বাগসা জিলাৰ জালাহ উলুবাৰীৰ এগৰাকী কলেজীয়া ছাত্ৰী বিগত দুদিন ধৰি নিৰুদ্দেশ হৈ থকা ঘটনাই অঞ্চলটোত চাঞ্চল্যৰ সৃষ্টি কৰিছে ৷ কলেজলৈ যোৱাৰ পথত যোৱা ২৫ এপ্ৰিলত নিৰুদ্দিষ্ট হয় ছাত্ৰীগৰাকী ৷
জালাহৰ ডা৹ অনন্ত একাডেমী জুনিয়ৰ কলেজত অধ্যয়নৰত ছাত্ৰীগৰাকীৰ নাম কৰিনা দাস ৷ এইফালে নিজৰ কন্যাক বিচাৰি দিনে-নিশাই ক্ৰন্দনত ভাগি পৰিছে ছাত্ৰীগৰাকীৰ মাতৃ ৷
ইতিমধ্যে জালাহ আৰক্ষী চকীত নিৰুদ্দেশ সন্দৰ্ভত পৰিয়ালৰ লোকে এখন এজাহাৰ দাখিল কৰিছে ৷ কিন্তু বিগত তিনিদিন ধৰি কৰিনা দাসৰ কোনো শুংসূত্ৰ পৰিয়ালৰ লগতে আৰক্ষীয়েও উদ্ধাৰ কৰিবলৈ সক্ষম হোৱা নাই ৷
সূত্ৰ অনুসৰি, জালাহ আৰক্ষী চকীৰ অন্তৰ্গত উলুবাৰীৰ ভূপেন দাস আৰু অঞ্জুমনি দাসৰ জীয়ৰী কৰিনা দাস বিগত ২৫ এপ্ৰিলত ঘৰৰ পৰা ওলাই আহিছিল কলেজলৈ বুলি ৷ কিন্তু সন্ধিয়ালৈ কৰিনা ঘৰলৈ ঘূৰি নোযোৱাত পিতৃ- মাতৃ চিন্তিত হৈ পৰে ৷ আনকি কৰিনাৰ লগত থকা মোবাইল ফোনটোও সিদিনাৰ পৰাই বন্ধ হৈ আছে ৷ বিভিন্ন স্থানত বিচাৰ খোচাৰ কৰিলে যদিও আজিলৈ কোনো সন্ধান নাপালে ছাত্ৰীগৰাকীৰ ৷
তিনিদিন ধৰি কৰিনাৰ কোনো সন্ধান নোপোৱাত মাতৃয়ে কান্দি কান্দি নিজ কন্যাক য’তে আছে ঘৰলৈ উভতি আহিবলৈ আহ্বান জনাইছে ৷
