ সতেও জড়িত মই৷যোৱা বছৰ অকল নেমু খেতিৰ জৰিয়তে সাত লাখ টকা উপাৰ্জন কৰিবলৈ সক্ষম হৈছোঁ৷’