নিলম্বিত বিজেপি মুখপাত্র নূপুৰ শর্মা আৰু তেওঁৰ সহকর্মী নবীন জিন্দলৰ বিতর্কিত মন্তব্যৰ প্রতিবাদত পথত ওলাই আহিছে একাধিক সংগঠন । শুকুৰবাৰে নমাজৰ পাছত ৰাজধানী দিল্লীৰ জামা মছজিদৰ সন্মুখত বিশাল জনসমাগমত অভিযুক্ত বিজেপি নেতানেত্রীক গ্রেপ্তাৰ কৰাৰ দাবী উত্থাপিত হয় । একেই ধৰণৰ জনসমাগম হয় উত্তৰ প্রদেশৰ ছাহৰানপুৰ, কলকাতাৰ পার্ক ছার্কাছসহ দেশৰ বিভিন্ন ঠাইত ।
বৃহস্পতিবাৰে দিল্লী আৰক্ষীয়ে জনাইছিল, তেওঁলোকে নূপুৰ আৰু নবীনসহ কে’বাজনৰ বিৰুদ্ধে অভিযোগ দাখিল কৰিছে । যদিও তেওঁলোক কোনোৱেই এতিয়াও গ্রেপ্তাৰ হোৱা নাই ।
প্রসংগত, এটা সংবাদমাধ্যমত বিজেপি মুখপাত্র নূপুৰৰ বিতর্কিত মন্তব্যৰ পৰিপ্রেক্ষিতত পুনৰ বিশ্বত ব্যাপক সমালোচনাৰ সন্মুখীন হ’বলগীয়া হয় ভাৰতে । কাটাৰসহ একাধিক দেশৰ শ্বপিং মলত ভাৰতীয় পণ্য বিক্রী নিষিদ্ধ কৰা হৈছে । পশ্চিম এছিয়াত যি বিপুল সংখ্যক ভাৰতীয়ই কাম কৰে, তেওঁলোকো কাম হেৰুৱাৰ শংকাত ।
সংবাদ সংস্থা সূত্রে খবৰ, শুকুৰবাৰে নমাজৰ শেষত দিল্লীৰ জামা মছজিদৰ সন্মুখত নূপুৰ শর্মা আৰু নবীন জিন্দলৰ গ্রেপ্তাৰীৰ দাবী উত্থাপন কৰি বিশাল জনসমাগম হয় । জামা মছজিদৰ শ্বাহি ইমামে জনাইছে, তেওঁলোকৰ তৰফৰ পৰা কোনো অৱস্থানত বিক্ষোভৰ আহ্বান জনোৱা হোৱা নাই ।
তেওঁ কয়, ‘‘আমি নাজানো এয়া কোনে আৰম্ভ কৰিলে । নমাজ শেষ হোৱাৰ পাছতেই কিছু সংখ্যক লোকে শ্ল’গান দিয়া আৰম্ভ কৰে । তেওঁলোকৰ লগত আৰু মানুহে যোগ দিয়ে । আৰক্ষীয়ে কিছু সময়ৰ ভিতৰতে অঞ্চল খালি কৰি দিয়ে । এতিয়া সকলো ঠিক আছে ।’’
কেৱল দিল্লীয়ে নহয়, পশ্চিমবংগৰ পার্ক ছার্কাছ, উত্তৰ প্রদেশৰ ছাহৰানপুৰ, মোৰাদাবাদ, প্রয়াগৰাজতো বিক্ষোভৰ খবৰ শোনিবলৈ পোৱা যায় । নূপুৰ, নবীনৰ গ্রেপ্তাৰীৰ দাবীত বিক্ষোভৰ খবৰ আহিছে দেশৰ অন্য ঠাইৰ পৰাও ।