বিগত দুটা বছৰে সমগ্ৰ বিশ্বতে ত্ৰাসৰ সৃষ্টি কৰি আহিছে কৰ’না ভাইৰাছে । ইয়াৰ মাজতে এইবাৰ আতংকৰ কাৰণ হৈ পৰিছে এবিধ বেক্টেৰিয়া । এই বেক্টেৰিয়াৰ বাবে হোৱা ছালম’নেল’ছিছ ৰোগেই সম্প্ৰতি বিপদৰ আগজাননি দিছে ইউৰোপ আৰু আমেৰিকাত ।
বিশ্ব স্বাস্থ্য সংস্থা (হু)ৰ তৰফৰ পৰা জনাইছে যে ইতিমধ্যেই ১৫০জন এই ৰোগত আক্ৰান্ত হৈছে । শিশুসকলেই এই বেক্টেৰিয়াজনিত অন্ত্ৰৰ ৰোগত বেছিকৈ ভোগা বুলিও ‘হু’ৰ তৰফৰ পৰা জনাইছে । ‘হু’ৱে লগতে জনাইছে যে আক্ৰান্তসকলৰ ভিতৰত নটি শিশুৰ অৱস্থা সংকটজনক আৰু ইতিমধ্যেই তেওঁলোকক চিকিৎসালয়ত ভৰ্তি কৰোৱা হৈছে । অৱশ্যে এই পৰ্যন্ত কোনো মৃত্যুৰ তথ্য পোহৰলৈ অহা নাই ।
একাংশ বিশেষজ্ঞই দাবী কৰিছে যে বেলজিয়ামত তৈয়াৰী ‘কিণ্ডাৰ’ কোম্পানীৰ চকলেটৰ পৰাই বিয়পি পৰিছে ক্ষতিকাৰক বেক্টেৰিয়া ছালম’নেল্লা টাইফিমিৰিয়াম । ‘হু’ৰ তৰফৰ পৰা লগতে জনাইছে যে বিভিন্ন দেশৰ পৰা এই অভিযোগ অহাৰ পাছত ‘কিণ্ডাৰ’ কোম্পানীয়ে নিজৰ চকলেট বজাৰৰ পৰা প্ৰত্যাহাৰ কৰি ঘূৰাই নিছে । সমগ্ৰ বিশ্বৰ প্ৰায় ১১৩খনৰো অধিক দেশলৈ বেলজিয়ামৰ পৰা এই চকলেট ৰপ্তানি কৰা হয় । ইতিমধ্যেই ১১খন দেশত চকলেটৰ ভিতৰত বেক্টেৰিয়াৰ জেনেটিক ছিকুৱেন্স ধৰা পৰিছে ।
‘হু’ৰ তথ্য প্ৰকাশৰ পাছতে ছালম’নেল’ছিছ ৰোগক কেন্দ্ৰ কৰি মানুহৰ উৎকণ্ঠা বৃদ্ধি পাইছে । প্ৰধানকৈ পশুৰ শৰীৰত এই ছালম’নেল্লা টাইফিমিৰিয়াম বেক্টেৰিয়াৰ সন্ধান পোৱা যায় । খাদ্য আৰু পানীৰ মাধ্যমেৰে এই বেক্টেৰিয়া মানুহৰ শৰীৰত প্ৰৱেশ কৰে । মাংস, কণী বা দুগ্ধজাত খাদ্যৰ মাধ্যমেৰেই এই বেক্টেৰিয়া মানুহৰ শৰীৰলৈ সংক্ৰমিত হয় । পশু বা মানুহৰ মলৰ পৰাই এই ৰোগ বিয়পিব পাৰে ।
ছালম’নেল্লা ৰোগৰ উপসৰ্গৰ স’তে টাইফয়েডৰ উপসৰ্গৰ মিল পোৱা যায় । এই ৰোগত আক্ৰান্ত হ’লে বমি, পেটৰ বিষ, অলস ভাব, জ্বৰ, ডায়েৰিয়াৰ দৰে উপসৰ্গই দেখা দিয়ে ।
খাদ্য বা পানীত এই বেক্টেৰিয়া ছয়ৰ পৰা ৭২ ঘণ্টা পৰ্যন্ত জীয়াই থাকিব পাৰে । এবাৰ সংক্ৰমিত হ’লে প্ৰায় সাত দিনলৈ এই উপসৰ্গসমূহ থাকিব পাৰে । শিশু আৰু বয়স্কসকলৰ ক্ষেত্ৰত এই বেক্টেৰিয়াৰ সংক্ৰমণত জলশুষ্কতাও হ’ব পাৰে । ৰোগৰ জটিলতা বৃদ্ধি পালে কোনোবা সময়ত ই প্ৰাণঘাতীও হৈ উঠিব পাৰে ।