ভূপেন বৰাই অসম প্ৰদেশ কংগ্ৰেছৰ সভাপতি হোৱাৰ দিনাৰ পৰা কংগ্ৰেছ শূন্যৰ পিনে গতি কৰিলে আৰু ভূপেন বৰা কংগ্ৰেছৰ সভাপতি হৈ থকালৈকে অসমত কংগ্ৰেছ শূণ্য হৈয়েই থাকিব ৷ যাৰ ফলত অসম বিধানসভাত অতি সোনকালেই বিৰোধী দলপতি হʼব এ আই ইউ ডি এফ নেতা ৷ এই মন্তব্য ভৱানীপুৰ বিধানসভা সমষ্টিৰ বিজেপি বিধায়ক ফনীধৰ তালুকদাৰৰ ৷
আজি সংবাদ মাধ্যমেৰে হোৱা এক বাৰ্তালাপত বিধায়কগৰাকীয়ে কে’বাটাও বিষ্ফোৰক মন্তব্য কৰি কয় যে বিজেপিত অচিৰেই কংগ্ৰেছৰ দলৰ ছয়গৰাকীকৈ বিধায়কে যোগদান কৰিব ৷ আনহাতে, কালি ঘোষণা কৰা গুৱাহাটী পৌৰ নিগমৰ নিৰ্বাচনৰ ফলাফল সন্দৰ্ভত সাংবাদিকে সোধা প্ৰশ্নৰ উত্তৰত তেওঁ কয় যে অকল গুৱাহাটী মহানগৰবাসী বুলিয়েই নহয় সমগ্ৰ অসমৰ হিন্দুত্ববাদত বিশ্বাসী ৰাইজে একমাত্ৰ বিজেপিকেই আঁকোৱালি ল’ব ৷ আৰু সেয়েহে কংগ্ৰেছ দলৰ সকলো হিন্দু নেতাই এজন এজনকৈ লাহে লাহে বিজেপিত যোগদান কৰিব বুলিও তালুকদাৰে তাৎপৰ্যপূৰ্ণ মন্তব্য কৰে ৷
ইপিনে, অসমত বিজেপিৰ ভৱিষ্যত সন্দৰ্ভতো মন্তব্য কৰি তালুকদাৰে কয় যে সমগ্ৰ অসমত বিজেপিয়ে আৰু ৩০ বছৰ অনায়াসে শাসন কৰিব ৷ গতিকে অহা ৩০টা বছৰ আৰু বেলেগ ভাবি লাভ নাই, কেৱল বিজেপি আৰু বিজেপিয়েই ৰাজ্যৰ শাসনভাৰত থাকিব বুলিও ভৱানীপুৰৰ বিধায়কগৰাকীয়ে মত আগবঢ়ায় ৷