নগদ লেনদেন নিয়ন্ত্ৰণ কৰিবলৈ নতুন নিয়ম আৰম্ভ কৰিলে কেন্দ্রীয় চৰকাৰে । বেংক বা প’ষ্ট অফিচত বছৰত কুৰি লাখ টকা বা তাতকৈ অধিক টকাৰ নগদ লেনদেনৰ (জমা আৰু তোলা) ক্ষেত্রত পেন (PAN) অথবা আধাৰ কার্ডৰ তথ্য দিয়া বাধ্যতামূলক কৰা হৈছে । এই নতুন নিয়ম কার্যকৰ হ’ব ২৬ মে’ৰ পৰা । যাৰ অর্থ চৰকাৰে এইবাৰ ২০ লাখ টকাতকৈ অধিক কোনো লেনদেন হ’লেই তাৰ হিচাপ ৰাখিব চৰকাৰে ।
চিবিডিটিৰ (CBDT) তৰফৰ পৰা আয়কৰ আইনৰ অধীনত এই নতুন নিয়ম প্ৰস্তুত কৰা হৈছে । এটা বিত্তবৰ্ষত কর্প’ৰেট হেওক বা সমবায়ৰ দৰে কোনো বেংক আৰু প’ষ্ট অফিচ, সর্বত্রই এক বা একাধিক একাউন্টত ২০ লাখ টকা নগদ জমা বা নগদ তোলা, দুই ক্ষেত্রতেই পেন বা আধাৰৰ (Aadhaar) তথ্য দিয়া বাধ্যতামূলক । লগতে সকলো ধৰণৰ বেংক আৰু প’ষ্ট অফিচত কাৰেন্ট একাউন্ট খোলাৰ ক্ষেত্রতো পেন কার্ড দেখোৱা বাধ্যতামূলক কৰা হৈছে ।
এই পর্যন্ত সকলো একাউন্টৰ বার্ষিক লেনদেনত পেন বা আধাৰ বাধ্যতামূলক নাছিল । লগতে ৫০ হেজাৰৰ অধিক লেনদেনৰ ক্ষেত্রত পেন কার্ড বাধ্যতামূলক আছিল । এটা একাউন্টত বার্ষিক লেনদেনতো নির্দিষ্ট পৰিমাণৰ অর্থতকৈ অধিক লেনদেন কৰিলে পেন কার্ড লাগিছিল । কিন্তু কোনোৰ একাধিক একাউন্ট থাকিলে তেওঁৰ সকলো লেনদেনৰ ওপৰত দৃষ্টি ৰখাৰ কোনো ব্যৱস্থা নাছিল । এইবাৰ সেইটোৱে কৰাৰ চেষ্টা কৰিছে মোদী চৰকাৰে ।
প্ৰকৃততে কেন্দ্রই দীর্ঘদিন ধৰি কৰদাতাৰ সংখ্যা বঢ়াব বিচাৰিছে । সেয়ে যিসকলৰ পাৰিশ্ৰমিক কিছু বেছি কিন্তু আয়কৰৰ আওতাত নাই, তেওঁলোকৰ লেনদেনৰ হিচাপ ৰাখিব বিচাৰিছে চৰকাৰে । সেয়ে ২০ লাখ টকাতকৈ অধিক সমস্ত লেনদেনৰ ক্ষেত্রত আধাৰ আৰু পেন কার্ড বাধ্যতামূলক কৰিব বিচাৰিছে ।
ইয়াৰ উপৰি, ২০ লাখতকৈ অধিক লেনদেনত পেন-আধাৰ বাধ্যতামূলক কৰিলে, নগদত লেনদেনৰ প্রৱণতা কমিব পাৰে বুলিও অনুমান কৰিছে কেন্দ্রই । সেই ক্ষেত্রত ভাৰতক নগদহীন অর্থনীতি কৰাৰ যি চেষ্টা মোদী চৰকাৰে কৰিছিল, সেইটোও কিছু পূৰণ হ’ব পাৰে বুলি অনুমান কৰা হৈছে ।