ৰাজস্থানৰ জোধপুৰৰ আশ্রমত এগৰাকী কিশোৰীক ধর্ষণৰ অভিযোগত বিগত চাৰি বছৰ ধৰি কাৰাগাৰত বন্দী স্বঘোষিত ধর্মগুৰু আছাৰাম বাপু । আকৌ শিৰোনামত আছাৰামৰ আশ্রম । অৱশ্যে এইবাৰ ঘটনাস্থল জোধপুৰ নহয়, উত্তৰ প্রদেশৰ গোণ্ডাৰ নগৰ কোতোৱালি এলাকা ।
আছাৰামৰ উত্তৰ প্রদেশৰ আশ্রমৰ পৰা এগৰাকী কিশোৰীৰ দেহ উদ্ধাৰক লৈ চাঞ্চল্যৰ সৃষ্টি হৈছে । ১৩ বছৰীয়া এই কিশোৰীগৰাকী যোৱা পাঁচ এপ্রিলৰ পৰা নিখোজ হৈ আছিল । শুকুৰবাৰে পুৱা আশ্রমৰ ভিতৰত বহু দিনৰ পৰা পৰিত্যক্ত হৈ থকা এটা গাড়ীৰ ভিতৰৰ পৰা এই কিশোৰীৰ দেহ উদ্ধাৰ হয় ।
আশ্রমৰ এজন কর্মচাৰীয়ে আৰক্ষীক দাবী কৰে, গাড়ীৰ ভিতৰৰ পৰা পচা গোন্ধ পাইছিল । কিহৰ গোন্ধ, চাবলৈ গৈ এগৰাকী কিশোৰীৰ দেহ চকুত পৰে । তাৰ পাছতেই তেওঁ আৰক্ষীক খবৰ দিয়ে । এই ঘটনাত জড়িতৰ সন্দেহত আশ্রমৰেই এজন কর্মচাৰীক আটক কৰে আৰক্ষীয়ে ।
প্রাথমিকভাৱে আৰক্ষীয়ে সন্দেহ কৰিছে, হত্যা কৰি দেহ লুকুৱাৰ চেষ্টা কৰা হৈছিল । অৱশ্যে কিশোৰীগৰাকীক ধর্ষণ কৰি হত্যা কৰা হৈছে নেকি, সেয়া পৰ্যবেক্ষণ কৰিছে আৰক্ষীয়ে ।
২০১৩-ত এগৰাকী কিশোৰীক জোধপুৰ আশ্রমত ধর্ষণৰ অভিযোগ উত্থাপিত হয় আছাৰামৰ বিৰুদ্ধে । সেই গোচৰত ২০১৮-ত জোধপুৰৰ বিশেষ আদালতত দোষী সাব্যস্ত হয় তেওঁ । আদালতে তেওঁক যাৱজীজৱন কাৰাদণ্ড দিছে ।