চলিত বৰ্ষত মৰণোত্তৰ পুলিৎজাৰ বঁটা লাভ কৰিলে ভাৰতীয় চিত্র সাংবাদিক দানিশ ছিদ্দিকীয়ে । এইবাৰক লৈ তেওঁক দ্বিতীয়বাৰ পুলিৎজাৰ বঁটা দিয়া হ’ল । তেওঁ ৰয়টাৰ্ছ সংবাদ সংস্থাৰ চিত্র সাংবাদিক আছিল ।
ভাৰতত কৰ’না পৰিস্থিতিৰ খবৰ সংগ্রহৰ বাবে তেওঁক এই সন্মান প্রদান কৰা হ’ল । ইয়ায় আগতে ৰোহিংগিয়া শৰণার্থী সংকটৰ ছবি বিশ্ববাসীৰ আগত দাঙি ধৰাৰ বাবে ২০১৮ত প্রথম ভাৰতীয় হিচাপে দানিশ আৰু আদনান আবিদিক পুলিৎজাৰ বঁটা প্ৰদান কৰা হৈছিল । ২০২১ৰ ১৬ জুলাইত কন্দহৰত আফগান বাহিনী আৰু তালিবানৰ সংঘাতৰ খবৰ কৰিবলৈ গৈ নিহত হয় দানিশ ।
দানিশৰ লগতে ক’ভিড পৰিস্থিতিত বিশেষ অৱদানৰ বাবে আদনান আবিদি, ছান্না ইৰশাদ মাট্টু আৰু অমিত ডাভেকো চলিত বৰ্ষত পুলিৎজাৰ বঁটা দিয়া হৈছে । আদনানৰো এইটো দ্বিতীয় পুলিৎজাৰ ।
সাংবাদিকতা, কিতাপ লিখা, নাটক আৰু সংগীত জগতত বিশেষ অৱদানৰ বাবে পুলিৎজাৰ বঁটা দিয়া হয় ।
কিভ-মস্কো সংঘাতত সাংবাদিকতাৰ অনবদ্য নিদর্শনৰ বাবে পুলিৎজাৰ মঞ্চত ইউক্রেইনৰ সাংবাদিকসকলৰ কথা উল্লেখ কৰি বিশেষ সন্মান দিয়া হয় ।
