সাৰ, বস্ত্র, ৰাসায়নিক আৰু পেট্র’কেমিকেল, ফার্মাচিউটিকেলছ আৰু বাণিজ্য মন্ত্রণালয়ৰ অধীনত কে’বাটাও কেন্দ্রীয় পাবলিক ছেক্টৰ এন্টাৰপ্রাইজৰ (CPSEs) বেচৰকাৰীকৰণ বা সংস্থাসমূহক বন্ধ কৰিবৰ বাবে প্রাথমিক তালিকা প্ৰস্তুত কৰা হ’ব পাৰে শীঘ্রে । এই তালিকাত ৬০টা সংস্থাক অন্তর্ভুক্ত কৰাৰ সম্ভাৱনা । ইয়াৰ বাবে চৰকাৰে নন-ষ্ট্ৰেটেজিক সংস্থাসমূহ বাছনি কৰি সেইবোৰৰ বিলগ্নীকৰণৰ পৰিকল্পনা বাস্তৱায়নৰ প্রস্তুতি চলাইছে ।
বিষয়টোৰ বিষয়ে অৱগত সূত্র মাৰফত জানিব পৰা গৈছে যে নন-ষ্ট্ৰেটেজিক ছেক্টৰত প্রায় ১৭৫টা চিপিএছই আছে । যাৰ ভিতৰত এক-তৃতীয়াংশ বন্ধ হোৱাৰ পথত আৰু বাকী সংস্থাসমূহৰ ক্ষেত্রতো লাহে লাহে বেচৰকাৰীকৰণৰ পথ অৱলম্বন কৰিব পাৰে কেন্দ্রই । ইয়াৰ ভিতৰত কিছু অলাভজনক সংস্থাক প্রাইভেট ছেক্টৰৰ হাতত তুলি দিয়া হ’ব ।
নীতি আয়োগ, পাবলিক এন্টাৰপ্রাইজেছ বিভাগ আৰু প্রশাসনিক মন্ত্রণালয়ৰ এদল বিষয়াই এনে সংস্থাবোৰক চিহ্নিত কৰিছে যাৰ বেচৰকাৰীকৰণৰ বা বন্ধ কৰা হ’ব । চলিত বিত্তবৰ্ষৰ বাজেটতো এই কৌশল সম্পর্কে আভাস দিয়া হৈছিল কেন্দ্রৰ তৰফৰ পৰা । সূত্রৰ মতে, মাদ্রাজ ফার্টিলাইজাৰছ আৰু নেছনেল ফার্টিলাইজাৰছসহ সাৰ মন্ত্রণালয়ৰ অধীনত নটা চিপিএছই-ৰ বেচৰকাৰীকৰণৰ সম্ভাৱনা আছে । দেশত প্রচুৰ পৰিমাণে সাৰ আমদানি কৰা হয় । এই পৰিপ্রেক্ষিতত, চৰকাৰে সাম্প্রতিক বছৰবোৰত দেশীয় উৎপাদন বৃদ্ধি কৰাৰ চেষ্টা চলাইছে । এনে পৰিস্থিতিত এই সংস্থাবোৰ বেচৰকাৰী খণ্ডৰ বাবে আকর্ষণীয় হ’ব পাৰে ।
ইপিনে বস্ত্র মন্ত্রণালয়ৰ অধীনত চিপিএছই-বোৰৰ ভিতৰত আছে নেছনেল টেক্সটাইল কর্প’ৰেছন (NTC) । কেন্দ্রই এই সংস্থাটো বন্ধ কৰিব পাৰে । এই সংস্থাৰ অধীনত অপ্রচলিত প্রযুক্তিৰ ২৩টা মিল আছে । বাণিজ্য মন্ত্রণালয়ৰ অধীনত অহা দুটা ট্রেডিং কোম্পানি বন্ধ হৈ যাব কাৰণ তেওঁলোকৰ ব্যৱসায় কিছু বছৰ ধৰি অলাভজনক হৈ পৰিছে ।